Abaana abakulire bawithe olhukwamirwa lhw’erilhangira bathi ababuthi babu abakekelhuhire bakatsomanawa. E Biblia yikabugha yithi abaana abakulire batholere ‘ibalembera ab’enyumba yabo, omw’ikenga Nyamuhanga n’eriswawathikya ababuthi babo, kusangwa eki kikasimawa na Nyamuhanga.’ (1 Timoteo 5:4) Abaana abakulire bakabya bakalhangira bathi ababuthi babu bakatsomanawa, bakabya ibakaghendera okwa kihano kye Biblia eky’erisikya ababuthi babu.—Abanya Efeso 6:2, 3.

 Omo Biblia simuli erihabulha lirebe erihambire okw’itsomana ababuthi abakekelhuhire. Aliwe yirimo eby’erileberyako eby’abalhume n’abakali ab’erikirirya abakolha ekyo. Kandi yikaha amenge awakakolha awanga wathikya abakalembera abakekelhuhire.

• Abandi omw’eka mubatsomana bathi ababuthi abakekelhuhire omwa buthuku bwe Biblia?

• N’ihabulha lyahi erikakolha eriri omo Biblia eryanga wathikya abakalembera ababuthi babu abakekelhuhire?

• Mbwino e Biblia yikanabugha yithi ababuthi abakekelhuhire ibatsomanirwa eka?

 Mubakolha ekyo omo nzira muthina-muthina, erikwamana n’emibere eyo babyamo.

•   Yozefu abya ikere haali oku thatha wiwe omusyakulhu, ya Yakobo. Yozefu abere athoka, mwahiraho emitheghekere nuku Yakobo ahumire hakuhi nayu. Yozefu mwaha thatha wiwe y’ah’erikalha, amamulisya, n’erimutheya.—Enzuko 45:9-11; 47:11, 12.

•   Ruta mwahumira omo kihugho kya nyokubyalha wiwe kandi mwakolha kutsibu erimutsomana.—Ruta 1:16; 2:2, 17, 18, 23.

•   Yesu, buthuku buke athali aholha, mwasombolha oyukendi tsomana mama wiwe ya Maria, oyo kilhangirikire ngoku oko buthuku obo abya mukwakali.—Yoane 19:26, 27. a

 E Biblia yirimo emisingyi eyanga wathikya abakalembera ababuthi babu abakekelhuhire erighuma omughulhu bakalhuha kinyamubiri n’omw’iyowa bakatsomana ababuthi abakekelhuhire.

•   Sikaya ababuthi bawu.

   Ekya Biblia yikabugha: “Wukenge thatha wawu na koyo wawu.”—Eriluayo 20:12.

   Omusingyi oyu angakolesibwa athi? Kanganaya ku wusikirye ababuthi bawu omw’ibalighira eriyisondolha ngoku banga thoka. Kyamathokekana, leka bayithwiremo ngoku batsomanawe. Kandi, kanganaya ku wubasikirye omw’ikolha ekya wanga thoka eribawathikya.

•   Ibya n’obuyitheghererya kandi ghanyira.

   Ekya Biblia yikabugha: “Amenge w’eriyisunako ly’omundu akaleka iniathahithana lhuba; kandi ni lhukengerwa lhwiwe eribuyira erilholho.”—Emisyo 19:11.

   Omusingyi oyu angakolesibwa athi? Omubuthi oyukekelhuhire amabugha ebithuwene kutse iniabya nga syalisima eritsomana lyawu, yibulhaye, ‘Iningendi yowa nyithi namabya omo mibere eyiri ng’eyi?’ Wamalengaho eribya n’obuyitheghererya kandi oyukaghanyira, iwangana yihighulha okw’ikalya emyatsi.

•   Yihanuzaye oko bandi.

   Ekya Biblia yikabugha: “Ahathe amahano, eriyisunza likakwa bulighe; nikwa omo bungyi bw’abahani akahanganibawa.”—Emisyo 15:22.

   Omusingyi oyu angakolesibwa athi? Sekulhaya okwa ekya wanga kolha oko bitsibu by’amaghalha ebya babuthi babu bangabya ibawithe. Minya nga ni buwathikya bwahi obuliho omwa bulhambu bwenyu obwanga kuwathikya eritsomana ababuthi bawu. Kanaya n’abandi ababiritsomana ababuthi babu abakekelhuhire. Wamabya iwunawithe abo wubuthenwe nabo, lengekanaya okw’ihindana haghuma n’efamile nuku mukanaye oko biyithawa by’ababuthi, ngoku mwanga batsomana, kandi ngoku mwanga wathikania okw’ekyo.

•   Minya aho maaka wawu akasubulira.

   Ekya Biblia yikabugha: “Amenge ali haghuma n’abakayolhobeka.”—Emisyo 11:2.

   Omusingyi oyu angakolesibwa athi? Minya erilemererwa lyawu. Ng’eky’erileberyako, obuli mundu syawithe endambi n’akaghalha ebikaghunza. Ebi byangana hamba kutsibu oko maaka wawu w’erilembera ababuthi bawu. Wamayisanga iwabirilyambibwa okwa ky’eritsomana ababuthi bawu abakekelhuhire, lengekanaya okwa ky’erisaba obuwathikya oko bandi bahughu kutse oko badokita.

•   Nawu yitsomane.

   Ekya Biblia yikabugha: “Sihali mundu na kera oyukakwa omubiri wiwe w’obusu, nikwa akahagho akalyo n’erisughagho.”—Abanya Efeso 5:29.

   Omusingyi oyu angakolesibwa athi? Nomwakine indi wuwithe olhukwamirwa lhw’eritsomana ababuthi bawu, nawu wutholere iwatsomana ebiyithawa byawu n’eby’eka yawu wamabya iwuli omo butheke. Wutholere iwalya ndeke. Wutholere iwabana erilhuhuka n’othulho ebikaghunza. (Omugambuli 4:6) Kandi wutholere iwabya iwunemulhuhuka kyamathokekana. Omw’ikolha ebindu ebi, iwukendi thoka eritsomana ababuthi bawu omw’iyowa, omo bulengekania, na kinyamubiri.

 Omo Biblia simuli busondoli bulebe obuhambire oko abaana abakulire nga batsomanire ababuthi babu b’eka. Esindi famile sikanathwamu erilemberera ababuthi babu abakekelhuhire b’eka kyamathokekana. Aliwe endambi iyangana hika ibayowa bathi emyanya y’erilembereramo abakekelhuhire y’eyitholere. Efamile iyangana hindana haghuma nuku bathwemu nga ni hayi ahakendi thokekana oko bosi.—Abanya Galatia 6:4, 5.