• Abema ba Yehova bakaminya bathi ekiro kikulhu kirebe nga kinalighirwe?

• Mbwino Abema ba Yehova, abathesangira omwa biro bikulhu birebe, bakanabya ibakinanzire esyofamile syabu?

• Mbwino Abema ba Yehova bakabwira abandi bathi sibasangire omwa biro bikulhu birebe?

 Bathe bathwamu nga banasangire omwa kiro kikulhu kirebe, Abema ba Yehova bakatsuka erilebya e Biblia nga yikabugha yithiki. Ebindi biro bikulhu n’emikonga bikathwa emisingyi ye Biblia. Omughulhu kiri kithya, Abema ba Yehova sibalisangira mukyo. Bikahika okwa bindi biro bikulhu, obuli Mwema akayithwiramo, erilengaho eribya “n’obunyamuthima-thima bubuya, embere sya Nyamuhanga, n’embere sy’abandu.”—Emibiri 24:16.

 Hano hane ebighuma by’okwa bibulyo ebyo Abema ba Yehova bakayibulhaya bakathwamu nga banasangire omwa kiro kikulhu kirebe. a

•   Mbwino ekiro kikulhu eki kiseghemere oko ngangirirya eyithe omo masako?

   Omusingyi we Biblia: ‘Omukama akabugha athi, Mulhue omo kathi-kathi kabo, muyisolhole. Kandi simuthule oko kindu ekithisirire.’—2 Abanya Korinto 6:15-17.

   Erithoka eriyisolholha kutse eriyighabulira ighuma okwa syongangirirya esikinire bunyakirimu, ni bugha ambu, esihukene n’ebya Biblia yikabugha, Abema ba Yehova sibali sangira omo biro bikulhu ebiri mw’ebindu bino.

   Ebiro bikulhu ebyo enzuko yabyo yilhuire omwa nyikirirya kutse eriramya ery’esindi nyamuhanga. Yesu mwabugha athi: “Wasyaramya Omukama Nyamuhanga wawu, kandi wasyamukolera iyuwene.” (Matayo 4:10) Erikwamana n’ekihano ekyo, Abema ba Yehova sibalisangira omwa Krisimasi, e Ista, kutse Ekiro kikulhu ky’Abakoli, kundi ebiro bikulhu ebi biwithe nzuko omw’iramya ly’esyonyamuhanga butsira Yehova. Eryongera okw’ekyo, sibali sangira omwa biro bikulhu nga bino.

  •  Kwanzaa. Erina Kwanzaa “likalhua omwa binywe bye Swahili matunda ya kwanza, ebikamanyisaya ‘ebighuma by’erimbere-mbere’ kandi [eki] kikakanganaya enzuko y’ekiro kikulhu ekyo omwa mikonga y’erihulhulha ey’erimbere-mbere eyikanibweko omwa bya kera ebihambire okw’Abaafrika.” (Encyclopedia of Black Studies) Nomwakine indi abandi bakalhangira e Kwanzaa ng’ekiro kikulhu ekithe ky’edini, e Encyclopedia of African Religion yikakilinganisaya omukonga w’Abaafrika omo ebighuma by’erimbere-mbere “bikahebawayo erisima esyonyamuhanga n’abasokulhu,” kikongerako kithi: “Kandi omuthima iwa n’oyo ow’erisima emighisa y’engebe eyo abasokulhu bakaha akaleka Abaafrika abali e America ibaminya ngoku ekiro kikulhu kye Kwanzaa kyamahika.”

  •  Mid-Autumn Festival. Eki ni “kiro kikulhu ekikaha nyamuhanga w’okwezi ow’obukali y’ekitsumbi.” (Holidays, Festivals, and Celebrations of the World Dictionary) Mwamuli omurwa ogho “abakali bakunama embere sy’enyamuhanga y’obukali eyo, omurwa ogho omwa Lhuchaina akahulhawamo kowtow.”—Religions of the World—A Comprehensive Encyclopedia of Beliefs and Practices.

  •  Nauruz (Nowruz). “Ebindi biro bikulhu enzuko yabyo yakera yilhuire omwa dini ye Kizoroastria kandi ni bighuma by’okwa biro bikulhu ebibuyirire kutse ebiri okwa kalenda eyakera ey’Abanya Zoroastria . . . . Kwilhabirirya, Ekirimu kya Noon, ekyasibwemo [Rapithwin], ekyakanibawako ng’ekyo Ekirimu kya Winter kyalhusaya omwa kithaka omwa buthuku bw’amezi w’ekihuhiriro, mukyathangirirwa okwa mikonga y’erithungyi oko kiro kya Nowruz erikwamana n’emirwa y’Abanya Zoroastria.”—United Nations Educational, Scientific and Cultural Organization.

  •  Shab-e Yalda. Omukonga oyu owe winter solstice “ahathe erithika-thika ahambene n’eriramya Mithra,” enyamuhanga y’ekyakakalha, erikwamana n’ekitabu Sufism in the Secret History of Persia. Kandi kyabiribuwa indi ekiro kikulhu eki kyanganabya ikihambene n’eriramya ly’esyonyamuhanga sy’eryuba esy’Abaroma n’Abagiriki. b

  •  Eriha ewasingya. Nge Kwanzaa, ekiro kikulhu eki kiwithe enzuko omo mikongo eyakera ey’erihulhulha eyabya yikasikya esyonyamuhanga muthina-muthina. Ahabw’obuthuku, “emirwa eya kera eyasibwe eyi muyingira omo kanisa y’Ekikristayo.”—A Great and Godly Adventure—The Pilgrims and the Myth of the First Thanksgiving.

   Ebiro bikulhu ebiseghemere okwa bihaniriro kutse erikirirya omwa bbahati. E Biblia yikabugha yithi “abakatheghekaniraya enyamuhanga y’eby’Ebbahati Mbuya y’emeza” ni “baghuma b’okwa bakasighanaya Yehova.” (Isaya 65:11, NWT) Busana n’ekyo, Abema ba Yehova sibalyibuka ebiro bikulhu bino:

  •  Ivan Kupala. “Erikwamana n’enyikirirya eyasibwe, okwa kiro kye [Ivan Kupala] obuhangwa bukahulhukaya amaaka wabo aw’emajiki kandi wamabya iwuli muthubaha kandi ow’ebbahati wangana thunga okwa maaka ayo,” ekitabu The A to Z of Belarus kithya. Okw’itsuka, omukonga oyu abya w’abakafiri kandi abya akakolhwa ekiro erithungyi ni liri okw’ithumbi. Aliwe, Encyclopedia of Contemporary Russian Culture yikabugha yithi, “abakafiri babere babiriligha eribya Bakristayo, ekiro kikulhu ky’abakafiri ekyo mukyayungwa haghuma n’ekiro kikulhu ky’Ekanisa eky’eryibuka Yoane Mubatizya.”

  •  Lunar New Year (Chinese New Year or Korean New Year). “Oko buthuku obu omo mwaka kwilhaba obundi buthuku bwosi-bwosi, ebilhubirirwa bikulhu by’efamile, abanywani, n’abahughu ly’erisunzirana ebbahati mbuya, erisikya esyonyamuhanga n’emirimu, erisunzirana emighisa omo mwaka owakasa.” (Mooncakes and Hungry Ghosts—Festivals of China) Omo nzira iya n’eyo, e Korean New Year “muli eriramya abasokulhu, emirwa y’erithibitha okwa mirimu mibi n’erisunzirana ebbahati mbuya omo Mwaka Muhyaka, n’ekiminyikalho [obulhaghuli] ky’eriminya ebikendi syabya omo Mwaka Muhyaka.”—Encyclopedia of New Year’s Holidays Worldwide.

   Ebiro bikulhu ebiseghemere okw’amalengekania w’eribugha indi omundu alimu akalimu akatheholha. E Biblia yikakanganaya ndeke-ndeke ngoku ekirimu kikaholha. (Ezekieli 18:4) Busana n’ekyo, Abema ba Yehova sibalisangira omo biro bikulhu ebiri ahikwa hano, ebikakulha-kulhanaya enyikirirya y’akalimu akatheholha:

  •  All Souls’ Day (Day of the Dead). Eki ni kiro “ky’eryibuka abosi abathaleghulha ababiriholha,” erikwamana na New Catholic Encyclopedia. “Eritsuka 500 E.K erihika ng’omwa 1500 E.K enyikirirya eyabya yasibwe iyikabugha yithi okwa kiro ekyo abandu abali omwa buligatuli ibanganahika okwa bandu ababasoberaya ibakineho, ibabiribya ng’emirimu, abalhaghuli, ebikere, n’ebindi.”

  •  Qingming Festival (Ch’ing Ming) na Hungry Ghost Festival. Emikonga ibiri eyi yikakolhawa erisikya abasokulhu. Ekitabu Celebrating Life Customs Around the World—From Baby Showers to Funerals, kikabugha kithi okwa kiro kye Ch’ing Ming “ebyalya, eby’erinywa, n’esyosente sy’ebipapura bikahisibawa nuku abaholi sibakwe nzalha kutse enyotha kandi sibabye butsira esyosente.” Kandi ekitabu eki kikabugha kithi “omwa buthuku bwe Hungry Ghost Month, kutsibu-tsibu omw’ithumbi okwezi ikune kighoma, [abakibuka ekiro eki bikirirye] bathi hali erikolongana linene ahakathi-kathi k’abaholi n’abaliho kwilhaba erindi ithumbi lyosi-lyosi, neryo kwesi ni kikulhu eriyitheya okw’ihithania abaholi kuthya n’erisikya abasokulhu.”

  •  Chuseok. Ekitabu The Korean Tradition of Religion, Society, and Ethics kikabugha kithi omukonga oyu mwamuli “eriha abaholi b’ebyalya n’evini.” Ekyo kikakanganaya “erikirirya ngoku akalimu kakabya ikakineho enyuma w’omundu eriholha.”

   Ebiro bikulhu ebihambene n’eby’obukumu. E Biblia yikabugha yithi: “Simusyebanika ko mundu oyukalhabaya mughalha wiwe kutse mwali wiwe omo muliro, n’oyukakolha obulhaghu, oyukalhaghuliraya ebithu, kutse omukumu, kutse omulhoyi, kutse omusaki, kutse oyukakanaya n’abalimu, n’omukumu, n’oyukabirikira abaholi.  . . n’inye oko Mwami Mukulhu.” (Eryibuka Ebihano 18:10-12) Erithoka eriyihighulha okwa by’obukumu ebyosi-byosi—imwamune n’erilhaghulirya esyongununu (omulingo w’obulhaghu)—Abema ba Yehova sibalyibuka e Halloween kutse ebiro bikulhu bino:

  •  Sinhala na Tamil New Year. “Emirwa eyihambene n’omukonga oyu. . . muli erikolha emibiiri mirebe okwa buthuku obo abakalhaghuliraya esyongununu babirilhaghulha.”—Encyclopedia of Sri Lanka.

  •  Songkran. Erina ly’omukonga we Asia oyu “lilhuire omwa kinywe Sanskrit . . . ekikamanyisaya ‘erighenda’ kutse ‘embinduka,’ kandi [omukonga] akakanganaya erighenda ly’eryuba omwa gurupu y’esyongununu esya zodiac.”—Food, Feasts, and Faith—An Encyclopedia of Food Culture in World Religions.

   Ebiro bikulhu ebihambene n’eriramya ery’omwa Mighambo ya Musa, eyahwaho busana n’ekihongo kya Yesu. E Biblia yikabugha yithi: “Kristo abiriberererya Emighambo.” (Abanya Roma 10:4) Abakristayo bakinaghasirawa omo misingyi eyiri omwa Mighambo ya Musa eyahebawa Abaisraeli kera. Aliwe, sibali sangira omwa mikonga yayo, kwilhabirirya emikonga eyikakanganaya Masiya ng’oyukendi syasa oyo Abakristayo bikirirye bathi abiryasa. E Biblia yikabugha yithi; “Emyatsi eyi ni kitsutsu ky’ebyo ebikendi syasa. Nikwa eby’ekwenene ni Kristo.” (Abanya Kolosai 2:17) Erikwamana n’ebyamabirikanibwako, kandi kundi omwa bindi biro bikulhu muli emirwa eyithaseghemere oko masako, ebiro bikulhu ebiri ahikwa hano ni bighuma by’okwa ebyo Abema ba Yehova bathesangiramo:

  •  Hanukkah. Ekiro kikulhu eki n’ibuka ly’erithasyahebwayo lye hekalu y’Abayuda e Yerusalemu. Aliwe, e Biblia yikabugha yithi Yesu mwabya Muhereri Mukulhu “akakolha omo hema [kutse, ehekalu] nene kwilhaba eyindi, eyihikene kwilhaba. Ni Hema eyithalhukawa n’ebyalha by’abandu, kandi si y’erihangika ly’ekihugho kino.” (Abaebrania 9:11) Okwa Bakristayo, ehekalu y’obunyakirimu eyo muyasuba omo mwanya w’ehekalu yonyine-nyine eyabya e Yerusalemu.

  •  Rosh Hashanah. Eki ky’ekiro ky’erimbere omo mwaka w’Abayuda. Kera, omukonga oyu imukabya erihayo obuhere bw’embaghane oku Nyamuhanga. (Emiganzo 29:1-6) Aliwe, Yesu Kristo, nga Masiya, ‘mwatsirisya ehongo n’obuhere,’ erileka ibyabya isibikiri by’omughaso embere sya Nyamuhanga.—Danieli 9:26, 27.

•   Mbwino ekiro kikulhu eki kikakulha-kulhanaya eky’amadini eriramya haghuma?

   Omusingyi we Biblia: “Oyuwikirirye angana sangira haghuma n’oyuthikirirye kwehi? Ehekalu ya Nyamuhanga yangana sakana n’esyosanamu kwehi?”—2 Abanya Korinto 6:15-17.

   Nomwakine indi Abema ba Yehova bakalengaho eribya buholho n’abaliranwa babu kandi bakasikaya obughabe bw’obuli mundu obw’erithwamu ebyo akendi kirirya, bakayihighulha okwa biro bikulhu ebikakulha-kulhanaya eky’amadini eriramya haghuma ng’ebiri ahikwa hano.

   Ebiro bikulhu eby’eryibuka abakulhu b’edini kutse emikonga eyikahira omwa bandu b’amadini muthina-muthina mw’omuhwa w’eriramirya haghuma. Nyamuhanga abere akasondolha abandu biwe kera omwa kihugho kihyaka ekyabyamo abandu ababya bawithe awandi madini, mwababwira athi: “Simusyesakana nabo kutse n’esyonyamuhanga syabo. . . Mwamakolera esyonyamuhanga syabo, kwenene kyasyabya kithegho kwiwe.” (Eriluayo 23: 32, 33) Busana n’ekyo, Abema ba Yehova sibali sangira omwa biro bikulhu bino.

  •  Loy Krathong. Omwa buthuku bw’omukonga we Thai oyu, “abandu bakakolha ehibbakuli hy’omwa ebithi, ibongeramo ehikando kutse ehithi y’obukwa, neryo ibahira ehibbakuli hy’okwa maghetse. Kikabughawa indi amathu akathwalha erithendibya n’ebbahati. Erithwalira haghuma, ekiro kikulhu eki n’ibuka olhughobe olhubuyirire olhwa Buddha.”—Encyclopedia of Buddhism.

  •  National Repentance Day. Erikwamana n’ebya omuthabali w’egavumente abugha omwa olhupapura lhw’amakuru olhwa The National olhwe Papua New Guinea, abakasangira omwa mukonga oyu “bakaligha ebilhaghiro by’erikirirya ly’Ekikristayo.” Akabugha athi ekiro eki ni “nzuko y’emisingyi y’Ekikristayo ey’erihanga.”

  •  Vesak. “Eki ni kiro ekibuyirire kutsibu okwa ebiro ebibuyirire eby’Ababbuda, eryibuka amabuthwa wa Buddha, engulha-kulhana, n’olhuholho, kutse eribana Nirvana (obuholho n’etseme ebihikene).”—Holidays, Festivals, and Celebrations of the World Dictionary.

   Ebiro bikulhu ebiseghemere okwa mirwa y’edini ebyo e Biblia yithe ligha. Yesu mwabwira abakulhu b’edini athi: “Mukapona ekinywe kya Nyamuhanga busana n’erikwama emitse yenyu.” Kandi mwabakaniako athi eriramya lyabu ni nubira busa kundi bakakangiriraya “amahano w’abandu nga ni mahamulho wa Nyamuhanga.” (Matayo 15:6, 9) Kundi bakaghendera okw’ikunga eri, hali emikonga mingyi y’edini eyo Abema ba Yehova bathesangiramo.

  •  Epiphany (Three Kings’ Day, Timkat, kutse Los Reyes Magos). Abakasangira omwa kiro kikulhu eki bak’ibuka ekiro abalhaghuli b’esyongununu babungira Yesu kutse eribatizibwa lya Yesu. Omukonga oyu “akaleka ebiro bikulhu birebe eby’ekikafiri ibyabya nga ni by’Ekikristayo, ebikasikaya esyonyamuhanga sy’amaghetse awakasenda, esyonyusi, n’emighende.” (The Christmas Encyclopedia) Timkat, omukonga owahambene n’ekiro kikulhu eki, “awithe enzuko omwa mirwa y’abandu.”—Encyclopedia of Society and Culture in the Ancient World.

  •  Feast of the Assumption of the Virgin Mary. Ekiro kikulhu eki n’ibuka enyikirirya y’eribugha indi mama wa Yesu mwaghenda elhubulha n’omubiri wiwe. Ekitabu Religion and Society—Encyclopedia of Fundamentalism kikabugha kithi; “Enyikirirya eyi yabya yasibwe omwa kanisa y’erimbere kandi isiyiri omo Masako.”

  •  Feast of the Immaculate Conception. “The Immaculate Conception ni ngangirirya eyithe omwa Masako.  . . [Ni] ngangirirya ey’Ekanisa.”—New Catholic Encyclopedia.

  •  Akalema. Erikwamana na New Catholic Encyclopedia, obuthuku bw’eriyisubamo obu n’eritsira akalyo bwatsuka “omo kighana kyakani,” emyaka eyilhabire omu 200 e Biblia yalihwere erihandikwa. Yikakania okwa kiro ky’erimbere ekya Akalema, e encyclopedia yikabugha yithi: “Omutse w’abathaleghulha erisigwa eribu okwa kiro kye Ash Wednesday abiribya omo kihugho kyosi eritsuka aho olhuhindano lhwe Benevento lhwabera omwa 1091.”

  •  Meskel (kutse, Maskal). Ekitabu Encyclopedia of Society and Culture in the Medieval World kikabugha kithi ekiro kikulhu eki ekye Ethiopia n’ibuka “erisondya Omusalaba w’Okwenene (omusalaba ogho Kristo abambawako), omw’ithwana omuliro n’erihotholha ibanemuthimba kugho.” Aliwe, Abema ba Yehova sibalikolesaya omusalaba omw’iramya lyabu.

•   Mbwino ekiro kikulhu eki kikahalhamba omundu, ekithongole, kutse akaminyikalho k’erihanga?

   Omusingyi we Biblia: “Omwami Mukulhu athi, omundu oyukayikethera abandu athakirawe, oyukayikethera amaaka w’abandu, n’omuthima wiwe akatswa oko Mwami Mukulhu.”—Yeremia 17:5.

   Nomwakine indi bakakanganaya ku bakasima abandi kandi nibya ibabasabira, Abema ba Yehova sibalisangira omwa mikonga kutse ebiro bikulhu bino:

   Ebiro bikulhu ebikasikaya omuthabali kutse omundu w’ekitsumbi. E Biblia yikabugha yithi, “Muleke erisamalira abandu, omuka wabo ali omo nyindo syabo, kusangwa omundu angasimwa busana naki kwehi?” (Isaya 2:22) Busana n’ekyo, ng’eky’erileberyako, Abema ba Yehova sibalibuka ekiro ky’amabuthwa w’omwami kutse omwami-kali.

   Ebiro bikulhu by’ebbendera y’erihanga. Abema ba Yehova sibalyibuka Ekiro Kikulhu ky’Ebbendera. Busana naki? Kundi e Biblia yikabugha yithi: “Muyitheghaye oko syonyamuhanga sy’amabehi.” (1 Yoane 5:21) Abandi munabwire sibalilhangira ebbendera ng’esanamu—ekindu ky’eriramya—aliwe oyusomire ebyakera ya Carlton J. H. Hayes mwahandika athi: “Akaminyikalho kakulhu ak’erihanga ak’erikirirya n’ekindu kikulhu eky’eriramya y’ebbendera.”

   Ebiro bikulhu kutse emikonga eyikahalhamba omubuyirire. Ni kyahi ekyabya omughulhu omulhume oyukubaha Nyamuhanga unamira omukwenda Petero? E Biblia yikabugha yithi: “Petero mwamuhangania athi, Hangana, ingye naghe indi mundu.” (Emibiri 10:25, 26) Kundi nomwakine indi Petero kutse owundi mukwenda wosi-wosi, mwathaligha erisikibwa omo nzira y’embaghane kutse eriramibwa, Abema ba Yehova sibali sangira omwa mikonga eyikasikaya abakahulhawamo ababuyirire, ng’emikonga eyiri ahikwa hano:

  •  Ekiro ky’Ababuyirire Abosi. “Omukonga ow’erisikya ababuyirire abosi . . . Enzuko y’omukonga oyu siyasibwe.”—New Catholic Encyclopedia.

  •  Fiesta of Our Lady of Guadalupe. Omukonga oyu akasikaya “oyukatheghaya omubuyirire we Mexico,” oyo abandi bikirirye bathi ni Maria, mama wa Yesu. Maria akakanibawako indi omo nzira y’ekithiko-thiko mwabuthukira oko mulimi omwa 1531.—The Greenwood Encyclopedia of Latino Literature.

  •  Name Day (Ekiro ky’Erina). Ekitabu Celebrating Life Customs Around the World—From Baby Showers to Funerals kikabugha kithi: “Ekiro ky’erina ni mukonga w’ekiro ky’omubuyirire oyo erina liwe likalhukawa omwana obundi akabatizibwa kutse akatebwaho.” Kikongerako kithi “okwa kiro ekyo, hakakolhawa emirwa mikulhu-mikulhu y’edini.”

   Emikonga y’eby’epolitiki kutse ekithongole kirebe. E Biblia yikabugha yithi, “Lyowene eriyikethera Omwami Mukulhu, kwilhaba eriyikethera abandu.” (Esyonyimbo 118:8, 9) Erithoka erikangania kubayikethere ngoku Nyamuhanga yukendisya ghunzaho ebitsibu by’ekihugho kino butsira abandu, Abema ba Yehova sibali sangira omwa mikonga eya Youth Day kutse Women’s Day eyikasighika eby’ekipolitiki kutse epoko-poko y’abandu. Busana n’enzumwa iyan’eyo, sibali sangira omwa Emancipation Day kutse emikonga eyiri ng’eyo. Omwakanya k’ekyo, bakayikethera Obwami bwa Nyamuhanga erisyaghunzaho akasolholho k’erangyi kutse obuthe bulingirirania.—Abanya Roma 2:11; 8:21.

•   Mbwino ekiro kikulhu eki kikaleka erihanga kutse ekihanda kirebe ikyabya nga kilengire ebindi?

   Omusingyi we Biblia: “Nyamuhanga syawithe bithagha [akasolholho]. Nikwa omo buli kihanda omundu oyukubaha Nyamuhanga, n’erikolha ebithunganene akalighawa nayu.”—Emibiri 10:34, 35.

   Nomwakine indi Abema ba Yehova bangyi banzire ebihugho byabu, bakayihighulha okwa biro bikulhu ebikahamaya ebihugho kutse ebihanda okwa bindi ng’omwa syonzira esiri ahikwa hano.

   Emikonga eyikasikaya amahe. Omwakanya k’erisighika esyonyuhi, Yesu mwabwira abigha biwe athi: “Mwanze esyonzighu syenyu, musabire abakabenderereraya.” (Matayo 5:44) Busana n’ekyo, Abema ba Yehova sibalyibuka emikonga eyikasikaya abasirikali, imwamune n’ebiro bikulhu bino:

  •  Anzac Day. “E Anzac yikimanira Australian and New Zealand Army Corps,” na “Anzac Day lyolho-lyolho kyabiringira omwa kiro ky’eryibuka abakakwira omwa lhuhi.”—Historical Dictionary of Australia.

  •  Veterans Day (Remembrance Day, Remembrance Sunday, kutse Memorial Day). Ebiro bikulhu ebi bikasikaya “abasi bingyi omo mahe n’abak’ithibawa omwa syonyuhi sy’erihanga.”—Encyclopædia Britannica.

   Emikonga y’eryibuka ekera y’erihanga kutse erihanga likayithongolha. Akakania n’abigha biwe, Yesu mwabugha athi: “Si b’ekihugho, ngoku nyithe w’ekihugho.” (Yoane 17:16) Nomwakine indi bakatsema bakaminya ekera y’erihanga, Abema ba Yehova bakayihighulha okwa mikonga nga yino:

  •  Australia Day. Erikwamana na Worldmark Encyclopedia of Cultures and Daily Life, ekiro kikulhu n’ibuka “ekiro ekyabya omwa 1788 omughulhu abasirikali Abasungu bahanika ebbendera yabu n’eriranga bathi e Australia yamabya ahisi sy’obusondoli bwabu.”

  •  Guy Fawkes Day. Eki ni “kiro ekyo erihanga likibukiramu erilemwa lya Guy Fawkes n’abandi abakabugha bathi ni Bakatuliki er’itha Omwami James I n’ab’omwa Paliamenti ye [England] omwa 1605.”—A Dictionary of English Folklore.

  •  Ekiro ky’Eripandasi. Omwa bihugho bingyi, eki ni “kiro ekyabirihighulhwa busana n’abandu eryibuka ekiro erihanga lyayithongolha.”—Merriam-Webster’s Unabridged Dictionary.

•   Mbwino ekiro kikulhu eki kiri mw’erithendi yikakirya kutse omutse mubi?

   Omusingyi we Biblia: “Oko mughulhu owalhaba mwabirikwama endambi yingaho amalengekania w’abathikirirye. Mwabya mukakwama erisingira, esyongumbu, n’erikunda, n’erithamira, n’eriyalhumba, n’esyonye sy’esyosanamu.”—1 Petero 4:3.

   Erikwamana n’omusingyi oyo, Abema ba Yehova bakayihighulha okwa mikonga eyiri mw’erithamira n’amagheni w’ebyughungu. Abema ba Yehova bakatsemera eribya haghuma n’abanywani babu, kandi bangana thwamu erinywa obwabu oko lhulengo, kyamayithaghisibwa. Bakakolha ngoku banga thoka erighendera okw’ihabulha lye Biblia lino: “Neryo wamalya akalyo kutse wukapulya, kutse wamakolha ekinduki, wukole ebyosi busana n’eriha olhukengerwa oku Nyamuhanga.”—1 Abanya Korinto 10:31.

   Busana n’ekyo, Abema ba Yehova sibali sangira omwa mikonga ey’obuli mwaka kutse eyiri ng’eyo eyikakulha-kulhanaya emitse mibi eyo e Biblia yikathanga. Eyi mwamuli ekiro kikulhu ky’Abayuda ekya Purim. Nomwakine indi e Purim yabirighunza myaka iyinemukolhwa busana n’eryibuka erilhamibwa ly’Abayuda omo kighana kyakathano E.K.K., lino yanganabya “iyabirihwa amani aliwe yikinakanibwako ng’erisubirya ly’Abayuda oku Mardi Gras kutse Carnival,” ekitabu Essential Judaism kithya. Oko bangyi abanzire ebyughungu, “eki mwamuli eryambalha esyongyimba (mughulhu mungyi abalhume eryambalha esyongyimba sy’abakali), emibere y’eriyisamambulha, erinywa bunene, n’ebyughungu.”

 Ee. E Biblia yikakangiriraya abandu erianza n’erisikya abosi omw’eka, mbulha bikiriryeki. (1 Petero 3:1, 2, 7) Ni kwenene, omughulhu omughuma w’okwa Bema ba Yehova akaleka erisangira omwa biro bikulhu birebe, abaghuma b’okwa bahughu biwe bangana pona, ibahithana, kutse nibya ibayowa nga bamaghoberibwa. Busana n’ekyo, abangyi b’okwa Bema ba Yehova bakakakasaya abahughu babu ngoku babanzire, omo menge ibabasoborera esyonzumwa esikaleka ibathwamu bathya, kandi ibabungira abahughu babu okwa bindi biro.

 Eyihi. Bikirirye bathi obuli mundu atholere iniayithwiramu. (Yosua 24:15) Abema ba Yehova ‘bakasikaya abandu bosi,’ nomubangabya ibikiriryeki.—1 Petero 2:17.