E Biblia yikabugha yithi erisonda lya Nyamuhanga busana n’abandu liri lithi ‘bayihighule oko lhuthetho.’ (1 Abanya Tesalonika 4:3) Ngoku kikolesibirwe omo Biblia, ekinywe “olhuthetho” mwamuli oburaghane, ab’olhubutho lhughuma erikolhanako emyatsi y’engyingo, n’emyatsi y’engyingo ahakathi-kathi k’omulhume n’omukali abathathahenie.

• Busana naki omwatsi w’omulhume n’omukali eringira omo butheke kutse erithend’ingiramo akahamba oku Nyamuhanga?

• Kandi ibbwa omulhume n’omukali eribya haghuma isibathahenie erilebya nga bangana tsema bamathahania?

• Abathahenie banga ghumya bathi obutheke bwabu?

•   Endegheka y’obutheke yikalhua oku Nyamuhanga. Mwatsukisya obutheke omughulhu ahira omulhume n’omukali ab’erimbere bo haghuma. (Enzuko 2:22-24) Si kyabya kighendererwa kya Nyamuhanga omulhume n’omukali erikalha haghuma isibathahenie.

•   Nyamuhanga anasi ekibuya ekitholere abandu. Mwahiraho obutheke eribya endegheka eya kera na kera ahakathi-kathi k’omulhume n’omukali erighasira n’eritheya abosi omw’eka. Thulebaye eky’erileberyako ekyolhobire kino. Ngoku obusondoli obukalhua oko yuwakokothaya ekindu kirebe bukakukanganaya ngoku wanga kithondekania, obusondoli bwa Nyamuhanga bukathubwira ngoku thwanga ghumya obughuma bw’omw’eka. Mughulhu mungyi amathegheko wa Nyamuhanga akaghasira abakaghendera kugho.—Isaya 48:17, 18.

•   Obusingiri bwangana lhwiririramo ebitsibu ebikalire. Ng’eky’erileberyako, mwanganalhua obukule obuthanzibirwe, amalhwere, n’eriyowa nabi.

•   Nyamuhanga mwaha omulhume n’omukali b’amaaka w’eributha erilhabira omo myatsi y’engyingo. Nyamuhanga akalhangira engebe mwa yibuyirire, n’amaaka w’eributha ni kihembo ky’obughuli. Nyamuhanga anzire ithwasikya ekihembo ekyo omw’iha endegheka yiwe y’obutheke y’ekitsumbi.—Abaebrania 13:4.

 Ekindu kikulhu ekikaleka obutheke ib’uwana siry’eribya haghuma “habw’obuthuku buke” erilebya nga mwangana thoka nuku obuli mughuma asyathunga obwiranda bw’eribikyako. Omwakanya k’ekyo, obutheke bukalholha embere omulhume n’omukali bamayiherayo ighuma owundi busana n’owundi n’erikolha haghuma erirwanisya ebitsibu. a Obutheke bukakamathaya eriyihayo lyabu.—Matayo 19:6.

 Sihali obutheke obuhikene. Aliwe abathahenie banganabya n’obutheke obughumire omw’ighendera okw’ihabulha lye Biblia. Hano hane eby’erileberyako bike:

•   Hira ebiyithawa by’omwanze wawu by’embere oko byawu.—1 Abanya Korinto 7:3-5; Abanya Filipi 2:3, 4.

•   Mwanzane n’erisikania.—Abanya Efeso 5:25, 33.

•   Igha erikakirya ebya wukabugha.—Emisyo 12:18.

•   Ghumisirizaya kandi anguhirawa erighanyira.—Abanya Kolosai 3:13, 14.