Mu 19/2/2022, Mwiin-kweet Didier Koehler, mwiin mu Komiteh wa Filiyal mu France, umanyishil kuhatuk kwa Bibl—Musah Mulengel mufund kudy Matewus mu cileebel cya Tumaam cya mu France (LSF). Mukand oow udyok kabaak mu Enternet mu jw.org ni mu application JW Library Sign Language. I yiy mukand a kuuhal wa mu Bible—Les Saintes ecritures Traduction du Monde Nouveau udy Batemw ba Yehow bahatul mu cileebel cya Tumaam cya mu France.

Program wa kuhatuk kwa Bibl oow bamutadil ku byaamw kudy baat bat bu ku 1 500. Mu mwiisamb a Mwiin-kweet Koehler umvwiijilomw neey: “Kacy cileebel cya tumaam cya mu France cyaatwaadij, baatumaam bumvumvw musah bilengel. Mushind udyobw bakal mudimw ni cimweekel cya hal, cya mees, ni nyeet bileeleej mudy muut wiiyumvw. Tudy mwa kutal mumvwiij mavul! Ni kumvw biheehel myand ya mu Bibl”

Batemw ba Yehow i balongolol mudimw a kudiil baat musah mu cileebel cya tumaam cya mu France kacy mu muvw a 1 968. Kubutambwiil kwa muvw a 1972, balongel cisumbw cya kuuhal cya cileebel cya tumaam cya mu France mu Paris mu Kartiyeh ka Vincennes, mu France. Ku butambwiil kwa 2002, Kasumbw Kaludik kaakady kitabil Komiteh wa Filiyal wa mu France bwa kulongey biro bya kwaalabwiil cileebel cya Tumaam cya mu France. Mu muvw a 2019 kuuhal kwa cihuh kulongekecy, kasumbw kabaalaalabul cileebel cya Tumaam kayiil ku Betel wa mu Louviers, mu France. Leeloow, kukaady bisumbw 11 bya cileebel cya tumaam ni tusumbw tukeeh 39 mu teritwaar wa filiyal wa mu France.

Mukand a kuuhal wa mu Bibl udyobw balabul mu cileebel cya tumaam i musah mulengel mufund kudy Matewus. Kuunyim biiyiiy kuhatul musah mulengel mufund kudy Jah. Mikand yibidy eey, yiloolond shikacil a Yeez utudy bamanyik bilengel, ni i biyifund mu mushind muheehel udyobw mwa kwiiyaalabul kuhitok mikand yikwaabw ya mu Bibl. Kuuhal kwa kuhatulobw mukand a Matewus, teng bakajaady bakeeh ki bakady mwa kutal verseh yikwaabw mu Bibl mu cileebel cya tumaam cya mu France.

Mwiin-kweet mwaan-mukaj udy kamaam wa mu kasumbw ka balaalabul uleebel neey: “Hanacyaakady mwaan mutof, naakady natal teng kutal bifwaatul bya mu mukand a Muntu mutambe bunene wa katshia ne katshia. Hanatadil mukand a Matewus mu cileebel cya tumaam, naakady navuluk bifwaatul byoos. Bwa musang a kuuhal mu shikacil aam, naakady mumvw musah mulengel bilengel menmen.”

Mwiin mukasumbw ka balaalabul mukwaabw uleebel neey: “Naakady nakaam Bibl wa mu cileebel cya tumaam cya mu France bwa balel baam baakady tumaam. Ki cyaakadyoh bend nalang neey, naakady mwa kwiikal umw wa mu kasumbw kabalaalabul. Mukand a Matewus wa mu cileebel cya tumaam cya mu France i cyaabukish cilengel cyeeh!”

Tudy ni musangal i mwiin weeh bwa kuhatuk kwa mukand wa mu Bibl mu cileebel cya tumaam cya mu France. I cijaadik citam cileeleej neey: Yehow wendend ubikan baat boos bwa ‘kunobw mwanz a buumy wa bukish.’—Myand yisokolweel Jah 22:17.