Ithwe ng’Abema ba Yehova, thukakolha kutsibu erihimba amaka wethu n’aw’abaliranwa bethu. Thukasikaya Nyamuhanga ng’Omuhangiki oyuwatsukisaya endegheka y’efamile. (Enzuko 2:21-24; Abanya Efeso 3:14, 15) Omwa Biblia, akaha emisingyi eyabiriwathikya abandu omwa kihugho eribya n’amatheke awaghumire kandi awatsemire.

 Thukakolha ngoku thwanga thoka erighendera okw’ihabulha lye Biblia, kundi eki kikathuwathikaya eribya abiba, abakali abathahibwa, n’ababuthi babuya. (Emisyo 31:10-31; Abanya Efeso 5:22–6:4; 1 Timoteo 5:8) Amenge awali omwa Biblia nibya akawathikaya n’amaka awaghabene omwa by’edini. (1 Petero 3:1, 2) Thalengekania okwa bya bughawa n’abathe Bema abo abanze babu babiribya Bema ba Yehova:

•   “Emyaka mukagha y’erimbere-mbere ey’obutheke bwethu ithukabera etoko n’ebinigha. Aliwe erilhua aha mukali waghe Ivete akanathabera Mwema wa Yehova, abiribya mwolho kandi oyukaghumisirizaya. Esyombinduka esyo abirikolha syabirilhamya obutheke bwethu.”​—Clauir, erilhua e Brazil.

•   “Munahakanisya mwira waghe, Chansa, akatsuka erigha e Biblia n’Abema ba Yehova, kundi iningalengekanaya indi bakahimbulha amaka. Erilhwiririra n’aho, nabirilhangira ngoku kwenene e Biblia yabiriwathikya obutheke bwethu.”​—Agness, erilhua e Zambia.

 Omw’ithulira lyethu, thukakanganaya abaliranwa bethu ngoku erighendera okwa menge awali omwa Biblia kyangana bawathikya bikahika okwa

•   Erisombolha ndeke ow’eringira nayu omwa butheke

•   Erisingura omwaka w’erimbere omwa butheke

•   Erikolongana n’abasoni n’ababbonde

•   Emikolesirye y’esyosente

•   Erighunzaho erikakalhukana

•   Erigha erighanyira

•   Erithendeka abaana

 Omo kwenene, ekyo hakanayira ikyabya. Ng’eky’erileberyako, eripoti ey’ekampuni eye Sofres ey’abakasekulhaya eya 1998 muyabugha ngoku obutheke 1 okwa 20 awalimo omwanze mughuma Omwema mwabana ebitsibu ebikalire omwanze oyo akabya Mwema.

 Yesu mwalhaghulha athi okwa bundi buthuku abakakwama esyongangirirya siwe abahughu babu banga baghanire. (Matayo 10:32-36) Ow’ebya kera ya Will Durant akabugha athi omwa Buthabali bwe Roma, “Ekikristayo ekikalhangirawa ng’ekikasambulha amaka,” a kandi n’abandi Bema ba Yehova bakabana ekitsibu ekyo na munabwire. Aliwe, mbwino eki kikamanyisaya kithi Abema ba Yehova babakakolha ekyo?

 Yikakania okwa lhubanza lhw’erihangirira Abema ba Yehova olhw’eribugha indi bakasambulha amaka, Ekoti Ngulhu eye Yuropu ey’Obughabe bw’Abandu muyabugha yithi mughulhu mungyi ab’omw’eka abathe Bema babakalethaho erikakalhukana omw’ighana “eriligha n’erisikya obwiranda bw’abahughu babu obw’erikwama edini yiwe.” Ekoti ngulhu eyo muyongerako yithi: “Emibere eyi yikanyirire omwa maka aw’abaghabene omwa by’edini imwamune n’Abema ba Yehova.” b Aliwe nibya n’omughulhu bakasolholhawa busana n’edini, Abema ba Yehova bakalengaho erighendera okw’ihabulha lye Biblia lino: “Omundu amakukolera ekibi, sumulihe ekibi. . . . Kyamathokekana, oko lhuhandi lhwenyu, mubye n’obuholho oko bandu bosi.”​—Abanya Roma 12:17, 18.

 Abema ba Yehova bakaghendera okwa busondoli bwe Biblia obw’eringira omwa butheke ‘n’Omukristo kwenene,’ ni bugha ambu, eringira omwa butheke n’omundu oyuwithe erikirirya ng’eryabu. (1 Abanya Korinto 7:39) Ekihano eki ni kye Biblia kandi kitholere. Ng’eky’erileberyako, omwatsi owa 2010 omwa Journal of Marriage and Family mwabugha athi “abathahenie abawithe edini nguma, emirwa, n’esyonyikirirya ebisosene” bakabya n’obughuma obuwene kutsibu. c

 Aliwe, Abema sibalihira abali omw’ikirirya lyabu mw’omuhwa w’erighabulhana n’abanze babu abathe Bema. E Biblia yikabugha yithi: “Omulikyethu amabya awithe omukali oyuthikirirye, n’omukali oyo akaligha erikalha nayu, omulhume oyo syamuhighe. Kandi omukali oyuwithe iba oyuthikirirye, n’iba akaligha erikalha nayu omukali oyo sialhuemo.” (1 Abanya Korinto 7:12, 13) Abema ba Yehova bakaghendera okwa kihano eki.