Ekibi kutse erilholho y’emikolere yosi-yosi, eriyowa, kutse amalengekania ebihukene okwa bihano bya Nyamuhanga. Mwamuli erithwa ebihano bya Nyamuhanga omw’ikolha ebithuwene, kutse ebithathunganene, embere sya Nyamuhanga. (1 Yoane 3:4; 5:17) Kandi e Biblia yikakanaya okwa kibi eky’erithendi kolha ekihikire ekya wunasi.​—Yakobo 4:17.

 Omwa mibughe eyo Biblia yatsuka erihandikwamo, ebinywe ebikahindulhawamo ekibi bikamanyisaya “eritarukya,” kutse erithendi tebberera. Ng’eky’erileberyako, omwa Israeli kera, egurupu y’abasirikali babya basi ndeke erirungya amabwe “buthalhabya.” Ekinywe ekyo, kyamahindulhwa ngoku kine, ikyangana somwa kithi “buthakolha kibi.” (Abatsweri 20:16) Busana n’ekyo, erikolha ekibi, ni taruka okwa bihano bya Nyamuhanga ebihikene.

 Ng’Omuhangiki, Nyamuhanga awithe ehamuli ey’eribya iyuwanga hiriraho abandu eby’erighenderako. (Eribisulirwa 4:11) Thuli b’erilhuthonda embere siwe busana n’ebya thukakolha.​—Abanya Roma 14:12.

Kyangana thokekana eriyihighulira ighuma okw’ikolha ekibi?

 Eyihi. E Biblia yikabugha yithi “abandu bosi babirikolha ebibi, kandi sibehika okwa lhukengerwa lhwa Nyamuhanga.” (Abanya Roma 3:23; 1 Abami 8:46; Omugambuli 7:20; 1 Yoane 1:8) Busana naki kiri kithya?

 Abandu b’erimbere, ya Adamu na Eva, sibabya bawithe kibi okw’itsuka. Ekyo kyabya kundi mubahangikwa ibahikene, omwa kisosekanio kya Nyamuhanga. (Enzuko 1:27) Aliwe, mubaherya erihikana lyabu omw’ithendiowa Nyamuhanga. (Enzuko 3:5, 6, 17-19) Babere babutha abaana, mubabasighalirya ekibi n’obuthahikana. (Abanya Roma 5:12) Ngoku Omwami Dawudi we Israeli abugha, ‘Indi mubi eritsuka ekiro nabuthawa.’​—Esyonyimbo 51:5.

Mbwino ebindi bibi bikalire kutsibu kwilhaba ebindi?

 Ee. Ng’eky’erileberyako, e Biblia yikabugha yithi abandu be Sodomo babya “babi abakoli b’amalholho kutsibu” abo ebibi byabo byabya “bitsibu kundu” kutse ibikalire kutsibu. (Enzuko 13:13; 18:20) Thulebaye esyonzumwa isathu esikaleka ithwaminya obulithohe bw’ekibi.

1.   Erikalha ly’ekibi. E Biblia yikathuthangira ighuma okw’ikolha ebibi ebikalire kutsibu ng’obusingiri, eriramya esyosanamu, obwibi, obuthamiri, obunyeyi, obwithi, n’eby’obukumu. (1 Abanya Korinto 6:9-11; Eribisulirwa 21:8) E Biblia yikakanganaya embaghane eyiri ahakathi-kathi k’ebibi ebi n’ebibi ebikakolhawa buthalengekania, n’omw’ithendi kighenderera, ng’eky’erileberyako, ebya thukabugha n’ebya thukakolha ebikahithanaya abandi. (Emisyo 12:18; Abanya Efeso 4:31, 32) Aliwe, e Biblia yikathuhira mw’omuhwa ow’erithendi lhangira ekyo thulyakolha nga si kibi kutsibu, kundi ekyo kyangana leka ithw’ongera erithwa ebihano bya Nyamuhanga.​—Matayo 5:27, 28.

2.   Ekighendererwa. Ebindi bibi bikanakolhawa busana n’erithendi minya ebyo Nyamuhanga akayithagha. (Emibiri 17:30; 1 Timoteo 1:13) Nomwakine indi siyiri gheghena ebibi ng’ebi, e Biblia yikabighabulha okwa bibi ebikakolhawa omw’ithwa ebihano bya Nyamuhanga omw’ikighenderera. (Emiganzo 15:30, 31) Ebibi ebikakolhawa omw’ikighenderera bikalhua omwa ‘muthima mubi.’​—Yeremia 16:12.

3.   Emirundi. Kandi e Biblia yikakanaya okwa mbaghane eyiri ahakathi-kathi k’ekibi ekikakolhawa murundi mughuma n’ekikabera erisubirirwamo ahabw’omughulhu muuli. (1 Yoane 3:4-8) Abakakolha “ebibi omwa pono [omw’ikighenderera],” nibya ibabiriminya ngoku bangakolha ekihikire, bakabana eritswera lya Nyamuhanga.​—Abaebrania 10:26, 27.

 Abakakolha ebibi ebikalire kutsibu bangana yowa nabi busana n’obulithohe bw’ebisobyo byabu. Ng’eky’erileberyako, Omwami Dawudi mwahandika athi: “Erihalya lyaghe likanyitha, lyamanyirithohera ng’omuheke alithohire.” (Esyonyimbo 38:4) Aliwe e Biblia yikaha amaha ano: “Omubi aleke enzira yiwe, n’omundu oyuthathunganene aleke amalengekania wiwe. Asube oko Mwami Mukulhu, nayu asyamughanyira; asube ahali Nyamuhanga wethu, kusangwa asyamubuyira ndeke.”​—Isaya 55:7.