Baasand batweetweel mu maluw, badyaakal batakamin neey, musangal udyobw bahet diifuk aady, wiikakalok buyiil. Bidy mwa kwiikal naak. Biin Krist bakaady mu maluw kukaady mafuk mavul ni biikashishomw bwa kulond mibel ya mu Bibl, i bamanyik neey, biloolongek.

1. I mibel kaay yidy Bibl waakish balum?

Yehow i muteek mulum bwa ikal fumw a cisak. (Balaay Efez 5:23.) Yehow i mukat bwa maan-mulum angat mahangadik mady mwa kuhetesh biin mu cisak musangal. Bibl wambambil baan-balum neey: “kataay bakaj biinun.” (Efez 5:25) Kukat mukaj kumvumvwiij biny? Mwaan-mulum udy mukat mukaj indiy, umuloolongel myand yilengel hadyobw kaayabw eecy hadyobw mukacy mwa baat bakwaabw. Umulaalam ni umukumbajil myand ya ku nyeet ni biit bikaakaamey. (1 Timoteh 5:8) Bwaal budy ni buseeb menmen, umwabambulwiish bwa kudyey bulund ni Yehow. (Matewus 4:4) Cileejel, udy mwa kusambil ni ubal Bibl haakaabumw ni mukaj indiy. Hady mwaan-mulum ulam mukaj indiy bilengel, bulund bwindiy ni Yehow bwiikaakal bulengel.​—Balaay 1 Pyeel 3:7.

2. I mubel kaay udy Bibl waakish bakaj?

Bibl uleeleeb neey: “mwaan-mukaj woos aneemek mbaayend.” (Efez 5:33) I mushind kaay udyey mwa kuneemek mbaayend? Udy mwa kulangil ha biikadil bilengel bidy naaby mbaayend ni mudyey wiikashishomw bwa kumulam ni kulam baan. Cikwaabw, udy mwa kuleej mudyey uneemek mbaayend, hadyey utw mahangadik mindiy nyam ku mikon, wiisamb nend ni kaneemw ni uleeb bilengel bwindiy ning yiy kay uhambidil Yehow.

3. I mushind kaay udy mulum ni mukaj mwa kukashish maluw maababw?

Bibl uleeleeb bwa biin maluw neey: “Boos babidy, biiyiiy kwiikal nyeet yaakaabumw.” (Matewus 19:5) Biin eeby byumvumvwiij neey, kabiish mwa kulek ciit ning cyaakaabumw cibakabulul. Baloolong nook, hadyobw ni ciibidil cya kuhitish diib haakaabumw, bambilangan myand hatook ni baleejangan mudyobw biidyumvw. Hakufulok Yehow​—kabiish mwa kwiitab ciit kaahand eecy muut kaahand—​ikal ni buseeb kuhitok mwiin maluw. Kabiish mwa kulamatangan bikasakan ni muut mukwaabw kuhitok mushind udyobw mwa kulamatangan ni mwiin maluw nend.

 TWEEL MU BONDOK

4. Nun balum​—kataay bakaj biinun ni i balamaay bilengel

5. Nun bakaj​—kataay bambaayeen ni i baneemekaay

Bibl ukaakashish bakaj bwa kuneemekobw bambaayaabw ning babw bahambidil eecy kabay bahambidil Yehow. Balaay 1 Pyeel 3:1, 2, ni isambilaay ha majooj aam:

• Uw mwiikal ni mbaayeeb ukiish Temw, manyik neey, dimw diifuk wiiyiiy kuhambidil Yehow. I mushind kaay mulengel uwudy mwa kumwambulwiish? Ulaalangok neey, i bilengel bwiibuh kwiikal kumudiil musah diifuk dyoos, eecy kwiikal ni bilong bilengel bileeleej muwumuneeneemek? Bwabiny?

Mulum ni mukaj, bady mwa kwangat mahangadik malengel boos haakaabumw. Misang yikwaabw, mukaj udy mwa kulek diihangadik didy mbaayend wangat. Udy mwa kumvwiij ni kaneemw ni kutuukij bwa cidyey mulekel kwiitab diihangadik eedy, ki bikaam amanyik neey, Yehow i mwaakish mulum bujit bwa kwangat mahangadik bwa cisak ciikal ni musangal. Uloolong bilengel hadyey utw diihangadik dya mbaayend nyam ku mikon. Haloolongey nook, wambambulwiish cisak bwa ciikal ni musangal. Balaay 1 Pyeel 3:3-5, ni isambilaay ha diijooj eedy:

• Yehow umvumvw bicy hady mukaj uneemek mbaayend?

6. Munudy mwa kuman myand ya mu maluw

 CYA KUKWAAT

Mulum ni mukaj, bady mwa kwiikal ni musangal bab bakatangan, baneemekangan, ni hadyobw bakooyel may matam ma mu Bibl.

Bwa kuvuluk

• I biny bidy mulum mwa kulong bwa maluw kwiikalem ni musangal?

• I biny bidy mukaj mwa kulong bwa maluw kwiikalem ni musangal?

• Uw mwiikal mu maluw, i diiy kaay ditam dya mu Bibl didy mwa kukwambulwiish bwiibuh kukashish maluw miibuh?