Thukakolha ekya Biblia yikabugha okw’ibuka Ekihulho ky’Omuka eky’Erigholho, ekyasibwa kandi mwa “emeza y’Omukama,” Eryibuka olhuholho lhwa Yesu. (1 Abanya Korinto 11:20) Mbaghane n’ekyo, esyonyikirirya nyingyi n’ebikakolhawa n’esindi dini ebihambire okw’ibuka eri sibiseghemere okwa Biblia.

 Ekighendererwa eky’Ekihulho ky’Omukama eky’Erigholho ly’eryibuka Yesu, erikangania erisima lyethu busana n’ekihongo eky’ahayo busana nethu. (Matayo 20:28; 1 Abanya Korinto 11:24) Ekihulho eki si sakaramento, kutse indi ni mukoro w’edini awangaleka ithwakanganibwa olhukogho kutse erighanyirwa ebibi. a E Biblia yikakangiriraya yithi thwangana ghanyirwa ebibi byethu erilhabira omw’ikirirya Yesu lisa, butsira omw’ikolha omukoro mulebe w’ekidini.​—Abanya Roma 3:25; 1 Yoane 2:1, 2.

 Yesu mwahana abigha biwe athi ibibuka Ekihulho ky’Omukama eky’Erigholho, aliwe Yesu mwathabugha emirundi ey’erikolera mw’ekyo. (Luka 22:19) Abandi bakayowa bathi kitholere ikyabya kikakolhwa obuli kwezi, n’abandi bakakolha ekyo obuli wiki, obuli kiro, mirundi mingyi obuli kiro, kutse mirundi mingyi wamanza. b Aliwe, thulengekanaye okwa syonzumwa esiri ahikwa hano.

 Yesu mwatsukisya Ekihulho ky’Omukama eky’Erigholho oko kiro ky’Erikyuruka eky’Abayuda, neryo amaholha enyuma waho okwa kiro ikya n’ekyo. (Matayo 26:1, 2) Eki sikyasa bwase. Amasako akasosekanaya ekihongo kya Yesu n’ekyana ky’embuli ky’Erikyuruka. (1 Abanya Korinto 5:7, 8) Erikyuruka irikakolhawa murundi mughuma obuli mwaka. (Eriluayo 12:1-6; Abalawi 23:5) Kuthya, Abakristayo ab’erimbere ibak’ibuka olhuholho lhwa Yesu murundi mughuma obuli omwaka, c n’Abema ba Yehova ekyo kya bakanakwama kundi kiseghemere okwa Biblia.

 Eky’erileberyako ekya Yesu ahiraho kikathuwathikaya eriminya emirundi kuthya n’ebiro n’endambi ey’erikoleramu omukonga w’Eryibuka. Mwatsukisya eryibuka eri eryuba lyabirilenga omo kwezi kwa Nisani 14, 33 E.K., erikwamana n’ekalinda y’omwa Biblia. (Matayo 26:18-20, 26) Thukalholha embere erikolha Eryibuka okwa kiro eki obuli mwaka, erikwamana n’emibere y’Abakristayo ab’erimbere.

 Nomwakine indi Nisani 14, 33 E.K. kyabya Kyakathano, ebiro by’erikoleramu omukonga oyo ibyanganabya okwa kiro ky’embaghane eky’ewiki obuli mwaka. Thukaminya erihika ly’ebiro bye Nisani 14 obuli mwaka omw’ikolesya emibere mighumerere ey’eribara eyakolesibawa omwa buthuku bwa Yesu, omwakanya k’erighendera okwa kalinda eya munabwire ey’Ekiyuda. d

 Okwa mukonga muhyaka oyu, Yesu mwakolesya omuggati owathemo kihamya n’evini ey’engulha ebya sighalira okwa kihulho ky’Erikyuruka. (Matayo 26:26-28) Erikwama eky’erileberyako eki, thukakolesaya omuggati owathemo kihamya n’evini ey’engulhu eyithe mw’ekindi kindu, butsira eyisande y’ebinyu kutse evini eya babirihiramo obusihirirye kutse ebindi birungo.

 Awandi madini akakolesaya omuggati owalimo ekihamya, aliwe mughulhu mungyi e Biblia yikakolesaya ekihamya ng’akaminyikalho k’ekibi n’obubi. (Luka 12:1; 1 Abanya Korinto 5:6-8; Abanya Galatia 5:7-9) Busana n’ekyo, omuggati owathemo kihamya n’ebindi birungu w’angabya iniatholere eribya kimisyo ky’omubiri wa Kristo owathemo kibi. (1 Petero 2:22) Ekindi kindu ekyo e Biblia yithe sighika ly’erisubya omo mwanya w’evini mw’eyisanda ey’ebighuma by’ebinyu. Awandi Makanisa akakolha ekyo kundi akaghanaya erinywa obwabu, ekindu ekithe omo Masako.​—1 Timoteo 5:23.

 Omuggati owathemo kihamya n’evini y’engulha ebikabya okw’Ibuka ni biminyisyo, kutse biminyikalho, eby’omubiri wa Kristo n’omusasi wiwe. Sibirihinduka omwa nzira y’ekithiko-thiko eribya mubiri n’omusasi ebyonyine-nyine ng’abandi ku bakalengekanaya. Thulengekanaya okwa syonzumwa hino esiseghemere okwa Masako.

•   Yesu kw’abya imwahana abigha biwe athi banywe omusasi wiwe, angabere iniakababwira athi bathwe ekihano kya Nyamuhanga ekikathanga erirya omusasi. (Enzuko 9:4; Emibiri 15:28, 29) Eki isikyangabya, kundi Yesu isyanga bwira abandi athi bathwe ekihano kya Nyamuhanga ekihambire okwa bubuyirire bw’omusasi.​—Yoane 8:28, 29.

•   Abakwenda ba Yesu sibangabere ibakanywa omusasi wa Yesu owanyine-nyine kundi abya iniakineho. Omusasi wiwe abya isyalyuthika.​—Matayo 26:28.

•   Ekihongo kya Yesu mukyabya “ngendo nguma.” Busana na kera na kera. (Abaebrania 9:25, 26) Aliwe, omuggati n’evini ku byabya imubyahinduka mw’omubiri n’omusasi wiwe okwa mukonga ow’Ekihulho ky’Omukama eky’Erigholho, neryo abakalya n’erinya bangabere ibakasuba omwa kihongo ekyo.

•   Yesu mwabugha athi: ‘Mukole muthya erinyibuka,’ butsira “erinyihonga.”​—1 Abanya Korinto 11:24.

 Abikirirye bathi omuggati n’evini bikahinduka mw’omubiri wa Yesu n’omusasi wiwe ebyonyi-nyine, bakaseghemeraya enyikirirya yabu eyo okwa milhondo mirebe kwa yikabugha. Ng’eky’erileberyako, omwa syombindulha nyingyi esye Biblia, ebinywe bya Yesu mubyahandikwa eribya ng’oyuwabugha okwa vini athi: ‘Oyu ni musasi waghe.’ (Matayo 26:28) Aliwe, ebinywe bya Yesu byangana thasyahindulhwa mwa: “Eyi yikamanyisaya omusasi waghe,” kutse “Eyi yikimanira omusasi waghe.” e Ngoku anabya mubere wiwe, Yesu abya akakangirirya omw’ikolesya eby’erileberyako.​—Matayo 13:34, 35.

 Omughulhu Abema ba Yehova bak’ibuka Ekihulho ky’Omukama eky’Erigholho, abandu bake kutsibu b’abakalya okwa muggati n’erinywa okwa vini. Busana naki kiri kithya?

 Omusasi wa Yesu owuthika mwatsukisya ‘endaghane nyihya-nyihya’ eya suba omo mwanya w’endaghane eyabya ahakathi-kathi ka Nyamuhanga n’ekihanda kye Israeli. (Abaebrania 8:10-13) Abali omwa ndaghane nyihya-nyihya b’abakalya okwa biminyisyo by’okw’Ibuka. Aba mwamuli “ababiribirikirwa” na Nyamuhanga omwa nzira y’embaghane, butsira Abakristayo abosi. (Abaebrania 9:15; Luka 22:20) Aba bakendi syathabalha haghuma na Kristo omwa lhubulha, kandi e Biblia yikabugha yithi abandu 144,000 basa babakahebawa olhusunzo olho.​—Luka 22:28-30; Eribisulirwa 5:9, 10; 14:1, 3.

 Mbaghane ‘n’ekihyo kike’ eky’abo ababiribirikirwa eriyathabalha na Kristo, ekunze n’ekunze y’abandu bawithe amaha w’eribya baghuma b’okwa “endeko nene” y’abandu abakendi syabana engebe y’erikolha okwa kihugho. (Luka 12:32; Eribisulirwa 7:9, 10) Nomwakine indi ithwe thuwithe maha w’erisyabya okwa kihugho sithulirya n’erinywa okwa biminyisyo by’okw’Ibuka, thukasangira okwa mukonga oyu erikangania erisima lyethu busana n’ekihongo ekya Yesu ahayo busana nethu.​—1 Yoane 2:2.