Ee, e Biblia yikaha obwema obulhangirikire ngoku Nyamuhanga aneho. Yikathuhira mw’omuhwa w’erikirirya omu Nyamuhanga, butsira omw’ikwama kya ligha esyongangirirya sy’edini kitura-muthwe, aliwe omw’ikolesya ‘amaaka wethu aw’erighanirya’ ‘n’erilenga emyatsi yosi.’ (Abanya Roma 12:1, NWT; 1 Abanya Tesalonika 5:21) Thalengekania okwa nzumwa hino esiseghemere okwa Biblia:

•   Ekyanya n’ebyosi ebirimukyo eribya ibine omwa buyithondeke kandi imune n’engebe, kikakangana ngoku hane Omuhangiki. E Biblia yikabugha yithi: “Kusangwa obuli nyumba yikahimbawa n’omundu, nikwa Nyamuhanga ni muhimbi w’emyatsi yosi.” (Abaebrania 3:4) Nomwakine indi erisoborera eri lyolhobire, abangyi abasomire kali-kali likabakalira. a

•   Ithwe ng’abandu, thwanzire kutsibu eriminya ekighendererwa ky’engebe, omulingo w’obwagha obwa thukabya ithune nabu nomuthwangabya ithwabiribana ebya thukayithagha kinyamubiri. Eki ni kighuma ky’okwa bya e Biblia yikahulhamu “obwagha bwa Nyamuhanga” kutse obwagha bw’eby’obunyakirimu, imwamuli erianza eriminya Nyamuhanga n’erimuramya. (Matayo 5:3; Eribisulirwa 4:11) Obwagha bw’eby’obunyakirimu obu bukathukakasaya ngoku Nyamuhanga aneho kandi ngoku Omuhangiki w’olhwanzo oyo anzire ithwaberererya obwagha bwethu obo.​—Matayo 4:4.

•   Amaminyereri awali omwa Biblia n’ebyosi ebirimu ahandikawa myaka mingyi kera kandi mwabererera ngoku analhaghulhawa. Eribererera ndeke ly’amaminyereri ayo kikakanganaya ndeke-ndeke ngoku bikalhua oko w’amaaka manene kutsibu.​—2 Petero 1:21.

•   Abahandiki be Biblia babya basi binene eby’esayansi kwilhaba ababyaho omwa buthuku bwabu. Ng’eky’erileberyako, kera abandu bangyi ib’ikirirye bathi ekihugho kithekire okwa bisoro, ng’enzoghu, embunu y’omoli, kutse enume y’ende. Mbaghane n’ekyo, e Biblia yikabugha yithi Nyamuhanga “mwahanika ekihugho ahathe kindu.” (Yobu 26:7) Kuthya, e Biblia yakakanaya ndeke okwa mikwikire y’ekihugho ngoku ni “kiringo.” (Isaya 40:22) Abandu bangyi b’ikirirye bathi erisoborera ly’amenge manene erikayitheghereribawa eri liri lithya kundi abahandiki be Biblia bahandika ebikalhua oku Nyamuhanga.

•   E Biblia yikasubiraya ebibulyo bingyi ebikalha-kalire, ebibulyo ebya omundu amathendi banako eby’erisubirya ebihikire ikyanganaleka iniath’ikirirya omu Nyamuhanga. Ng’eky’erileberyako: Nyamuhanga amabya ini w’olhwanzo kandi ini w’obuthoki bwosi, busana naki omwa kihugho muli eriaghalhwa n’obubi? Busana naki amadini mughulhu mungyi iniabya iwakalethaho obubi omwakanya k’ebibuya?​—Tito 1:16.