Nyamuhanga Awithe Amena Mangahi?

BUGHAYA

Ekya Biblia yikasubiraya

Nyamuhanga awithe erina lighuma lisa. Omwa Kihebrania likahandikawa lithi יהוה (YHWH) kandi n’omwa Lhukonzo likahindulhawa mwa “Yehova.” a Erilhabira omwa muminyereri wiwe Isaya, Nyamuhanga mwabugha athi: “N’ingye Yehova. Eryo ly’erina lyaghe.” (Isaya 42:8, NWT) Erina eri likabanika omwa mikunzo ye Biblia eya kera emirundi nga 7,000—emirundi mingyi kwilhaba ekindi kinywe ekikakolesibawa oku Nyamuhanga, kutse nibya erina ly’owundi mundu wosi-wosi. b

Mbwino hane awandi mena wa Yehova?

Nomwakine indi e Biblia yikakanaya okwa rina lighuma lisa lya Nyamuhanga, yikakolesaya ebitsumbi bingyi n’ebindi ebikamukanayako. Ebighuma by’okwa bitsumbi n’ebindi ebikamukanayako ebiri ahikwa hano bikakanganaya ngoku obuli kighuma ky’okw’ibyo kikabisulha ngoku Yehova ali kutse omubere wiwe.

Ekitsumbi	Erisako	Ekya kikamanyisaya
Allah	(Sihali)	Lilhuire omwa Lhuharabu, ekinywe “Allah” si rina aliwe ni kitsumbi ekikamanyisaya “Nyamuhanga.” Esyombindulha sye Biblia omwa Lhuharabu n’omwa yindi mibughe sikakolesaya “Allah” erimanyisya “Nyamuhanga.”
Omuthoki w’Ebyosi	Enzuko 17:1	Awithe obuthoki bunene kutsibu. Ekinywe ky’Ekihebrania ʼEl Shad·daiʹ, “Nyamuhanga Omuthoki w’Ebyosi,” kikabanika mirundi 7 omwa Biblia.
Alfa na Omega	Eribisulirwa 1:8; 21:6; 22:13	“Ow’erimbere n’ow’enyuma,” kutse “enzuko n’enduli,” erimanyisya ngoku sihabya Nyamuhanga Omuthoki w’Ebyosi Yehova athali abyaho, kandi ngoku sihendisyabya owundi. (Isaya 43:10) Alfa y’enyughuta y’erimbere na omega y’enyughuta y’erighunzerera omwa syonzakano sy’Ekigiriki.
Mukulhu w’Ebiro	Danieli 7:9, 13, 22	Syawithe nzuko; abiribyaho kera na kera omundu wosi-wosi kutse ekindi kindu kyosi-kyosi kithe kyabyaho.—Esyonyimbo 90:2.
Omuhangiki	Isaya 40:28	Mwaleka ebyosi ibyabyaho.
Thatha	Matayo 6:9	Yukaha engebe.
Nyamuhanga	Enzuko 1:1	Ekindu eky’eriramya; ow’Amaaka. Ekinywe ky’Ekihebrania ʼElo·himʹ kikakanaya okwa bindu ebilhabire okwa kighuma, erikangania erisikibwa, ekitsumbi, kutse obukulhu bwa Yehova.
Nyamuhanga w’esyonyamuhanga	Eryibuka Ebihano 10:17	Nyamuhanga ow’Endatha kutsibu, akalinganisibwa ‘n’esyosanamu [esyonyamuhanga esithawithe mughaso]’ esy’abandi bakaramaya.—Isaya 2:8.
Omukangirirya	Isaya 30:20, 21	Akaha erikangirirya n’obusondoli bw’omughaso.—Isaya 48:17, 18.
Oyukasubiraya erisaba	Esyonyimbo 65:2	Iyuwene-wene akahulikirira obuli musabe owakahebawa okw’iyo omw’ikirirya.
Nyine Oyu Nyine	Eriluayo 3:14	Akabya ekyanzire eribya nuku aberereraye ekighendererwa kiwe. Kandi ebinywe ebi byabirihindulhwamo “Ngendi syabya ekyosi-kyosi ekyo nyanzire” kutse “Ngendi Syabya ekyo nganzire eribya.” (The Emphasised Bible, by J. B. Rotherham; New World Translation) Eki kikathuwathikaya erisoborera erina, Yehova, eriri omwa mulhondo owakakwamako.—Eriluayo 3:15, NWT.
Buha	Eriluayo 34:14	Syali lighira omundu wosi-wosi kutse ekindu erimuyitsimbako omw’iramibwa. Kandi ekinywe eki kyabirihindulhwamo “syali ligha abakamuyitsimbako” kandi “asibwe ng’oyukanza eriramibwa iyo musa.”—New World Translation.
Omwami w’erikotha	1 Timoteo 1:17	Erithabalha liwe si riwithe enzuko kutse omuhindo.
Omukama	Esyonyimbo 135:5	Omwinye kindu; Kihebrania ʼA·dhohnʹ na ʼAdho·nimʹ.
Omwami Mukulhu w’emilhondo	Isaya 1:9	Kamanda w’amahe manene w’abamalaika
Ow’Endatha Kutsibu	Esyonyimbo 47:2	N’iyo awithe ekitsumbi ekilengireyo obukulhu.
Oyubuyirire	Emisyo 9:10	Abuyirire kutsibu (ahenirye kandi erire omwa by’esyongeso) kwilhaba owundi wosi-wosi.
Mubumbi	Isaya 64:8	Awithe obuthoki okwa bandu n’ebihanda, ngoku omubumbi awithe obuthoki okwa libumba.—Abanya Roma 9:20, 21.
Omuthongolya	Isaya 41:14	Erithasyaghulha abandu eribalhusya omwa kibi n’olhuholho omw’ikolesya endongolya ya Yesu Kristo.—Yoane 3:16.
Omuhanganiri (Olhukuka)	Esyonyimbo 18:2, 46	Aho thukabanira obusayiro n’omulhamu.
Omulhamya	Isaya 45:21	Akalhamaya okwa kabi kutse okw’ithoghothibwa.
Omulisya	Esyonyimbo 23:1	Akatsomana abaramya biwe.
Mwami Mukulhu	Enzuko 15:2	Awithe obuthoki obulengethukire; Kihebrania ʼAdho·naiʹ.

Amena w’emyanya omwa Masako w’Ekihebrania

Awandi mena w’emyanya omwa Biblia akabyamu erina lya Nyamuhanga, aliwe si wandi mena wa Nyamuhanga.

Ekikaleka ithwabya ithutholere eriminya n’erikolesya erina lya Nyamuhanga

Nyamuhanga anzire abandu ibaminya erina liwe, Yehova. Eki ni kikulhu kundi mwahiralyo omwa Biblia mirundi mingyi.—Malaki 1:11.
Mughalha wa Nyamuhanga, Yesu, mwakangania ngendo nyingyi omughaso w’erina lya Nyamuhanga. Ng’eky’erileberyako, mwasaba oku Yehova athi: “Erina lyawu libye libuyirire.”—Matayo 6:9; Yoane 17:6.
Abakaminya n’erikolesya erina lya Nyamuhanga bakakolha ebiika by’erimbere omw’ihiraho obunywani na Yehova. (Esyonyimbo 9:10; Malaki 3:16) Obughuma obuli ng’obu bukabathokesaya erighasirwa omwa mulhaghe wa Nyamuhanga owakabugha athi: ‘Nasyalhamya abo abanyanzire, nasyahanganira abandu abo abanyasi [“abasi erina lyaghe,” NWT].’—Esyonyimbo 91:14.
E Biblia yikakanganaya ndeke-ndeke yithi: “Nomuhangabya esikahulhawa mo nyamuhanga omo lhubulha kutse omo kihugho, kandi ngoku abandu bawithe esyonyamuhanga nyingyi, n’abakama bangyi.” (1 Abanya Korinto 8:5, 6) Aliwe kandi yikaminyikalhaya ndeke Nyamuhanga mughuma ow’ekwenene oko rina liwe, Yehova.

a Abandi basomi b’Ekihebrania banzire erina lya Nyamuhanga iryahindulhwamo “Yahweh.”

b Omwa bukuhi erina lya Nyamuhanga eryo ni, “Yah,” kandi likabanika mirundi nga 50 omwa Biblia, imwamune n’omughulhu likakolesibawa omwa kinywe “Haleluyah,” kutse “Alleluia,” ekikamanyisaya “Mupipe Yah.”—Eribisulirwa 19:1; American Standard Version; King James Version.

Eyindi Myatsi Eyihambene n'Eyi

Nyamuhanga E Biblia Erisubirya Okwa Bibulyo

Abema ba Yehova

Nyamuhanga Awithe Amena Mangahi?

Ekya Biblia yikasubiraya

Mbwino hane awandi mena wa Yehova?

Amena w’emyanya omwa Masako w’Ekihebrania

Ekikaleka ithwabya ithutholere eriminya n’erikolesya erina lya Nyamuhanga

Eyindi Myatsi Eyihambene n'Eyi

You May Also Like

Yehova Nindi?

Nyamuhanga Anawithe Erina?

Saba Eribungirwa