Omubiiri wethu w’ekihugho kyosi kutsibu-tsibu akasighikawa omo by’esyosente erilhabira omw’ihayo ahathe erikakwa ery’obuli Mwema wa Yehova. a Ehisanduko hy’erithogheryamo hikabya ihine omwa myanya yethu y’erihindaniramo, n’esindi nzira sy’erikolesya wukahayo sine okwa muthahulha wethu omwa Donations. Esyonzira muthina-muthina esy’erikolesya wukahayo sineho nuku omundu asombole ng’aheyo erisighika omubiiri w’ekihugho kyosi, ekithunga, kutse ebyosi bibiri.

 Abema ba Yehova sibalihayo ekighuma ky’omw’ikumi kutse erihayo omuhendo mulebe w’esyosente kutse pasente okwa mingirirye yabu. (2 Abanya Korinto 9:7) Sithuli lhabaya akibo kutse erisaba esyosente abakasa oko mihindano yethu, kandi abakathusondolha sibali saba esyosente okw’abakabatizibawa, okwa biriro, okwa magheni, kutse eyindi mibiiri ey’edini. Ekithunga sikirisondaya esyosente omw’ikolha esyosuburo, emisathu, n’emikonga y’obuli mwaka, kutse ebindi ng’ebyo, kutse erisaba abandi b’esyosente. Sikirilhalhanaya omwatsi wamahayo. (Matayo 6:2-4) Emithahulha yethu n’ebitabu byethu sibirimo eritherera ly’eby’esyosente.

 Obuli kithunga ky’Abema ba Yehova kikahayo eripoti y’esyosente esyo bahereyo obuli kwezi, kandi iyarangwa okwa mihindano. Abakakolha oko by’esyosente omo buli kithunga bakakolha embaririra mughulhu wosi erilhangira bathi esyosente esikahebawayo sikakolesibawa ndeke.—2 Abanya Korinto 8:20, 21.

•   Ehisanduko hy’erithogheryamo: Wangana thogherya omo hisanduko mw’esyosente kutse esyokyeki okwa Bisenge by’Obwami, Ebyumba by’Olhuhindano, kutse oko yindi myanya aho emihindano yethu yikabya.

•   Oko Intaneti: Omo bihugho bingyi, wangana kolesya omuthahulha wethu omwa “Donate to Jehovah’s Witnesses” erihayo omw’ikolesya credit cards, debit cards, bank transfers, n’esindi nzira esy’ekieletroniki. b Abandi Bema bakathwamu ‘eribika ekihande’ obuli kwezi omw’ihayo esyosente omw’ikolesya enguma y’okwa syonzira esi.—1 Abanya Korinto16:2.

•   Erisangwa wathegheka erihithya: Erindi erihayo likayithagha erisangwa wathegheka kutse erikwamana n’ebilhaghiro. Erithegheka ng’eryo lyangana leka iwakolesya ndeke emisolho y’ekihugho kyenyu. Abanene babirighasirwa omw’iminya okwa bihembo by’eriwathikya ebyanga hebwa wukineho kutse wabiholha. Kisi manyisaya ekyaghanda ky’omuthahulha eky’Abema ba Yehova eky’ewenyu eriminya bingyi wamabya wanzire erihayo omw’ikolesya:

  •   esyo account sye bbank

  •   insurance n’esyondegheka sy’abakalhuhuka oko mubiiri

  •   real estate

  •   stocks and bonds

  •   wills and trusts

 Eriminya bingyi okwa syonzira sy’erikolesya wukahayo esiri ewenyu, lebaya okwa intaneti omwa “Donate to Jehovah’s Witnesses.”