Ababatizibawa ng’Abema ba Yehova aliwe ibabya isibakithulira, obundi nibya ibabirileka erihindana haghuma n’abandi bikirirya balikyabo, abo sithuli bayihighulhako. Erithwalira haghuma, thukabahikako n’erilengaho eribawathikya erisuba-subania obunyakirimu bwabo.

 Sithulilhuaho thukahighitha omundu oyuwabirikolha erilholho erikalire. Aliwe Omwema oyubatizibirwe amakolha mwa mutse wiwe erithwa ebihano bye Biblia kandi akaghana eriyisubamo, omundu oyo thukamuyihighulhako kutse iniahighithwa. E Biblia yikakanganaya ndeke-ndeke yithi: “Omundu mubi oyo, mumuhighe omo ndeko yenyu.”—1 Abanya Korinto 5:13.

 Kandi ibbwa omulhume oyuwabirihighithwa aliwe mukali wiwe n’abaana biwe ibabya ibakine Bema ba Yehova? Erikolongana n’efamile yiwe omo by’edini likahinduka aliwe obuhughu obo awithe nabo bukabya ibuneho. Eby’obutheke n’olhwanzo lhwa buli kiro n’erikolongana ery’omo famile bikalholha embere.

 Abahighithirwe bangana hindana okwa mihindano yethu. Kandi bamanza, bangana bana erihabulha ly’obunyakirimu erilhua okwa basyakulhu b’ekithunga. Ekilhubirirwa ly’eribawathikya erithasyatholera eribya baghuma b’okwa Bema ba Yehova. Ababirihighithwa abakaghana emitse mibi kandi ibakangania erilhua oko muthima ku banzire erighendera okwa bihano bye Biblia mughulhu wosi bak’angirirawa eribya Bema ba Yehova kandi.