DILONGWEESH 8
Bwabiny Mawej i mulek makeng ni myand yibiih yend ni kutungunuk?
1. Mushind kaay utangil myand yibiih?
Mawej i mulek baat biilombol kayaabw mu mafuk mavul bwa kutalobw ney kabiish mwa kuman makeng ha bulab
Myand yibiih yitangil ha bulab haleebel sataan makos ma kuuhal. Hamuhangil Mawej, sataan waakady Mwanjel muwaakan, kaakadyoh bend ni bubiih ning bwaakaabumw; kady, “kaakadyoh bend muneemeneen mu myand ya biin-biin.” (Jah 8:44) Waalakeen kuhambidil kudy kuwaakanyin teng Mawej kayeend. Ki yiy kudiingomw Eev, ni kukaamey bwa ney afik ku kumukooyel yiy hamut ha kukooyel Mawej. Adam ulondel mu diikas dya Eev, waakufwaabeel byeend Mawej. Bwaal bwaakady Adam mulong oobw, i bwiitukaamin makeng ni lufw.—Bal Bwanjil 3:1-6, 19.
Haakady Sataan mufikij Eev ku kufwaabeel Mawej, waakady ulwiish bufumw bwa Mawej. Baat bavul baloolond mu diikas dya Sataan bwaal baleelek bwa Mawej kwiibalombol. Ki mudy Sataan mufik kukwiikal “mukaleng a bulab oobw.”—Bal Jah 14:30; 1 Jah 5:19.
2. Mawej waakadyok muhang baat bibiih eeny?
Biit byoos bihangil Mawej byaakady biwaakan. Uhangil baat ni banjel bawaakan mwa kukooyel ku mikenj yindiy. (May Mumbulul 32:4, 5) Mawej i mwiitwaakish ciheel cya kwiisungwiil mwa kulong myand yilengel eeny yibiih. Ciheel eecy ciitwaatwaakish mushind iitut kuleej mutudy bakat Mawej.—Bal Jak 1:13-15; 1 Jah 5:3.
3. Bwabiny Mawej i mulek makeng mend ni kutungunuk teng ni leeloow?
Yehowah i mulek baat bakufwaabeel bufumw bwiidiy bwa ciilung kahand. Bwabiny? Bwa kuleej ney yiy kay mulombol baat, byoos bidyobw balong bidy teng bya bituh. (Muleej 7:29; 8:9) Cilumbw citaataal bufumw i cih kayaacy mukacy mwa mivw 6 000 yidy baat biilombol kayaabw, bwaal mbulmatady ya baat i yiikaakal bwa kuman diivit, cikis, kabow ni mabeej.—Bal Jeremih 10:23; Rom 9:17.
Kukooyesh kwa Mawej kakwiish kufwaanakan ni kukooyeh kwa baat, bwaal Mawej uhaah baat biitaatab bwa ney ikal fumwaabw bulang bwaababw. (Yeshaay 48:17, 18) Yehowah ukaady ha kubutul mbulmatady ya baan ba baat. Teng baat bady bakat bwa ney Mawej ibalombol, i babw biiyiiy kushikat ha bulab.—Yeshaay 11:9;Bal Danyel 2:44.
Leej video Bwa biny Mawej I mulek makeng?
4. Kutuukij kwa Mawej kukwaakwanjok baat ku biny?
Sataan uleebel ney kaakwiish muut udy mwa kukadyl Mawej mudimw teng bwaal i mumukat cya biin-biin. Udyok mwa kuleej ney bwaal oobw i bwa makos eeny? Ing! Kutuukij kwa Mawej kuheehetej muut woos mushind a kuleejey ney, i mukat bufumw bwiindiy eeny bwa baat. Myand yituloolong i yiy yileeleej bufumw butudy bakat.—Bal Yoobw 1:8-12; Tusumw 27:11.
5. Mushind kaay utudy mwa kuleej ney tudy banoonoh Mawej bwa kwiikaley fumweet?
Myand yitudy bakat bwa kulong yileeleej ney tudy bakat bwa ney Mawej ikal fumweet
Tudy mwa kunoonoh Mawej bwa ikal fumweet ha kukaam ni kulong myand ya citendeleel cya biin-biin cidy cineemeneen mu Bibl, Diiy dya Mawej. (Jah 4:23) Tuleeleej ney kaatwiish bakat bwa ney Sataan itulombol, hatuleelek kutweelakan mu myand ya ha bulab eeny ya cidiidy ni mu diivit, teng mulongel Yeez.—Bal Jah 17:14.
Sataan ukaakal mudimw ni buloh bwiindiy bwa kufikij baat ku kutal myand yibiih ni masandy ney i yilengel. Hatuleelek mwa kulong myand eey, balund ni balel neet bakwaabw bady mwa kwiitusek eeny kwiitulwiish. (1 Pyeel 4:3, 4) Diib dya nook, i didy ditudy mwa kunoonoh ciitut kulong. Tudyok mwa kulamat baat bady bakat Mawej eeny? Tudyok mwa kukooyel ku mikenj ya Mawej yileeleej mudyey ni meej ni lukat eeny? Tut balong nook, twiiyiiy kuleej ney Sataan i mwiin makos haleebeley ney muut ning waakaabumw kiish mwa kukooyel Mawej hadyey ni makeng.—Bal 1 Korent 6:9, 10; 15:33.
Mushind udy Mawej mukat baat uleeleej ney makeng ni myand yibiih yiiyiiy kujimban. Baat baleeleej ney, i biitabij bwaal oobw, biiyiiy kuhet buumy bwa mwendelel ha bulab.—Bal Jah 3:16.
