Tut boos, tudyaakal bakat kusungul mushind utudy mwa kuvwaal ni mutudy mwa kwiilengej. Tut tulond may matam ma mu Bibl, twiiyiiy kwiilengej mu mushind mulengel usaasangeej Yehow. Tutalaak may matam mady mwa kwiitwambulwiish mu bwaal oobw.

1. I may kaay matam mady mwa kwiitwambulwiish bwiitut kukaam bizang bilengel ni mutudy mwa kwiilengej?

Tudy mwa kusungul bwa kuvwaal bizang bu ‘mudyeby biwaakan mwa kuvwaal ni kwiihweekej ni meej majaalal,’ ni kulam cimweekel cilengel cileeleej mutudy “biin Mawej.” (1 Timoteh 2:9, 10) Tutalaak may matam manaay aam: 1) Bizang biitut biikal “biwaakan mwa kuvwaal.” Teng bu mututaatal mu bisangil bya cisumbw, baat ba Yehow, bavwaavwaal mu mishind yishiil-shiilangan, ki kuvwaal kwiitut ni kwiilengej, kuleeleej mutuneeneemek Mawej utuhaahambidil. 2) Kuvwaal ni “kwiihweekej” kumvumvwiij kulek kuvwaal bizang mu mushind mubiih ujuujuulangan milow ya nyeet. 3) Kuvwaal ni “meej majaalal” kuleeleej kulek kulond mishind yidy baat bahatul ya kuvwaal bizang ni ya kwiilengej. 4) Cimweekel ciitut ciikal teng cileej neey, tudy “biin Mawej,” ni cijaadikil baat neey, tuhaahambidil Mawej a biin-biin.​—1 Biin Korent 10:31.

2. I biny bidy Cimweekel ciitut mwa kulongel biin-kweet baan-balum ni baan-bakaj?

Tut boos, tudy ni bwiiyikadil bwa kusungul citudy mwa kuvwaal, ki bikaam tulangil ha mushind udy cimweekel ciitut mwa kulongel baat bakwaabw. Twiikaakashishomw bwa kulek kuvwaal bizang mu mushind udyeby mwa kulongel baat bakwaabw bibiih, ni hatuloolong myand ‘yileelengeleel mukwaabw ni yikaam bwa ney yishindamij kwiitabij kwindiy.’​—Balaay Biin Rom 15:1, 2.

3. I mushind kaay udy cimweekel ciitut mwa kukok baat mu kuhambidil kwa biin-biin?

Tudyaakal teng tukaam kuvwaal mu mushind mulengel, tudyaakal tuvwaal bilengel menmen nang-nang hatudyaakal tuy mu bisangil eecy mu mudimw a bukajaady. Katwiin bakat bwa cimweekel ciitut ni bizang bituvwaavwaal bikok meej ma baat kutudy, ki tudy bakat bwa baat batum meej maababw ku musah utwiibadiidiil. Cikwaabw, tudy bakat bwa baat bamanyik myand ya biin-biin ni ‘baneemek bulongweesh bwa Mawej.’​—Tiit 2:10.

 TWEEL MU BONDOK

4. Cimweekel cilengel cileeleej mutuneeneemek Yehow

I bwaal kaay butam bwiitusaasak bwiitut kwiikal ni cimweekel cilengel? Balaay Musambw 47:2, ni isambilaay ha majooj aam:

• Hatuvuuvuluk neey, tudy baleej hal ba Yehow, i mushind kaay udy bwaal oobw bwiitwambulwiish hatusuusungul bizang bya kuvwaal?

• Ulaalangok neey, i bilengel bwiibuh kulangil ha cimweekel ciibuh hawuyaay mu bisangil eecy hawuyaay mu mudimw a bukajaady? Bwabiny?

 5. Myand yidy mwa kwiitwambulwiish bwa kusungul bilengel bizang bitudy mwa kuvwaal ni mushind a kwiilengej

Talaay VIDEO.

Ning bizang biitut biikal bya mushing mukasakan eecy bya mushing mukeeh, bikaam biikal ni makend ni bikumbanyin mudimw utukaakal. Balaay 1 Biin Korent 10:24 ni 1 Timoteh 2:9, 10. Ni isambilaay ha mushind utudy mwa kulek bizang bu mudy . . .

• bya manyaan eecy kabiy biloongolol bilengel.

• bilamat ha nyeet, bileeleej bituh bya nyeet, eecy bijuujuulangan milow ya nyeet

Ning mudy biin Krist kabay muush mwa May mafundil Moyiz, may aam maleeleej mudy Yehow ulang. Balaay May Mumbulul 22:5, ni isambilaay ha diijooj eedy:

• Bwabiny bikaam tulek bizang eecy kwiilengej kuleeleej mwaan-mulum bu mwaan-mukaj eecy mwaan-mukaj bu mwaan-mulum?

Balaay 1 Biin Korent 10:32, 33 ni 1 Jah 2:15, 16, ni isambilaay ha majooj aam:

• Bwabiny bikaam bwa twiitacish bikasakan bwa cimweekel ciitut kaay cyalongel biin mutumb eecy biin mu cisumbw bibiih?

• I bizang bya mushind kaay ni kwiilengej bidy ha cyaab ciwudy mushikacil?

• Bilondeshel uw, mishind eey, iyikumbanyinok biin Krist eeny? Bwabiny?

 CYA KUKWAAT

Tut biikal ni cimweekel cilengel, tuleeleej mutuneeneemek Yehow ni baat bakwaabw.

Bwa kuvuluk

• Bwabiny mushind utuvwaavwaal ni utwiileelengej udy ni buseeb ku mees kwa Yehow?

• I may kaay matam mady mwa kwiitwambulwiish bwiitut kwangat mahangadik malengel habitaatal cimweekel ciitut?

• Cimweekel ciitut, cidy mwa kulongel kuhambidil kwiitut biny?