“Nwaakady mwa kwiikal balongweesh.” (Ebr. 5:12) Lang ket! Yehow—Mulongweesh mulengel iimwiin weeh wa mu diiwul ni ha bulab—wiitulomb bwiitut kulongweesh bakwaabw myand yimutaatal! Mudimw woos udyobw biitwaakish bwa kulongweesh myand ya biin-biin habitaatal Yehow—mu cisak, mu cisumbw, eecy mu mudimw a bukajaady—i dyaakatook diidiin dyeeh ni bujit butam. I biny bitudy mwa kulong bwiitut kumukumbaj bilengel menmen?

Tuheehetel dyaalabul ku may maakady mupostol Pool mufundil Timoteh aam: “Tungunuk ni kwiitwaal ku kubal kuuhal kwa baat, ni ku kudimushangan, ni ku kulongweesh.” Pool uleebel cikwaabw neey: “Bwaal hawiikal ulong naak, wiikuukuuloh uw mwiin, ukuuloh ni boos bumvumvw malongweesh miibuh.” (1 Tim. 4:13, 16, NWT) Udy ni musah ukuukuuloh baat wa kwiibadiil. Nook, bidy ni buseeb bwiibuh kwiikashishomw bwiibuh kulengej mushind iibuh wa ku bal ni wa kulongweesh. Broshiir oow i mulong bwa kukwambulwiish bwiibuh kulong naak. Tal yimw ya ku myand yidyomw:

Yehow i yiy ‘Mulongweesh Mutam.’ (Ye. 30:20) Hady broshiir oow wiiy kukwambulwiish bwa kulengej mushind iibuh wa kubal ni wa kulongweesh, kuvulaminoh bend neey Yehow i yiy mwiin musah utwambambil baat ni i yiy wiibakookok kudyey. (Jah 6:44) Nook iikal usambil bwiibuh kuhet spirit mujilang. Iikal ni ciibidil cya kukal mudimw ni diiy dya Mawej. Long bwa kutum meej ma baat kudy Yehow ki kaay kuwudy. Iikashishomw bwa kuteng micim ya bakukuukun mat bwa kukatobw Yehow bikasakan.

Tukuloolomb bwa kudiil baat musah udy ni buseeb buvul oow waakady kay muwaakanyin baat. Tudy bajaadik neey, uw mweeyelel ‘ku bukash bwiitwaakaakish Mawej’ wiiyiiy kulong mudimw oow bilengel.—1 Py. 4:11.

Biin-kween balongweesh neeb,

Kasumbw Kaludik ka Baatemw ba Yehow