Mawej ulongolweel twiikulwiil twa Abraham bwa ney tulong cis cyaakaabumw, ni kwiicyaakishey mikenj. Kubiikaney cis eecy ney: “Izaleel”, kwiicylongey bwa ney ciikal cyaab cya kuhambidil Mawej a biin-biin ni cya kulaminoh Diiy dindiy. (Musambw 147:19, 20) Nook, bwa ha mut ha Izaleel bis byoos bya ha bulab byaakady mwa kuhet musangal.​—Bal Bwanjil 22:18.

Mawej waakady munoonoh biin Izaleel bwa ney biikal baakajaady eeny batemw bindiy. Myand yaakady yiilongekel biin Izaleel yileeleej ney, hakadyobw bakooyel ku mikenj ya Mawej baakady bahet dyaakalengel. (May Mumbulul 4:6) Nook, bis bikwaabw byaakady mwa kumanyik Mawej a biin-biin ha kuhicil kudy biin Izaleel.​—Bal Yeshaay 43:10, 12.

Kuunyim kwa mafuk, Izaleel ujiimbajil dyaakalengel dyaakadyey naady dya kwiikal cis cya Mawej, ki Yehowah kuhingish hamut hindiy cisumbw cya biin Krist. (Matewus 21:43; 23:37, 38) Nook, leeloow Mawej i munoonoh biin Krist ba biin-biin bwa ney biikal batemw bindiy ha cyaab cya biin Izaleel.​—Bal Myand yilongel 15:14, 17.

Yeez waakady mulongolol biiyij bindiy bwa kuyij ni kwaalabul baat ba bis byoos bwa ney bashaal biiyij bindiy. (Matewus 10:7, 11; 24:14; 28:19, 20) Mudimw oow wendend ni kuwaakan mu mafuk miitut aam, ma kubulekeel bwa biit byoos. Bwa cikuuk cya kuuhal, Yehowah i mukongakany miliyo ya baat ba mu bis byoos mu citendeleel cya biin-biin ha bulab. (Myand yisokolweel 7:9, 10) Biin Krist ba biin-biin i biibalongolol bwa kukashishangan ku micim ni kukwanjanganok. Badyaakal ni program aakaabumw a kulongw myand ya mu Bibl mu bisangil byaababw ha bulab butuutul.​—Bal Ebreh 10:24, 25.

Ha mivw ya 1870, kasumbw kakeeh ka baloony ba Bibl katangil kuhet malongweesh ma biin-biin ma mu Bibl maakady mend ni kujimban. Bajiingunwiin ney: Yeez waakady mulongolol ciisumbw cya biin Krist bwa ney ciikal ciiyij; nook ki kutangobw kudiil baat ba ha bulab butuutul musah mulengel a Bukaleng. Mu muvw a 1931, kwangatobw diijin dya Batemw ba Yehowah.​—Bal Myand yilongel 1:8; 2:1, 4; 5:42.

Ha mivw lukam ya kuuhal, kasumbw kalombody i kak kaakady kalombol bisumbw bya biin Krist. Kasumbw aak kaakady kiitabij ney, Yeez i yiy fumw a cisumbw cya biin Krist. (Myand yilongel 16:4, 5) Byaakaabumw, leelow Batemw ba Yehowah ba ha bulab butuutul i balombol kudy kasumbw kalombody. Kasumbw aak i kalong ni bakul bakaady bataltal myand. Kadyaakal kalombol midimw yoos yiloolongek mu biro bya Batemw ba Yehowah mudyobw baalabul, bahatul ni baabany mikand ya kulongw naay Bibl mu bileebel bifik ku 700. Nook, kasumbw kalombody i kak katwaatwaal mibel ni mikenj ya mu Bibl bwa kukashish ni kulombol bisumbw bihit ha 100 000 bidy ha bulab butuutul. Mu cisumbw cyoos mudyaakal baan-balum bady bakumbaj myand kaahand yidyobw biibalomb, biibabiibiikan ney: bakul eeny balam. Baat aab, balaalam mikook ya Mawej ni lukat loos.​—Bal 1 Pyeel 5:2, 3.

Batemw ba Yehowah i biibalongolol bwa kudiil baat musah mulengel ni kwaalabul baat bwa ney bashaal biiyij ba Yeez. Teng na Bapostol, tudyaakal tuyij baat ku nzubw ni ku nzubw. (Myand yilongel 20:20) Tudyaakal cikwaabw tulomb baat bady bakat myand ya Mawej ni mucim aakaabuwm bwa kulongw naabw Bibl. Batemw ba Yehowah kabiish teng bulongolody kaahand. Kady tudy mu cisak cidy ni Taat mulengel udy ni lukat luvul. Tudyaakal baan ba muut, tukwanjanganok muut ni muut. (2 Tesalonik 1:3) Bu mudyobw biibalongolol bwa kusangaj Mawej ni kukwanjok baat bakwaabw, biin Krist ba biin-biin baloolong cisak cidy ni musangal imwiin weeh ha bulab.​—Bal Musambw 33:12; Myand yilongel 20:35.