Ee! E Biblia yikalhua oku “Nyamuhanga oyukakiranaya abakabulha omuthima w’omo nda.” (2 Abanya Korinto 7:6) Nomwakine indi e Biblia si kitabu eky’eby’obwongo, yabiriwathikya abangyi erirwanisya amalengekania w’erianza eriyitha. Erihabulha lyayu erikakolha nawu lyangana kuwathikya.

• N’ihabulha lyahi erikakolha eryo e Biblia yikaha?

• Mbwino e Biblia yikanathubwira oko bandu abayisunza olhuholho?

• Ni milhondo yahi ye Biblia eyanga kuwathikya erirwanisya amalengekania w’erianza eriyitha?

• Kandi ibbwa omunywani amabugha athi, “Nganzire ngahole”?

• Kandi Ibbwa namabya imunananza eriyitha kera?

• ● Kanganaya eriyowa lyawu.

   Ekya Biblia yikabugha: “Omwira akanza emighulhu yosi; n’omughalha wabu akabuthawa busana n’obulighe.”—Emisyo 17:17.

   Ekya kikamanyisaya: Thukayithagha obuwathikya bw’abandi omughulhu thuwithe ebikathulyambaya.

   Wamayihunira n’eriyowa lyawu, wukaheka omuheke owawuthe wanga thoka. Aliwe wamabwira abandi okw’iyowa lyawu, wukaleka ebitsibu byawu ibyakeha kandi iwabya n’amalengekania awuwene.

   Lengesaya kino: Munabwire bwira omundu mulebe, obundi omuhughu kutse omunywani muyiketherwa. a Kandi iwangana kangania eriyowa lyawu omw’ihandikalyo.

• ● Bana obuwathikya bwa dokita.

   Ekya Biblia yikabugha: “Abakalire sibali n’obwagha bw’omunganga, nikwa abalhwere.”—Matayo 9:12.

   Ekya kikamanyisaya: Thutholere ithwasondya obuwathikya bwa dokita omughulhu thulhwere.

   Amalengekania w’erianza eriyitha anganabya ini kaminyikalho k’obulhwere bw’obwongo kutse obuhambire okw’iyowa. Ng’obulhwere obwonyine-nyine, eki si kindu ky’erikwira esisoni. Obulhwere bw’obwongo n’obw’omw’iyowa byangana thambirwa.

   Lengesaya kino: Sondaya obuwathikya oku dokita bukiri lhuba.

• ● Wibuke ngoku Nyamuhanga akatsomana.

   Ekya Biblia yikabugha: “Ehinyonyi hithano si hyeghulibawa oko senge ibiri kwehi? Nikwa Nyamuhanga syalibirirawa n’akaghuma ka kuhyo. . . . Neryo simubahe, muli b’obughuli bunene kwilhaba obughuli bw’ehinyonyi hingyi.”—Luka 12:6, 7.

   Ekya kikamanyisaya: Wuli w’obughuli embere sya Nyamuhanga.

   Wangana yowa nga wuli iwuwene, aliwe Nyamuhanga analhangire ebya wukalhabamo. Akutsomene—nomuwangabya isiwukyanzire eribyaho. Esyonyimbo 34:18 hathi, “Omwami Mukulhu ali hakuhi n’ab’emithima ibbunangikire.” Nyamuhanga anzire iwabyaho kundi akwanzire.

   Lengesaya kino: Lebaya omo Biblia mw’obwema obukakanganaya ngoku Nyamuhanga akwanzire. Ng’eky’erileberyako, lebaya omwatsi “Yehova Akakutheghaya,” omwa Akaleberyo ak’Okwomukagha 2016, olhupapura 3-5, n’esura 24 ey’ekitabu eky’erighiramo e Biblia ekya Draw Close to Jehovah.

• ● Saba Nyamuhanga.

   Ekya Biblia yikabugha: “Muhire erihangya-hangya lyenyu lyosi oku Nyamuhanga, kusangwa akabatheghaya.”—1 Petero 5:7.

   Ekya kikamanyisaya: Nyamuhanga akakukokaya athi wumubwire ebikakulyambaya ahathe eribisirira.

   Nyamuhanga angana kuha erithekana n’akaghalha erithoka erighuma. (Abanya Filipi 4:6, 7, 13) Omo nzira eyi, akahanganira abakamubirikira erilhua oko muthima.—Esyonyimbo 55:22.

   Lengesaya kino: Munabwire saba Nyamuhanga. Kolesaya erina liwe, erya Yehova, kandi mubwire eriyowa lyawu. (Esyonyimbo 83:18, NWT) Musabe wuthi akuwathikaye wulhole embere erisika.

• ● Ghaniraya oko maha we Biblia aw’obuthuku obukasa.

   Ekya Biblia yikabugha: “Thuwithe amaha aya awakasikaya emithima yethu. Amaha aya ni w’ekwenene, asikire.”—Abaebrania 6:19.

   Ekya kikamanyisaya: Eriyowa lyawu lyangana yihungya-hungya ng’obwathu obuli omwa kiyagha, aliwe amaha awali omo Biblia angana leka iwasika.

   Amaha ayo si bilhotho buyira aliwe aseghemere oko mulhaghe wa Nyamuhanga ow’erighunzaho ebikathulethera obulhumi.—Eribisulirwa 21:4.

   Lengesaya kino: Minya bingyi oko maha we Biblia omw’isoma erisomo 5 ery’ebrokyuwa Engulhu Yuwene Erilhua oku Nyamuhanga!

• ● Kolha ekindu kirebe ekyo wukatsemera.

   Ekya Biblia yikabugha: “Omuthima w’eritsema ni busaki buwene.”—Emisyo 17:22.

   Ekya kikamanyisaya: Thwamakolha ebindu ebikathutsemesaya, ithwangan’uwania amalengekania n’eriyowa lyethu.

   Lengesaya kino: Kolha ekindu kirebe ekyo wukatsemera buli kiro. Ng’eky’erileberyako, hulikirira omuziki owakatsemesaya, soma ebikahimba, kutse yitsemesaye. Kandi iwangan’ongera etseme yawu wamakolha ekindu kirebe eriwathikya abandi, nibya n’omwa hindu hike-hike.—Emibiri 20:35.

• ● Tsomana amaghalha wawu kinyamubiri.

   Ekya Biblia yikabugha: “Eriyikalya-kalya ly’omubiri liwithe mughaso.”—1 Timoteo 4:8.

   Ekya kikamanyisaya: Thukaghasirawa thukakolha ebisasayizi, thukaghotsera othulho othukaghunza, kandi thukalya ebyalya by’ekirisya.

   Lengesaya kino: Ghenda iwunemwanguha, nibya habw’esyodakika nga 15.

• Wibuke ngoku eriyowa n’ebindi bindu omo ngebe bikahinduka.

   Ekya Biblia yikabugha: “Si mwasi nga mwasyabya muthi omo ngyakya.”—Yakobo 4:14.

   Ekya kikamanyisaya: Ekitsibu ekikalyambaya—nibya n’ekya wukalengekania wuthi siwanga thoka erighumira—kyanganabya ky’akathuku kake.

   Engebe eya wulimo munabwire nomuyangabya iyikalire yithi, yangana hinduka omungya. Neryo sondaya esyonzira sy’erighumiramo. (2 Abanya Korinto 4:8) Emibere eyikalire eya wulimo endambi yangana hika iyahinduka, aliwe wamabiriyitha bikabya ibahwere.

   Lengesaya kino: Soma oko myatsi ye Biblia eyihambire oko bandu abahwa amani bamayisunza n’olhuholho, kandi lhangira ngoku erighunzerera engebe yabu muyahinduka yamuwana—mughulhu mungyi omo syonzira esyo bathabya bayitsulirye. Thulebaye eby’erileberyako birebe.

 Ee. E Biblia yikathubwira okwa ababugha bathi, “Nganzire ngahole.” Nyamuhanga mwathabatsurumira, aliwe mwabawathikya. Nawu angana kukolera ikyan’ekyo.

Eliya

•  ● Abya inindi? Eliya abya muminyereri muthubaha. Aliwe nayu mwahwa amani. Yakobo 5:17 hathi, “Eliya abya mundu nga thwe.”

•  ● Busana naki mwanza ahole? Buthuku bughuma, Eliya mwayowa ng’ali iyuwene, mubaha, kandi amayowa nga syawithe mughaso. Neryo mwalemba-lemba Yehova athi: ‘Iwe Yehova wulhusaye engebe yaghe.’—1 Abami 19:4.

•  ● Ni kyahi ekya muwathikaya? Eliya mwabwira Nyamuhanga y’eriyowa liwe. Nyamuhanga mwamuhumulikania athi? Nyamuhanga mwamukangania kw’amutsomene kandi mwamukangania ngoku awithe amaaka. Kandi mwakakasya Eliya ngoku akinayithaghisibawa kandi mwaha Eliya y’omuwathikya oyutsomene kandi oyutholere.

•  ▸ Soma oku Eliya: 1 Abami 19:2-18.

Yobu

•  ● Abya inindi? Yobu abya mulhume w’efamile omugaga oyuwabya akaramya Nyamuhanga w’okwenene buthaleghulha.

•  ● Busana naki mwanza ahole? Engebe ya Yobu muyahinduka nabi kutsibu. Mwaherya ebyosi aby’awithe. Abaana biwe abosi mubaholha omo kitsinduli. Mwalhwalha obulhwere obukalhuma kutsibu. Kandi erighunzerera, mwahangirirwa indi yukayilethera ebitsibu. Yobu mwabugha athi: “Ngabonda; sinendi syakotha.”—Yobu 7:16.

•  ● Ni kyahi ekya muwathikaya? Yobu iniakasaba Nyamuhanga kandi iniakakanaya n’abandi. (Yobu 10:1-3) Munywani wiwe oyutsomene ya Elihu mwamuhumulikania n’erimuwathikya eribya n’amalengekania awuwene. Ekikulhu kutsibu, Yobu mwaligha erihabulha n’obuwathikya bwa Nyamuhanga.

•  ▸ Soma oku Yobu: Yobu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Musa

•  ● Abya inindi? Musa abya musondoli w’Abaisraeli kandi abya muminyereri muthaleghulha.

•  ● Busana naki mwanza ahole? Musa aby’awithe omubiiri owakalire, ibakabera erimutsweba-tsweba, neryo mwahwa amani. Neryo mwalhakira Nyamuhanga athi: “Ngakusaba wunyithire hano.”—Emiganzo 11:11, 15.

•  ● Ni kyahi ekya muwathikaya? Musa mwabwira Nyamuhanga y’eriyowa liwe. Nyamuhanga mwawathikya Musa eriolhobya omubiiri wiwe nuku akehaye amaghaniryo.

•  ▸ Soma oku Musa: Emiganzo 11:4-6, 10-17.