Mu cisang cya cihuh cya korona, biin-kweet baan-balum ni baan-bakaj ba mu byaab bikwaabw bya cibunj cya Kong, bataataatameen kuhalal kwa mwanz, ni mavit ma mat mady kamay mah. Filiyal wa Kong (Kinshasa), utaatal mudimw a kudil baat musah mu bibunj bibidy, ulongel mwindiy moos bwa kutwaaley byaakudy bya kunyeet ni bya mu spirit. Utekel Komiteh yitaatal myand ya kwambulwiishangan 57 mu teritwaar windiy woos bwa kukumbajilobw biin-kweet bikaakaamobw. Mu mafuk aam, biin-kweet baan-balum ni baan-bakaj bahit ha 90 000 i bahet byaakudy.

Mu diifuk dya 16 ni 17/4/2020, mvul yikasakan ya muvumby yitohel mu ma provens ma ku Est kwa cibunj cya Kong. Yilongel bwa biin-kweet baan-balum ni baan-bakaj 139 bashiy mazubw maabab ni bakashikat kudy biin-kwaabw biin Krist. Komiteh yitaatal myand ya kwambulwiishangan yitaatacish bwa kwiibakamin byaab bya kushikat bya mafuk ma keeh eecy bwa loos.

Biin-kweet baan-balum ni baan-bakaj batwaadil bya bukish ni mucim aakaabumw bwa kut Komiteh yitaatal myand ya kwambulwiishangan nyam ku mikon. Mu cyaab cikwaabw, bakajaady batwaadil kilo 700 ya makond, ni kilo 400 ya matab ni kilo 220 ya bimen ni matamb.

Ni cikwaabw, bakajaady 60 ba mu cisumbw cya Somé cidy mu kilometel 26 baakidil biin-kweet baan-balum ni baan-bakaj 50 bakady bay lubil balukil ha cyaab cyaakady cilongekel diivit. Ni bibakishil byaakudy teng ni mwaakady komiteh utaatal myand ya kwambulwiishangan mwiiy kwiibakish byaakadyobw naaby diikeng.

Fumw a cisak wa mu Brazzaville, Kapital ka cibunj cya Kong uleeleeb bwa byaakudy biheteley neey: “Shikacil udy mwa kushintuluk musang aakaabumw mutwaakady katuy balang. Naakady ni mudimw mulengel ni baafutok fwalang yikumban, ni tumidimw twaakady mukaj aam ulong, midimw eey, yaakady yitwambulwiish bwa kuhet bitwaakady tukaam. Hafikil KOVID-19, tujimbajil midimw yoos yaakady yituhetesh bitwaakady naaby diikeng. Ki katujimbajiloh bend bulund bwiitut ni Yehow. Cikwaabw, ciisang citwaakady tulang cya kulong hakady byaakudy mwa kuh, Yehow ulongel bwaal kahand bwa kwiitwambulwiish.”

Mwiin-kweet mwaan-mukaj Mbuyi Ester, mukaj a mulufwiil udy mushikacil mu Kinshasa, uleebel ni yiiy byend neey: “Mbayaany i mufw kukady suuny aakaabumw, ni naakady nakaam dyambulwiish menmen. Cishoh bend ni cyaab cya kuhetel binady naaby diikeng ni naady ni baan basat bakudiish. Cisak cyaam kacyanjilah kuhetok byaakudy bivul bitudy mwa kudy mafuk mavul nook. Yehow afwaak!”

Tusaasambil Yehow bwa atungunuk ni kulam biin-kweet baan-balum ni baan-bakaj ni afwiil kis midimw ya kwambulwiishangan yiloolongek. Cikwaabw tudy bimanyin ciisang cikal baat boos mwa kudy byaakudy bikal bulab mwa kuhatul.—Misambw 72:16.