Mu citendeleel cyoos mudyaakal baat ba micim itook. Musah mulengel uleeleeb ney: Mawej wiibataatal ni wiitaatacish bwaababw. Hayibiby naabw, baat badyaakal bakal mudimw ni citendeleel bwa kulong myand teng yibiih. (2 Korent 4:3, 4; 11:13-15) Teng mudyaakalobw baleeb ku bisanj ni mu biibijbij, bitendeleel bivul i bitweelakan mu myand ya cikis, mu kuzuhangan, mu diivit ni mu kwend masandy ni baan batofw. Baat bady bakat Mawej ni mucim aakaabumw baheehet kaakunying hataatalobw myand eey.​—Bal Matewus 24:3-5, 11, 12.

Hadyaakal citendeleel cya biin-biin cyakish Mawej lutumb, bitendeleel bya makos bidyaakal bimwaakish kaakunying, bwaal biloolongweesh myand yikiish mu Bibl. Cileejel, biloolongweesh myand ya makos ha bitaatal Mawej ni bafw. Kady Yehowah i mukat bwa ney baat bamanyik myand ya biin-biin habimutaatal.​—Bal Ezekiyeel 18:4; 1 Timoteh 2:3-5.

Bitendeleel bya makos bileeleeb mudyeby bikat Mawej ook bikat bulongolody bwa Sataan kabiishoh bend mwa kudiingomw Mawej. (Jak 4:4) Bibl udyaakal ubiikan bitendeleel byoos bya makos ney: “Babiloon mutam”. Babiloon i cibunj cyaakadyok hakal, mutangiil bitendeleel bya makos kuunyim kwa mvul a muvumby mu mafuk ma Noweh. Mu mafuk makeeh oomw Mawej wiiyiiy kubutul bitendeleel byoos bidiidingomw ni bikaakabish baat.​—Bal Myand yisokolweel 17:1, 2, 5, 16, 17; 18:8.

Kudy musah mukwaab mulengel uleeleeb ney: Yehowah kiishoh bend muvulaminok baat ba micim itook bady bamwangalal mu bitendeleel bya makos bidy ha bulab butuutul. Wendend ni kwiibakongakany hadyey wibalongweesh myand ya biin-biin.​—Bal Mikah 4:2, 5.

Yehowah wiitaatacish bwa baat bady bakat myand yilengel ya biin-biin. Wiibaloolomb bwa ney bahatuk lwang-lwang mu bitendeleel bya makos. Baat bady bakat Mawej, bakaakaam kulek myand yibiih teng bwa kusangaj mucim indiy.​—Bal Myand yisokolweel 18:4.

Mu mivw lukam ya kuuhal, baat ba micim itook biitabijil ni musangal musah mulengel waakadyobw biibaadiil kudy bapostol bwaal baakady bakunok mat. Yehowah waakady mwiibalongweesh mushind muhyaamuhy a kulong myand utwaatwaal musangal, kumanyikobw bwabiny baakady ni buumy, ni kumanyikobw cikwaabw myand yilengel yiiyiiy mu mafuk mady kuuhal ook. Baat aab i biitushiil cileejel cilengel bwaal biitabijil musah mulengel, ni kuteekobw Yehowah ha cyaab cya kuuhal mu myand yaababw yoos.​—Bal 1 Tesalonik 1:8, 9; 2:13.

Yehowah udyaakal ni cisak cindiy ciloong ni biin Krist ba biin-biin. Udyaakal waakomw baat boos bahaahatuk mu bitendeleel bya makos. Yehowah ukubiibiikan. Wuw mwiitabij, wiiyiiy kudy nend bulund, ni utweel mu cisak cyhaacyhy cya baat bady ni lukat ni bahambil Yehowah. Kuunyim, wiiyiiy kuhet buumy bwa mwendelel.​—Bal Mark 10:29, 30; 2 Korent 6:17, 18.

Bitendeleel byoos bya makos bikaady ha kubutuk. I musah mulengel, ki mumw eeny? Ing! Mawej wiiyiiy kukuul bulab butuutul ku makab. Bitendeleel bya makos kabyaakudiingomw eecy kukabulul cikwaabw baat ning bicy. Baat boos biikaakal ni buumy, biiyiiy kukoongakany ni kuhambidil teng Mawej aakaabumw a biin-biin.​—Bal Myand yisokolweel 18:20, 21; 21:3, 4.