Eyihi, ekithaka sikyendi syathoghothibwa, erihisibwa omo muliro, kutse erihangika ekindi. E Biblia yikabugha yithi Nyamuhanga mwahangika ekihugho k’ikalhawemo kera na kera.

•   “Abathunganene basyikalha omo kihugho mwa buholho, n’erisighalyakyo kera na kera.”​—Esyonyimbo 37:29.

•   “[Nyamuhanga] mwahanda ekihugho kyo ndeke okwa bibanza byakyo, ikithasyasegheribwa na kera.”​—Esyonyimbo 104:5.

•   “Ekihugho kikakotha.”​—Omugambuli 1:4.

•   “Oyo wabumba ekihugho, n’erihangikakyo mwahanganiakyo, mwathahangikakyo eribya mulhalha, mwabumbakyo kikalhawemo.”​—Isaya 45:18.

 Nyamuhanga syendi syalighira abandu eritsandirya ighuma ekihugho omo bindu ebikatsandaya eby’obuhangwa, esyonyuhi, kutse omwa sindi nzira. Aliwe, akendi ‘syathoghothya abandu abakatsandaya ekihugho.’ (Eribisulirwa 11:18) Ekyo akendi syakikolha athi?

 Nyamuhanga akendi syasubya Obwami bw’elhubulha obuhikene omo mwanya w’esyogavumente sy’abandu esyabirilemwa eritheya ekihugho. (Danieli 2:44; Matayo 6:9, 10) Obwami obo bukendi syabya ibukathabalhawa na Mughalha wa Nyamuhanga, Yesu Kristo. (Isaya 9:6, 7) Yesu iniane okwa kihugho, mwakolha ebithiko-thiko birebe erikangania kw’awithe amaaka w’erisondolha eby’obuhangwa. (Mariko 4:35-41) Iyo ng’Omwami w’Obwami bwa Nyamuhanga, Yesu akendi syathabalha omo buswire ekihugho n’amaaka wakyo w’obuhangwa. Akendi syuwania ebiri okwa kihugho, erileka bisose ng’ebyabya omw’Irima lye Edeni.​—Matayo 19:28; Luka 23:43.

 Eyihi, siyiri bugha yithya. Mughulhu mungyi amalengekania awathahikire ayo akasa busana n’erithendi yitheghererya ebiri omu 2 Petero 3:7, ahakabugha hathi: ‘Olhubulha lhwa sesene, n’ekihugho kyasesene, bibikire busana n’erihisibwa omwa muliro.’ Thulebaye esyonzumwa ibiri ngulhu-ngulhu esikathuwathikaya eriyitheghererya ebinywe ebi nga bikamanyisayaki:

1.   E Biblia yikakolesaya ebinywe “olhubulha,” “ekihugho,” na “omuliro” erimanyisya bindu bingyi. Ng’eky’erileberyako, Enzuko 11:1 hathi: “Ekihugho kyosi mukyabya na mubughe mughuma.” Hano, “ekihugho” kikamanyisaya abandu.

2.   Ebithimbire oku 2 Petero 3:7 bikakanganaya olhubulha, ekihugho, n’omuliro nga bikamanyisayaki. Omulhondo 5 na 6 yikakanaya okw’Ighunga ly’Amaghetse ery’omwa biro bya Noa. Oko buthuku obo, ekihugho kya kera mukyathoghothibwa, aliwe ekithaka mukithathoghothibwa. Omwakanya k’ekyo, Erighunga ly’Amaghetse mulyaherya abandu babi ni bugha ambu “ekihugho.” (Enzuko 6:11) Kandi mukyathoghothya “olhubulha,” ni bugha ambu abandu ababya bakathabalha okwa kihugho. Neryo kwesi, abandu babi b’abathoghothibwa, butsira ekithaka. Noa n’eka yiwe mubalhama okw’ithoghothibwa eryo, bamathasyikalha oko kihugho enyuma w’Erighunga ly’Amaghetse.​—Enzuko 8:15-18.

 Erisosana n’amaghetse w’Erighunga ly’Amaghetse, erithoghothibwa, kutse “omuliro,” owali omu 2 Petero 3:7 akendi syaghunzaho abandu babi, butsira ekithaka. Nyamuhanga akalhaghanisaya “olhubulha n’ekihugho bihya-bihya, aho ekithunganene kikasiba.” (2 Petero 3:13) “Olhubulha lhuhya-lhuhya,” kutse obuthabali buhya, ni bugha ambu Obwami bwa Nyamuhanga bukendi syathabalha oko “kihugho kihya-kihya,” ni bugha ambu ekithunga kihya ky’abandu. Omw’isi sy’Obwami obo, ekihugho kikendi syabya paradiso eyiri mw’obuholho.​—Eribisulirwa 21:1-4.