Abema ba Yehova babirikolesya esyombindulha nyingyi sye Biblia omw’igha lyabu lye Biblia. Nomwabine bithya, omwa mibughe eyo yirimu, kutsibu-tsibu bakatsemera e Biblia eya New World Translation of the Holy Scriptures kundi yikakolesaya erina lya Nyamuhanga, yihikire, kandi yikayitheghereribawa.

•   Erikolesya erina lya Nyamuhanga. Abandi bahinduli be Biblia babirilemwa eriha olhukengerwa okwa mwinyeyo. Ng’eky’erileberyako, embindulha nguma ye Biblia yikathondogholha amena w’abandu awalhabire oku 70 abo omwa nzira ndebe bahiraho akaghalha k’erihindulhayo. Aliwe kandi e Biblia eyi iyabya isiyirimo nahake erina ly’Omwinyeyo​—Yehova Nyamuhanga!

   Erithendibya ng’esindi mbindulha, e New World Translation yikasubaya erina lya Nyamuhanga omo myanya mingyi aho litholere eribya omwa masako w’erimbere, nibya n’amena w’abali okwa komiti y’abahindulhayo isyasibwe.

•   Yihikire. Si bugha indi esyombindulha esyosi sikaha omwatsi owahikire ow’amasako w’erimbere-mbere awe Biblia. Ng’eky’erileberyako, embindulha nguma yikabugha yithya omu Matayo 5:22: “Oyukabugha athi, Iwe mukiru! Asyabya n’omusango w’eriya omo muliro w’Ekulimu.” Aliwe amasako w’erimbere mwakolesya ekinywe “Gehena,” butsira “omuliro w’Ekulimu.” Obundi abahinduli bahiraho ekinywe “omuliro w’Ekulimu” kundi babya bikirirye bathi ababi bakendi syaghalibwa kera na kera omwa muliro. Aliwe amalengekania ayo syali omwa Biblia. Busana n’ekyo, e New World Translation yikabugha ndeke yithi: “Oyukabugha athi, ‘Iwe mukiru mbulha mughaso, akendi syabya iniatholere erighuswa omwa Gehena.”

•   Eriyitheghereribwa. Embindulha ye Biblia eyuwene yitholere iyabya iyihikire kandi iyolhobire eriyitheghereribwa. Thuthaha eky’erileberyako. Abanya Roma 12:11, omukwenda Paulo mwakolesya ekinywe indi kyamahindulhwa ngoku kine kikamanyisaya “okwa mulimu eribera.” Kundi ekinywe ekyo si kyanga yitheghereribwa omwa Lhusungu olhwa munabwire, omwa New World Translation erisako eri lirimo omwa nzira eyolhobire eriyitheghereribwa. Likabugha okwa Bakristayo lithi “omulimu abahe omuhwa munene.”

 Eryongera okw’ikolesya erina lya Nyamuhanga, eribya iyihikire, kandi iyikayitheghereribawa, hane ekindi kindu ekihambire okwa New World Translation: Yikaghabawa ahathe erithuha. Busana n’ekyo, esyomiliyoni sy’abandu babirithoka erisoma e Biblia omwa mubughe wabu​—nibya n’abathe banga thoka eriyighulira e Biblia.