Abema ba Yehova sibalyibuka ebiro by’amabuthwa kundi thwikirirye ngoku emikonga ng’eyo siyiritsemesaya Nyamuhanga. Nomwakine indi e Biblia siyirikwama kyathanga eryibuka ebiro by’amabuthwa, yikathuwathikaya erighanirya okwa bikulhu-bikulhu ebihambire okwa mikonga eyi neryo ithwayitheghererya amalengekania wa Nyamuhanga kuyo. Thulebaye emyatsi ini eyihambire okwa biro bikulhu n’emisingyi ye Biblia.

1.   Emikonga y’eryibuka ebiro by’amabuthwa yiwithe enzuko y’ekikafiri. Erikwamana na Funk & Wagnalls Standard Dictionary of Folklore, Mythology, and Legend, emikonga eyi yalhua omw’ikirirya indi okwa kiro ky’omundu ky’amabuthwa, “emirimu mibi n’ebindi bikabana akaghisa k’erikolha nabi omundu oyo” kandi “abanywani eribyaho n’erimusunzira ebibuya kikamutheghaya.” Ekitabu Lore of Birthdays kikabugha kithi, kera ebihambire oko mabuthwa w’omundu “ibikayithaghisibawa busana n’eriminya ebikendi syamubyako obuthuku obukasa” erisighikira okwa “by’erilhaghulirya esyongununu esitheyitheghereribawa lhuba.” Ekitabu eki kikongerako kithi “esyokando esikakibawa okwa kiro ky’eryibuka amabuthwa, omo dini yiwe, siwithe akaghalha akathe ka buli kiro ak’erikolera omundu ekyo anzire.”

    Aliwe e Biblia yikathanga eky’erikolesya eby’emajiki, obulhaghu, obukumu, kutse “emyatsi yosi eyiri ng’eyi.” (Eryibuka Ebihano 18:14; Abanya Galatia 5:19-21) Erithwalira haghuma, enzumwa nguma eyaleka Nyamuhanga iniathoghothya omuyi wa kera owe Babeli yabya yithi ab’ikalhani b’omo babya bakakolha eby’erilhaghulirya esyongununu, omulingo w’obulhaghu. (Isaya 47:11-15) Abema ba Yehova sibali sondekanaya enzuko y’obuli murwa; aliwe Amasako akabya akaha esyonzumwa esilhangirikire ng’esyo, sibalisigheghena.

2.   Abakristayo ab’omwa kighana ky’erimbere mubathibuka ebiro by’amabuthwa. The World Book Encyclopedia yikabugha yithi “ibakalhangira eryibuka amabuthwa w’omundu wosi-wosi ng’omurwa w’ekikafiri.” E Biblia yikabugha yithi abakwenda n’abandi abo Yesu akakangiriraya iyuwene-wene mubatsukisya eby’erighenderako ebyo Abakristayo abosi batholere ibakwama.—2 Abanya Tesalonika 3:6.

3.   Omukonga mughuma musa ogho Abakristayo batholere ibibuka, si w’amabuthwa aliwe ni w’olhuholho lhwa Yesu. (Luka 22:17-20) Eki sikitholere kikaswekya, kundi e Biblia yikabugha yithi “ekiro ky’olhuholho kyowene kwilhaba ekiro ky’eributhwa ly’omundu.” (Omugambuli 7:1) Erihika aho engebe yiwe oko kihugho yahwera, Yesu abya iniabiriyikolera erina libuya embere sya Nyamuhanga, erileka ekiro ky’olhuholho lhwiwe kibye kikulhu kwilhaba ekiro ky’eributhwa liwe.—Abaebrania 1:4.

4.   E Biblia siyiriyath’ahulha omughombe wa Nyamuhanga oyuw’ibuka amabuthwa wiwe. Eki sikwama kyabugha buyira, kundi yinemo emikonga ibiri ey’eribuka ebiro by’amabuthwa eyakolhawa n’abandu abathabya bakaramya Nyamuhanga. Aliwe, emikonga ibiri eyo yikanibweko omo nzira eyithuwene.—Enzuko 40:20-22; Mariko 6:21-29.

 Ng’ababuthi abosi ababuya, Abema bakakanganaya abaana babu b’olhwanzo omo mwaka wosi, imwamune eribaha ebihembo n’erisangira nabu omw’iyitsemesya eryuwene. Bakalengaho erikwama eky’erileberyako ekihikene ekya Nyamuhanga, oyukaha mughulhu wosi abaana biwe b’ebibuya. (Matayo 7:11) Abaana b’Abema sibaliyowa nga babulirweko, ngoku ebikabughawa bino bikakanganaya:

•   “Kikatsemesaya erihebwa ekihembo isi wukiyitsulirye.”—Tammy, ow’emyaka 12.

•   “Nomwakine indi sindi hebawa ebihembo okwa kiro ky’amabuthwa waghe, ababuthi baghe bakanyighulira ebihembo okwa bindi biro. Ngatsemera ekyo kundi kikabya isingayitsulirye.”—Gregory, ow’emyaka 11.

•   “Mbwino wukalengekanaya esyodakika ikumi, ehikeki hike, n’olhwimbo byangana ghunza epathe? Wutholere iwasa ewethu iwalhangira epathe eyuwene nga y’eyahi!”—Eric, ow’emyaka 6.