Abangyi abakayibulhaya ebibulyo ebi bakabya ibabiriholerwa abandu babu kandi bakabya isibali sondaya eby’erisubirya bisa aliwe kandi n’erihumulikanibwa. Abandi bakalhangira erithibwa ly’Abayuda bangyi ng’ekindu kibi kutsibu ekyo mundu angakolha, neryo kikabakalira erikirirya omu Nyamuhanga.

 Ebinyambwirwa: Sikihikire eribulya ekyaleka Nyamuhanga inialighira Abayuda bangyi erithibwa.

 Okwenene: Abandu abawithe erikirirya erighumire babiribulya ekikaleka Nyamuhanga inialekereraho obubi. Ng’eky’erileberyako, Omuminyereri Habakuki mwabulya Nyamuhanga athi: “Busana naki wukaleka inalhangira ebibi, n’erisamalira obubi kwehi? Egha, obuherya n’omwagha biri embere syaghe; kandi hali amalhwa, n’erineghena bikahulhuka.” (Habakuki 1:3) Omwakanya k’erihangabura Habakuki, Nyamuhanga mwalhangira athi ebibulyo eby’abulhaya bikahandikawa omwa Biblia nuku bisomawe n’abandu abosi.

 Ebinyambwirwa: Nyamuhanga syali tsomana eriaghalhwa ly’abandu.

 Okwenene: Nyamuhanga aponire obubi n’eriaghalhwa erikalhwiririramo. (Emisyo 6:16-19) Omwa buthuku bwa Noa, Nyamuhanga mwakwa “obulighe omo muthima wiwe” busana n’obubi erikanyirira omwa kihugho. (Enzuko 6:5, 6) Ahathe erithika-thika, Nyamuhanga kandi mwayowa nabi kutsibu Abayuda bangyi bak’ithibwa.​—Malaki 3:6.

 Ebinyambwirwa: Abayuda bangyi erithibwa lyabya isuyira erilhua oku Nyamuhanga.

 Okwenene: Nyamuhanga mwalighira Abaroma erithoghothya e Yerusalemu omwa kighana ky’erimbere. (Matayo 23:37–24:2) Neryo, eritsuka-tsukana n’aho, sihali ekihanda kirebe ekyo Nyamuhanga akasighika omwa malhwa kutse erisuyira. Oku Nyamuhanga, “sihali erisombolha busana n’abandu bosi, kutse Omuyuda, kutse omundu w’Ebihanda.”​—Abanya Roma 10:12.

 Ebinyambwirwa: Ku habya ihane Nyamuhanga ow’olhwanzo kandi ow’obuthoki, angakakirye Abayuda bangyi okw’ithibwa.

 Okwenene: Nomwakine indi Nyamuhanga yuthalethaho eriaghalhwa, hakanayira inialilekereraho ahabw’akathuku.​—Yakobo 1:13; 5:11.

 Nyamuhanga mwalighira eki kibye busana n’enzumwa ngumerera eyinalekire inialekereraho eriaghalhwa ly’abandu: erithoka erighunzaho omwatsi owabuthukaho kera kera. E Biblia yikakanganaya ndeke-ndeke ngoku lino Diabolo yukathabalha ekihugho, butsira Nyamuhanga. (Luka 4:1, 2, 6; Yoane 12:31) Hane esyonzumwa ibiri omwa Biblia esyanga thuwathikya eriminya ekyaleka Nyamuhanga inialighira Abayuda bangyi erithibwa.

1.   Nyamuhanga mwahangika abandu n’eribaha obughabe bw’eriyithwiramu. Nyamuhanga mwabwira abandu ab’erimbere, Adamu na Eva, ebyo aby’anzire ibakolha, aliwe mwathabakaka erimwowa. Mubayithwiramu ekibuya n’ekibi nga ky’ekyahi, neryo erithwamu nabi lyabu​—n’erithwamu eriri ng’eryo erya bandu babiribya ibanemukolha​—lyabirilethera abandu b’ebitsibu ebikalire. (Enzuko 2:17; 3:6; Abanya Roma 5:12) Ekyo kikahambangana n’ebya ekitabu Statement of Principles of Conservative Judaism kikabugha: “Eriaghalhwa lingyi eriri omwa kihugho likalhwiririra omw’ikolesya nabi obughabe bw’eriyithwiramu obwathwahebawa.” Omwakanya k’erithwihako obughabe bwethu bw’eriyithwiramu, Nyamuhanga abiriha abandu b’obuthuku bw’eriyithabalhako ahabwabu.

2.   Nyamuhanga akendi syaghunzaho ebyosi ebyalhwiririra omw’ithibwa ly’Abayuda bangyi. Nyamuhanga akalhaghanisaya erilhubukya esyomiliyoni sy’abandu ababiriholha, imwamune n’Abayuda bangyi ab’ithibawa. Kandi akendi syaghunzaho obulhumi obo abalhama okw’ithibwa ly’Abayuda bangyi bawithe busana n’ebikitha obuba ebyo bak’ibuka. (Isaya 65:17; Emibiri 24:15) Kundi Nyamuhanga anzire abandu ba kutsibu, akendi syaberererya emilhaghe eyo.​—Yoane 3:16.

 Abangyi abahambawako Abayuda bangyi bak’ithibwa n’abalhama okw’ithibwa mubathoka erisighalha ibanamakirire erikirirya lyabu n’eribana ekighendererwa ky’engebe omw’iminya ekikaleka Nyamuhanga inialekereraho obubi kandi ngoku anzire erighunzaho ebikalhwiririramu.