KWAALABUL BAAT BWA BASHAAL BIIYIJ
DIILONGWEESH DYA 10
Kwiikal mwiiswiik
Diiy ditam: “Twaakady habwiih, kabuy teng bwa kwiinudiil musah mulengel wa Mawej kaayend, ki ni bwa kwiinufwiil bu mutwaakady bahit kwiinukat, bwaal twiinubadil bu baat ba buseeb buvul.”—1 Tes. 2:8.
Cilongel Yeez
1. Tal FILM, eecy bal Jah 3:1, 2. Kuunyim kontonon majooj maloolond aam:
-
Bwabiny Nikodem ukacil bwa kwiiy kutal Yeez bufuk? —Tal Jah 12:42, 43.
-
Hahetelanganey ni Nikodem bufuk, i mushind kaay uleejel Yeez neey waakady mwiiswiik bwa kwaalabul baat bwa bashaal biiyij?
I biny bituloolongel ku cileejel cya Yeez?
2. Tuleeleej mutudy bakat baat hatwiiswiiswiik bwa kwiibambulwiish bwa bashaal biiyij.
Iidikij Yeez
3. Long ni mulony iibuh a Bibl a diib ni ha cyaab cikumban. Udy mwa kukat bwa kulong mu diifuk kaahand disunguluk mu luming eecy diib kaahand didyey mukat mu diifuk. Bidy mwa kwiikal bilengel bwindiy kulongel ha cyaab cindiy cya mudimw, kwindiy, hakacy a baat eeny? Kuk mushind, shintulul program iibuh bwa uhet mushind a kalong nend ha diib ni ha cyaab bidy bilengel bwindiy.
4. Iikalay nulongaay a ciibidil. Biby biiy kulongek neey kwaakwiikalok, kulekoh bend kulong nend. Hamut a kulong nook, anj kontonon neey:
-
Udy mwa kulong ni mulony iibuh a Bibl ha diib dikwaabw mu luming aal eeny?
-
Udy mwa kulong nend ku telefon eecy ku byaamw bya kwiisamb batalangan eeny?
5. Sambil bwa wiikal ni meej malengel. Lomb dyambulwiish kudy Yehow bwiibuh kushaal mwiiswiik bwa kwambulwiish mulony iibuh a Bibl, ning biby biikal neey ulwaal diivit bwa kulong ha ciibidil eecy bwa kukooyel mibel ya mu Diiy dya Mawej. (Fili. 2:13) Misang yikwaabw uw mutal neey mulony iibuh udy ni biikadil bivul bilengel; sambil bwiibuh kuhet dyambulwiish bwa kwiimanyin ha biikadil bilengel bidyey naaby aaby.
