DILONGWEESH 4
Yeez Krist i ngany?
1. Uhangil Yeez i ngany?
Ngikadil kaay ya Yeez yaakady yifweej baat habwiih nend?—MATEWUS 11:29; MARKUS 10:13-16.
Yeez kiish mufwanakan neet, bwaal kuuhal kwa kumulelobw ha bulab waakady mushikacil mwiiwul ni nyeet yikiish imweek, yifwaanakan ni ya banjel. (Jah 8:23) Yeez i yiy uhangilobw kudy Mawej kuuhal kwa biit byoos.Waakady mukwanjok taatend bwa kuhang biit bikwaabw byoos. I yiy muut aakaabumw udy Yehowah mwiihangil kaayend, ki bwabiny bamubiibiikan ney “Mwaan a diimung” a Mawej. (Jah 1:14) Yeez waakady ukal mudimw teng na waakutum a Mawej, ki bwabiny bamubiibiikan ney “Diiy.”—Bal Tusumw 8:22, 23, 30; Kolos 1:15, 16.
2. Bwabiny Yeez wiiyil ha bulab?
Mawej waakady mutumw mwaan indiy ha bulab ha kuful buumy bwiindiy mu diiwul ni kwiibuteek mu diifw dya sand mwiin Yuud ukaamanyikil balum, wakadyobw baabiikan ney Mariy. Nook, Yeez kaakadyoh bend ni taatend wa ha bulab oobw. (Luuk 1:30-35) Yeez wiiyil ha bulab bwa myand yisat: (1) Kulongweesh myand ya biin-biin ha bitaatal Mawej, (2) kwiituleej cileejel bwa ney twiikal tulong myand yidy Mawej mukat nang tut ni makeng, ni (3) kutwaal buumy bwindiy bu “cya kukuul nacy baat.”—Bal Matewus 20:28.
3. Bwabiny tukaakaam mulambw a Yeez?
Mulambw a Yeez i mulong teng na ciit cidyobw batwaal bwa kukuuloh muut udyobw bakaam kuzuh. (Cimwang 21:29, 30) Mawej kaakadyoh bend muhang baat bwa ney biikal bafw eeny banunah. Bwabiny tuleeleeb nook? Mawej wambidil muut a kuuhal Adam ney bu yiy mwa kulong cibiibiikan Bibl ney “pekaat,” wiiyiiy kufw. Nook, bu Adam yiy kay mulong pekaat, kaakadyoh bend mwa kufw. (Bwanjil 2:16, 17; 5:5) Teng muleeleeb Bibl, lufw “i lufik” ha bulab bwa hamut ha Adam. Nook, Adam i mukaamin twiikululwiil twiindiy pekaat ni cibaw cya lufw. Ki bwaabingany, tukaakaam mulambw a kwiitukuul nend ku lufw ludy Adam mwiitukaamin.—Bal Rom 5:12; 6:23.
I ngany waakady a kufut mulambw oow bwa kwiitukuul ku lufw? Hafwafw muut, ufuufut teng bwa pekaat yindiy kaayend. Muut ukiish muwaakan ning waakaabumw kiishoh bend mwa kufut bwa pekaat ya muut mukwaabw.—Bal Musambw 49:7-9.
4. Yeez ufwiil bwabiny?
Yeez kiish mufwaanakan neet, bwaal yiy kaakadyoh bend ni bubiih. Ki bwaabingany kaakadyoh bend mwa kufw bwa bubiih bwiindiy bwaal kaakadyoh bend mulong myand yibiih. Kady ufwiil bwa myand yibiih ya baat bakwaabw. Mawej i muleej mudyey mukat baat bikasakan, umb wiitwaakish mwaan indiy bwa kwiitufwiil. Yeez uleejel byend mudyey mwiitukat ha kukooyel taatend, ni kutwaal buumy bwiindiy bwa myand yitut yibiih.—Bal Jah 3:16; Rom 5:18, 19.
Leej video Yeez ufwiil bwabiny?
5. I ciny cyloolong Yeez leeloow?
Hakadyey ha bulab, Yeez waakady ubuk biin mabeej, ubuush bafw, ukuul ni baat baakady bakaam kufw. Nook, Yeez waakady uleej myand yiiyiiyey kulongel baat bakookooyel Mawej mu mafuk miiyiiy. (Matewus 15:30, 31; Jah 5:28) Kuuyim kwa lufw lwa Yeez, Mawej umubushil ni nyeet yikiish imweek. (1 Pyeel 3:18) Kuunyim ushikacil ku ciiludy cya Mawej, mwiimanyin ney Mawej amuteek Mukaleng hamut ha bulab butuutul. (Ebreh 10:12, 13) Leeloow Yeez i Mukaleng mu diiwul, Biiyij bindiy bendend ni kudiil baat ba ha bulab butuutul musah mulengel oow.—Bal Danyel 7:13, 14; Matewus 24:14.
Mu mafuk makeeh oomw Yeez wiiyiiy kukal mudimw ni Bukaleng bwiindiy bwa kuman makeng ni kubutul biimakaakaamish. Baat boos biitaatabij Yeez ni bamukookooyel, biiyiiy kuhet buumy mu paradiz ha bulab.—Bal Musambw 37:9-11.
