Eyihi, amadini awosi syasosene. Omwa Biblia muli eby’erileberyako bingyi eby’amadini awathetsemesaya Nyamuhanga. Amadini aya ni w’emiringo ibiri.

Omulingo 1: Eriramya esyonyamuhanga esy’amabehi

 E Biblia yikabya yikakania okw’iramya ly’esyonyamuhanga sy’amabehi yikakolesaya ebinywe nga “bithya-bithya,” na “emyatsi eyithemo ndundi.” (Yeremia 10:3-5; 16:19, 20) Yehova a Nyamuhanga mwalhaghira ekihanda kye Israeli athi: “Susyebya n’esindi nyamuhanga nina ngye.” (Eriluayo 20:3, 23; 23:24) Omughulhu Abaisraeli baramaya esindi nyamuhanga, “Omwami Mukulhu [Yehova] mwahithana.”​—Emiganzo 25:3; Abalawi 20:2; Abatsweri 2:13, 14.

 Nyamuhanga akine n’amalengekania ayo bikahika okw’iramya “esikahulhawa mo nyamuhanga.” (1 Abanya Korinto 8:5, 6; Abanya Galatia 4:8) Akabwira abakanza erimuramya athi baleke erisangira haghuma n’abali omwa madini w’amabehi, omw’ibugha athi: “Neryo mulhue omo kathi-kathi kabo, muyisolhole.” (2 Abanya Korinto 6:14-17) Amadini awosi kw’alhue iniasosene kandi iniakakolhaya abandu oku Nyamuhanga, busana naki Nyamuhanga iniathuha ekihano ng’eki?

Omulingo 2: Eriramya Nyamuhanga w’ekwenene omwa mibere eyo atheligha

 Ihakanayira Abaisraeli ibaramya Nyamuhanga omw’ikolesya esyonyikirirya n’emitse ebyo bakopa erilhua omw’iramya ery’esyonyamuhanga sy’amabehi, aliwe Yehova mwaghana eky’eritswangania eriramya ly’ekwenene n’ery’amabehi. (Eriluayo 32:8; Eryibuka Ebihano 12:2-4) Yesu mwatsweba abakulhu b’amadini ab’omwa buthuku bwiwe busana n’emibere baramirayamo Nyamuhanga; ibakayithendereraya nga ni banya dini, aliwe omwa buthebya ibaleka “emyatsi mikulhu kw’aho y’Emighambo ng’eribanza [obulingirirania], n’erighanyira, n’erithendi leghulha.”​—Matayo 23:23.

 Kuthya munabwire, hali edini nguma nyisa eyiseghemere okwa kwenene eyikakolhaya abandu oku Nyamuhanga. Ekwenene eyi yiri omwa Biblia. (Yoane 4:24; 17:17; 2 Timoteo 3:16, 17) Amadini awakakangiriraya ebithahambangana n’ebiri omwa Biblia akasegheraya abandu ba haali oku Nyamuhanga. Esyongangirirya nyingyi esyo abandu bakalengekanaya bathi silhuire omwa Biblia​—imwamuli Obusathu, akalimu akatheholha, n’eriaghalya abandu b’omwa muliro wa kera na kera​—silhuire omwa babya bakaramya esyonyamuhanga esy’amabehi. Amadini awakakulha-kulhanaya esyongangirirya ng’esi ni “buyira,” syawithe mughaso, kundi akasubaya omwa mwanya w’ebihano bya Nyamuhanga mw’emirwa y’ekidini.​—Mariko 7:7, 8.

 Nyamuhanga aponire obuthebya bw’amadini. (Tito 1:16) Erithoka eriwathikya abandu eriyithunda oku Nyamuhanga, edini yitholere iyahamba okwa ngebe yabu ya buli kiro butsira erikwama kyabya mw’emikoro lisa. Ng’eky’erileberyako, e Biblia yikabugha yithi: “Omundu amaghanirya athi akakwama ekisomo kya ndeke, nikwa isyali kunga olhulimi lhwiwe, akayitheba, n’ekisomo kiwe ni kya busa. Ekisomo kibuya, ekithe n’ebithisirire embere sya Nyamuhanga Thatha ky’eki: eriwathikya esyongubi n’abakwakali omo bulighe bwabo, kandi n’eriyihighulha oko myatsi mibi y’ekihugho.” (Yakobo 1:26, 27) Embindulha eya King James Version yikakolesaya ebinywe “edini eyihenirye” yikakania okw’iramya ey’erire, erithe mw’amathebo.