Akathunga Akakasondolha ni gurupu nyike y’Abakristayo abakulire bunyakirimu abakaha Abema ba Yehova b’obusondoli omo kihugho kyosi. Omubiiri wabu awithe mighaso ibiri:

•   Bakalebereraya emitheghekere y’erikangirirya eriseghemere oko Biblia erilhabira omwa bitabu, emihindano, n’amasukuru w’Abema ba Yehova.—Luka 12:42.

•   Bak’imanira omubiiri w’ekihugho kyosi ow’Abema ba Yehova omw’isondolha omubiiri wethu w’erithulira kandi bakasondolha emikoleserye y’ebikahebawayo.

 Akathunga Akakasondolha kakakwama eby’erighenderako ebyo ‘abakwenda n’abakulhu e Yerusalemu’ bahiraho omo kighana ky’erimbere, ababya bakakolha erithwamu likulhu busana n’ekithunga kyosi eky’Ekikristayo. (Emibiri 15:2) Ng’abalhume abathaleghulha abo, abali oko Kathunga Akakasondolha si ba basondoli b’ekithunga kyethu. Bakasondaya omo Biblia mw’obusondoli, ibanasi ngoku Yehova Nyamuhanga abirisombolha Yesu Kristo eribya Muthwe w’ekithunga.—1 Abanya Korinto11:3; Abanya Efeso 5:23.

 Abali oko Kathunga Akakasondolha ni Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Mark Sanderson, na David Splane. Bakakolera okwa kyaghanda kyethu kikulhu e Warwick, New York, U.S.A.

 Akathunga Akakasondolha kabirihiraho esyokomite mukagha esikalebereraya emyatsi muthina-muthina ey’omubiiri wethu, kandi obuli mughuma ali okwa komiti nguma kutse esilhabire okw’aho.

•   Ekomiti y’Abasangania: Yikaleberereraya eby’ebilhaghiro n’eryanguha ahawire ebitsinduli, ibakolha oko myatsi eyihambire okw’endereribwa ly’Abema ba Yehova busana n’ebyo bikirirye, n’okwa yindi myatsi eya lhuba-lhuba eyikahamba oko Bema ba Yehova.

•   Ekomiti ye Personnel: Yikaleberereraya emitheghekere y’abanya beteli.

•   Ekomiti ey’eby’Erihulhukya: Yikasondolha erihulhukya n’eribika ebitabu ebiseghemere okwa Biblia n’erihimba emyanya y’erihindanamo, esyo ofisi sy’erihinduliramo, n’ebyaghanda by’omuthahulha.

•   Ekomiti y’Omubiiri: Bakasondolha omubiiri wethu w’erithulha “engulhu yuwene y’Obwami.”—Matayo 24:14.

•   Ekomiti y’eby’Erikangirirya: Yikasondolha emitheghekere y’erikangirirya ery’obunyakirimu erilhabira omwa mihindano, esyosukuru, esyovidiyo esy’erilebya n’esy’erihulikirira.

•   Ekomiti y’eby’Erihandika: Yikasondolha emitheghekere y’erikangirirya ery’obunyakirimu erikabya omo mulingo w’ebiprintingire n’ebiri okwa muthahulha wethu kandi yikaleberereraya omubiiri w’erihindulha.

 Eryongera okwa mubiiri wako erilhabira omwa syokomiti esi, Akathunga Akakasondolha kakahindana haghuma obuli wiki erilebya ebiyithawa by’ekithunga. Omwa mihindano eyi, abali oko kathunga aka bakakanaya okwa bya Masako akabugha, kandi bakasondolibawa n’omulimu abuyirire wa Nyamuhanga, erilhangira bathi bakabya n’erithwamu lighuma.—Emibiri 15:25.

 Ni Bakristayo abayiketherwa abakawathikaya okwa syokomiti esy’Akathunga Akakasondolha. (1 Abanya Korinto 4:2) Bakathoka kandi basi bingyi oko mubiiri owakalebereribawa n’ekomiti eyo babirihirwako, kandi bakahindana oko muhindano wako w’obuli wiki. Nomwakine indi sibali sangira omw’ikolha erithwamu, abawathikya aba bakaha amenge awakakolha n’emyatsi eyihambire okwa mubiiri, ibahira erithwamu ly’esyokomiti ly’omwa mikolere, kandi ibabya ibanemulebya ebikalhwiririramo n’engulha-kulhana. Kandi Akathunga Akakasondolha ka ngana bathuma eribungira balikyethu omo myanya muthina-muthina y’ekihugho kutse eriyalhabya emikania okwa mikonga ng’omuhindano w’omwaka kutse okwa Sukuru ye Gilead yikahwamo.