Ng’ekitsweka ky’okw’ihayo erisighika eriramya ly’okwenene, Abaisraeli mubalhaghirwa erihayo ekighuma ky’omw’ikumi, a oko mingirirye yabo y’obuli mwaka. Nyamuhanga mwababwira athi: “Mwasyabana ekighuma ky’omw’ikumi oko byosi omw’ikanya ly’esyombutho syenyu esikalhua omwirima lyenyu oko mwaka n’oko mwaka.”—Eryibuka Ebihano 14:22.

 Ekihano ky’erihayo ekighuma ky’omw’ikumi kyabya kitsweka ky’okwa Mighambo ya Musa, emighambo eyo Nyamuhanga aha Abaisraeli. Abakristayo sibali ahisi sy’Emighambo ya Musa neryo sibatholere bakahayo ekighuma ky’omw’ikumi. (Abanya Kolosai 2:13, 14) Omwakanya k’ekyo, obuli Mukristayo atholere iniahayo esyosente “ngoku abiriyisogha omo muthima wiwe; syahe n’obuhemo kutse erikunwa; kusangwa Nyamuhanga anzire omundu oyukaha n’eriyisyandira.”—2 Abanya Korinto 9:7.

• Ekighuma ky’omw’ikumi omo Biblia—“Endaghano eya Kera”

• Ekighuma ky’omw’ikumi omo Biblia—“Endaghano Nyihya-nyihya”

 Ekighuma ky’omw’ikumi kikakanibawako mirundi mingyi omo kitsweka kye Biblia ekyasibwemo Endaghano eya Kera. Ekighuma ky’omw’ikumi kikakanibawako kutsibu Emighambo ya Musa yalihebirwe Abaisraeli erilhabira omu Musa. Aliwe oko bundi buthuku mukyanakanibwako emighambo yithe yahebwa.

Emighambo ya Musa yithe yahebwa

 Omundu w’erimbere oyukanibweko ng’oyuwahayo ekighuma ky’omw’ikumi ni Abramu (Abrahamu). (Enzuko 14:18-20; Abaebrania 7:4) Ekighuma ky’omw’ikumi ekya Abramu ahayo kikabya nga kyabya kihembo ekyahebawa omwami omuhereri owe Salemi murundi mughuma musa. Omo Biblia simuli obwema obukakanganaya indi Abrahamu kutse abaana biwe mubahayo ekindi kighuma ky’omw’ikumi.

 Omundu wakabiri oyukanibweko omo Biblia akahayo ekighuma ky’omw’ikumi ni mwitsikulhu wa Abrahamu ya Yakobo. Mwayilhagha athi Nyamuhanga amamutsumulha, iniakendiha Nyamuhanga “y’ekighuma ky’omw’ikumi” eky’okwa ebyo ahebawa. (Enzuko 28:20-22) Erikwamana n’abandi basomi be Biblia, Yakobo angabya imwathuha ekighuma ky’omw’ikumi eki omw’ihayo obuhere bw’ebisoro. Nomwakine indi Yakobo mwayisema omw’iyilhagha eri, mwathabugha athi eka yiwe nayu yikendihayo ekighuma ky’omw’ikumi.

Ahisi sy’Emighambo ya Musa

 Abaisraeli mubalhaghirwa erihayo ekighuma ky’omw’ikumi ng’enzira ey’erisighikiramo emibiiri yabo y’edini.

•   Ekighuma ky’omw’ikumi ikikaleka abakoli b’edini ab’omughulhu wosi ibabana ebiyithawa byabu—Abalawi, imwamune abahereri—abathabya bawithe malima awabo w’eririma. (Emiganzo 18:20, 21) Abalawi abathabya bahereri ibakahebawa ekighuma ky’omw’ikumi erilhua oko bandu kandi ibakahayo ekyo banga thoka “ekihande kighuma ky’omw’ikumi omo kihande kighuma ky’omw’ikumi” oko bahereri.—Emiganzo 18:26-29.

•   Ekighuma ky’omw’ikumi eky’omwaka wakabiri kikabya nga mukyayithaghisibwa, ekyabya kikaghasira Abalawi n’abathe Balawi. (Eryibuka Ebihano 14:22, 23) Abaisraeli ibakakolesaya ebikahebawayo ebi oko mikonga y’embaghane, kandi okwa yindi myaka ibakanabihako abera eribawathikya eribyaho.—Eryibuka Ebihano 14:28, 29; 26:12 .

 Ekighuma ky’omw’ikumi ikikabarawa kithi? Abaisraeli ibakahighulha ekighuma ky’omw’ikumi ekya eririma lyabo lyabya likahulhukya obuli mwaka. (Abalawi 27:30) Ibakabya bamathwamu eriliha ekighuma ky’omw’ikumi eki omo syosente butsira ebyalya, ibakabya b’erikyongera pasente 20. (Abalawi 27:31) Kandi mubalhaghirwa erihayo ‘ekighuma ky’omw’ikumi ky’ende kutse eky’esyombuli.’—Abalawi 27:32.

 Erithoka eriminya ekighuma ky’omw’ikumi eky’ebihangulho byabo, Abaisraeli ibakasombolha obuli kisoro ky’erikumi ekyabya kikahulhuka omo kihangulho kyabu. Emighambo iyikabugha yithi isibalebaya kutse erihindulha ebisoro ebyabirisombolhwa ebi, kutse erihingisya ekighuma ky’omw’ikumi kyabyo mo sente. (Abalawi 27:32, 33) Aliwe, ekighuma ky’omw’ikumi ekyakabiri ekyabya kikakolesibwa okwa mikonga y’obuli mwaka ikikahindulhawamo sente. Endegheka eyi muyathokesya ndeke Abaisraeli ababya bakaghenda lhughendo lhuli eriyahindana oko mikonga.—Eryibuka Ebihano 14:25, 26.

 Abaisraeli ibakahayo ekighuma ky’omw’ikumi mughulhu wahi? Obuli mwaka. (Eryibuka Ebihano 14:22) Aliwe, obuli mwaka w’omusanju ihakabya ekindu ky’embaghane. Omwaka oyo ini sabato, kutse omwaka w’erilhuhuka, Abaisraeli isibali lima byalya byosi-byosi . (Abalawi 25:4, 5) Erithoka erikolha ekindu ky’embaghane eki, isihalibya erisorokya ekighuma ky’omw’ikumi oko maghese. Obuli mwaka wakasathu n’ow’omukagha ow’esabato ey’emyaka musanju, Abaisraeli ibakaha abera n’Abalawi okwa kighuma ky’erikumi ekyakabiri.—Eryibuka Ebihano 14:28, 29.

 Ini kyahi ekyabya kikabya oko bathehayo ekighuma ky’omw’ikumi? Emighambo ya Musa muyithabugha ekyangabya oko bakalemawa erihayo ekighuma ky’omw’ikumi. Erihayo ekighuma ky’omw’ikumi lhwabya lhukwamirwa. Abaisraeli ibakabwira Nyamuhanga ngoku babirihayo ekighuma ky’omw’ikumi kandi ibasaba Nyamuhanga bathi abatsumule busana n’erikolha ekyo. (Eryibuka Ebihano 26:12-15) Nyamuhanga iniakalhangira erithendihayo ekighuma ky’omw’ikumi ng’erimwiba.—Malaki 3:8,  9.

 Mbwino erihayo ekighuma ky’omw’ikumi abya muheke munene? Eyihi. Nyamuhanga mwalhaghanisya ekihanda kye Israeli athi bamaletha ekighuma ky’omw’ikumi, iniakendi buthulirako emighisa yiwe kandi ibathabulha kindu. (Malaki 3:10) Oko lhundi lhuhandi, ekihanda kye Israeli ikikabana ebitsibu kyamathendi hayo ekighuma ky’omw’ikumi. Isibali bana emighisa ya Nyamuhanga kandi isibali ghasirawa omo mubiiri ogho abahereri n’Abalawi babya bakakolha abo babya ibabirilekerania.—Nehemia 13:10; Malaki 3:7.

 Yesu iniane okwa kihugho, abaramya ba Nyamuhanga babya ibakinayithaghisibawa erihayo ekighuma ky’omw’ikumi. Aliwe eki mukyahwaho Yesu abiholha.

Omo biro bya Yesu

 Omo yasibwemo ng’Endaghano Nyihya-nyihya, e Biblia yikakanganaya ngoku Abaisraeli mubalholha embere erihayo ekighuma ky’omw’ikumi Yesu iniane oko kihugho. Mwaligha ngoku lhwabya lhukwamirwa lhwabu erihayo ekighuma ky’omw’ikumi ekyo, aliwe mwatsweba abakulhu b’edini ababya bakahayo ekighuma ky’omw’ikumi aliwe ‘ibaleka emyatsi mikulhu kw’aho y’emighambo ng’eribanza, erighanyira, n’erithendi leghulha.’—Matayo 23:23.

Enyuma wa Yesu eriholha

 Yesu abere abiriholha, erihayo ekighuma ky’omw’ikumi mulyabya isirikiyithaghisibawa. Olhuholho lhwa Yesu olhw’eriyihayo mulhwalhusyaho, kutse erighunzaho, Emighambo ya Musa, imwamune ‘n’omughambo ow’erimya [erisorokya] ekihande ky’omw’ikumi.’—Abaebrania 7:5, 18; Abanya Efeso 2:13-15; Abanya Kolosai 2:13, 14.