E Biblia yikakanaya oko syotatu murundi mughuma musa, omwa Abalawi 19:28, ahakabugha hathi: “Simwesyasakanga oko mibiri yenyu.” Nyamuhanga mwaha ekihanda kye Israeli ky’ekihano eki, busana n’eribahighulha oko baliranwa babu ababya bakasakanga oko mibiri yabu kw’amena kutse ehiminyikalho hy’esyonyamuhanga syabu. (Eryibuka Ebihano 14:2) Nomwakine indi Omughambo owahebawa Abaisraeli oyu syahambire oko Bakristayo, omusingyi owali omwa mughambo oyu ni w’erilengekaniako kutsibu.

Mbwino Omukristayo anatholere eriyihirako etatu kutse esyonzole?

 Emilhondo eyiri ahikwa hano yangana kuwathikya erighanirya oko mwatsi oyu:

•   “Abakali nabo bambale esyongyimba esitholerebo.” (1 Timoteo 2:9) Omusingyi oyo akahamba oko bakali n’abalhume. Thutholere ithwasikya eriyowa ly’abandi kandi si thutholere thukakura obulengekania bw’abandi omo nzira eyithatholere.

•   Abandi banzire ibaminyikalya ekyo bali n’erikangania ku banzire eriyithabalhako. Aliwe e Biblia yikahabulha Abakristayo yithi: “Muheyo emibiri yenyu ng’obuhere obuliho, obubuyirire, obukalighawa na Nyamuhanga, omubiiri owabuyirire haghuma n’amaaka wenyu aw’erighanirya.” (Abanya Roma 12:1, NWT) Kolesaya ‘amaaka wawu w’erighanirya’ erilebya ekikaleka iwanza etatu. Lyamabya inianza erikolha ekya bangyi bakakolha kutse erikangania ku wuli w’egurupu ndebe, wibuke ngoku eriyowa lyawu lyangabya ly’obuthuku buke kwilhaba obw’etatu. Erilebya ebighendererwa byawu kyangana kuwathikya erithwamu ndeke.—Emisyo 4:7.

•   “Amalengekania w’ab’omuhwa akaletha bingyi; nikwa obuli mundu w’epaku-paku n’ibulha lisa.” (Emisyo 21:5) Mughulhu mungyi erithwamu erihirwako etatu likakolhawa omw’iharabana, aliwe lyangana hamba nabi oko banywani bawu n’omubiiri wawu ahabw’obuthuku buuli. Esyotatu si mwatsi w’amasatha kandi sikalire eriyilhusya syoko. Erisekulya—kuthya n’ebizinesi y’amani ey’erilhusya okwa bandu kw’esyotatu—bikakanganaya ngoku abangyi b’okwa bawithe esyotatu bakabugha bathi ambi mubathayihira syoko.