Ekibulyo ekihambire okwa kighendererwa ky’engebe ikyangana bulibwa omwa nzira nyingyi nga hino, Busana naki muthwahangikwa? kutse Engebe yaghe yinawithe ekighendererwa? E Biblia yikakanganaya ngoku ekighendererwa ky’engebe yethu ly’eribya n’obughuma na Nyamuhanga. Thalengekania okwa kwenene eno eyiri omwa Biblia.

•   Nyamuhanga ni Muhangiki wethu. E Biblia yikabugha yithi: “Iyo [Nyamuhanga] mwathuhangika, nethu thuli biwe.”​—Esyonyimbo 100:3; Eribisulirwa 4:11.

•   Nyamuhanga ahangika ebyosi nethu imwathune iniawithe ekighendererwa.​—Isaya 45:18.

•   Nyamuhanga mwathuhangika n’obwagha bw’eby’obunyakirimu, imwamuli eriyisunza eribana ekighendererwa ky’engebe. (Matayo 5:3) Anzire ithwaberererya eriyisunza eryo.​—Esyonyimbo 145:16.

•   Thukaberereraya obwagha bwethu obu omw’ibya n’obunywani na Nyamuhanga. Nomwakine indi abangyi bangana lengekania bathi sikyanga thokekana eribya munywani wa Nyamuhanga, e Biblia yikathubwira yithi: “Muyithunde hakuhi na Nyamuhanga, nayu akendi yithunda hakuhi nenyu.”​—Yakobo 4:8; 2:23.

•   Erithoka eribya munywani wa Nyamuhanga, thutholere ithwakangania ku thunemughenda-ghendania n’ekighendererwa kiwe busana nethu. E Biblia yikakanganaya ekighendererwa eki omwa Omugambuli 12:13: “Wubahe Nyamuhanga, wutheghaye ebihano biwe, kusangwa ebi byo bitholere ndeke busana n’obuli mundu.”

•   Omwa buthuku obukasa, thwangana syayilhangirira omwa buswire ekighendererwa kya Nyamuhanga eky’erimbere busana nethu akaghunzaho eriaghalhwa n’eriha banywani biwe abakamuramaya engebe y’erikotha.​—Esyonyimbo 37:10, 11.