DIILONGWEESH 47
Ukaady Mukumban Bwiibuh Kuhet BaatiisumwEeny?
Ku dyambulwiish dya Bibl, udy mulong myand yivul yitaatal Yehow. Udy mushiitulul myand yivul bwiibuh kumusangeej. Misang yikwaabw, kudy mwa kwiikal myand yidy yikwiimanyik bwiibuh kwiicih kudy Yehow ni kuhet baatiisumw. Mu diilongweesh eedy, twiiyiiy kutal myand yidy mwa kukukaakadish bwa kuhet baatiisumw ni muwudy mwa kwiiyitaatameen.
1. Bwiibuh kuhet baatiisumw, bikaam umanyik myand yoos ya mu Bibl eeny?
Kuuhal kwiibuh kuhet baatiisumw, bikaam ‘umanyik myand ya biin-biin.’ (1 Timoteh 2:4) Kabiin byumvwiij neey, udy teng mwa kumanyik myand yoos ya mu Bibl kuuhal kwiibuh kuhet baatiisumw. Ning biin Krist bakaady bahet baatiisumw kukaady mafuk mavul, bacituutungunuk teng ni kulong. (Kolos 1:9, 10) Bikaam umvw malongweesh mashimat ma mu Bibl. Bakul ba mu cisumbw biiyiiy kukwambulwiish bwiibuh kumanyik ning ukaady ni diimany dikumban.
2. I myand kaay yiwudy mwa kukumbaj kuuhal kwiibuh kuhet baatiisumw?
Kuuhal kwiibuh kuhet baatiisumw, ‘bikaam wiifwiij naay . . . ni waalabul mucim iibuh.’ (Balaay Myand Yilongel Bapostol 3:19.) Biin eeby byumvumvwiij neey, bikaam wiikunying bwa mpekaat ni ulomb Yehow lus bwa avulamin mpekaat yibuh. Byumvumvwiij cikwaabw neey, bikaam ulek myand yoos yibiih ni wangat diihangadik dya kulong myand yisaasangeej Mawej. Cikwaabw, bikaam wiikal utweel mu bisangil bya cisumbw ni ushaal kajaady ukiish mwanj kuhet baatiisumw.
3. Bwabiny kwiin mwa kuciin bwiibuh kuhet baatiisumw?
Baat bakwaabw, balaalang neey, kabiish mwa kukumbaj malay madyobw balay Yehow. Cya biin, udy mwa kulong bilem, ning baan-balum ni baan-bakaj balulamat bady Bibl uleeb, balongel byaabw bilem. Ki, Yehow kiishoh bend ulomb bahambidil bindiy bwa kwiikalobw bawaakan. (Balaay Musambw 103:13, 14.) Cidy ni buseeb kudy Yehow, i kwiikashishomw bwa kulong cidy cilengel! Yehow, wiiyiiy kukwambulwiish. Cya biin, Yehow wiitujaajadikil neey: ‘kakwiishoh bend cidy mwa kwiitukabulul ku lukat lwiituleejeley.’—Balaay Biin Rom 8:38, 39.
TWEEL MU BONDOK
Tal muwudy mwa kutaatameen myand yidy mwa kukukaakadish bwa kuhet baatiisumw hawendend ni kulong bwa kumanyik Yehow bilengel ni hawiitaatab dyambulwiish dindiy.
4. Long bwa kumanyik Yehow bilengel
I mushind kaay mulengel uwudy mwa kumanyik Yehow, kuuhal kwa kuhet baatiisumw? Bwiibuh kumumanyik bilengel, bikaam ulong myand yileeleej neey, udy mumukat ni yimusaasangeej. Talaay VIDEO bwa kutal mudy balony ba Bibl ba ha bulab butuutul bafik kukulong bwaal oobw. Ni isambilaay ha diijooj eedy.
-
Mu video oomw, i biny bidy yambulwiish biin-kweet baan-balum ni baan-bakaj bwa kwiilongololobw bwa kuhet baatiisumw?
Balaay Biin Rom 12:2, ni isambilaay ha majooj aam:
-
Ulaalandulok myand yidy Bibl ulongweesh eecy wiiyihaahangujok bwa kumanyik ning Batemw ba Yehow baloolongweesh myand ya biin-biin?
-
Iikaleby naak, i biny biwudy mwa kulong?
5. Muwudy mwa kuhit bilengel ni myand yidy mwa kukukaakadish bwiibuh kuhet baatiisumw
Tut bangat diihangadik dya kwiicih kudy Yehow ni bwiitut kuhet baatiisumw, tut boos twiiyiiy kuhet makab. Cileejel, talaay VIDEO, ni isambilaay ha majooj aam.
-
Mu video oomw, i lutat kaay lwaakady Narangerel mutaatameen bwa kukadil Yehow mudimw?
-
I mushind kaay waakady lukat lwaakadyey mukat Yehow, lumwambulwiish bwa kutaatameeney lutat oolw?
Balaay Tusumw 29:25 ni 2 Timoteh 1:7, ni isambilaay ha diijooj eedy:
-
I biny bidy mwa kwiitwaakish mucim mukasakan bwiitut kuhit bilengel ni myand yidy mwa kwiitukaakadish bwiitut kuhet baatiisumw?
6. Teekel Yehow micim
Yehow wiiyiiy kukwambulwiish bwiibuh kulong myand yimusaasangeej. Talaay VIDEO, ni isambilaay ha majooj aam.
-
Mu video oomw, i biny byaakady bilong bwa mulony a Bibl kaahand hakaakal kuhet baatiisumw?
-
I biny byaakady bimukashish bwindiy kuteekel Yehow micim?
Balaay Yeshaay 41:10, 13, ni isambilaay ha diijooj:
-
Bwabiny wiitaatab neey, wiiyiiy kukumbaj micih yibuh bwiibuh kuhet baatiisumw?
7. Kashish lukat luwudy mukat Yehow
Uw mulangil ha mushind udy Yehow mukukat, wiiyiiy kumuleej dyanyish ni wiiyiiy kumukadil mudimw buyiil. Balaay Musambw 40:5, ni isambilaay ha diijooj eedy:
-
I mabenesh kaay ma kudy Yehow mawudy mutakamin bwiibuh kuhet?
Muprofet Jeremih waakady mukat Yehow ni diiy dindiy, ni waakady ni musangal muvul bu mwaakadyobw bamubiikan mu diijin dya Yehow. Uleebel neey: ‘Diiy diibuh dyaakady diiyakish musangal, bwaal babiibikan mu diijin diibuh uw Yehow Mawej.’ (Jeremih 15:16) Isambilaay ha majooj aam:
-
Bwabiny kwiikal Temw a Yehow i dyakatook?
-
Udy mukat kuhet baatiisumw ni kushaal Temw a Yehow eeny?
-
Kudyok bwaal kaahand budy mwa kukukaakadish bwa kulong nook eeny?
-
Bwiibuh, bwa kukumbaj kiihacil kiibuh kakuhet baatiisumw, i biny biwudy mwa kulong?
BAAT BAKWAABW BALEELEEB NEEY: “Tuciiciin bwa kuhet baatiisumw bwaal katw’a kukumbajoh bend myand yitudy balay.”
-
Ki muwiiyumvumvw eeny?
CYA KUKWAAT
Ku dyambulwiish dya Yehow, udy mwa kuhit bilengel ni myand yidy mwa kukukaakadish bwiibuh kuhet baatiisumw.
Bwa kuvuluk
-
Bwiibuh kuhet baatiisumw, bikaam umanyik myand yoos ya mu Bibl eeny?
-
I myand kaay yiwudy mwa kushiitulul kuuhal kwiibuh kuhet baatiisumw?
-
Bwabiny bikaam ulek kuciin bwiibuh kuhet baatiisumw?
MYAND YIKWAABW YA KUMANYIK
Tal myand yidy mwa kusak muut bwa kwangatey diihangadik bwindiy kuhet baatiisumw.
“Ukaady Mukumban Bwiibuh Kuhet Baatiisumw Eeny?” (Cibumb cya Muteetekel 3/2020 mu Tshiluba)
Muwudy mwa kutaatameen makab kaahand mady mwa kukukaakadish bwiibuh kuhet baatiisumw.
“I Biny bidy mwa Kuukaakadish bwa Kuhet Baatiisumw?” (Cibumb cya Muteetekel 3/2019 mu Tshiluba)
Tal mwaakady muut kaahand muhit ni myand yaakady mwa kumukaakadish bwa kuhet baatiisumw.
Mwaan-mulum udyobw babiikan neey, Ataa waakady ulek kuhet baatiisumw. Tal cyaakady cimujaadikil bwa kumanyik neey, baatiisumw udy ni buseeb.
You May Also Like
MAJOOJ MADYAAKAL BAAT BIYIHANGUJ
Dilong dya Bibl i Biny?
Het maalabul ku majooj habitaatal program kulong Bibl bya bituh.
