Ee. Nyamuhanga akatsomana abaghombe biwe abalhwere. E Biblia yikabya yikakania okwa mughombe wa Yehova omuthaleghulha yikabugha yithi: “Omwami Mukulhu asyamuwathikya omughulhu alhwere.” (Esyonyimbo 41:3) Wamabya iwulhwere obulhwere obuthelhama, ebindu bisathu bino byangana kuwathikya:

1.   Saba amaaka w’eriyiyinia. Wangana bana “obuholho bwa Nyamuhanga, obulhabire amenge wosi,” obwanga kehya erihangya-hangya lyawu n’erikuwathikya.​—Abanya Filipi 4:6, 7.

2.   Ibya n’amalengekania awatholere. E Biblia yikabugha yithi: “Omuthima w’eritsema ni busaki buwene; nikwa ekirimu ekibbunikire kikumaya amakuha.” (Emisyo 17:22, Embindulha ye Kinandi) Lengaho eribya iwunatsemire, kundi eki ikikendi leka iwalhangirika ndeke kandi kyangana ghasira amaghalha wawu.

3.   Ghumaya amaha wawu aw’obuthuku obukasa. Amaha anganaleka iwabya iwunatsemire nomuwangabya iwunalhwere obulhwere obuthelhama. (Abanya Roma 12:12) E Biblia yikakanaya okwa buthuku omughulhu “sihali endulhani eyikendi syabugha yithi, Nyilhwere.” (Isaya 33:24) Nyamuhanga akendi syalhamya amalhwere awathelhama awabirilema abanya sayansi. Ng’eky’erileberyako, e Biblia yikabya yikakania okwa bakekelhuhire erisuba minyethu yikabugha yithi: “Omubiri wiwe athendere kwilhaba ow’omwana; asube oko biro by’amaaka w’obulhwana bwiwe.”​—Yobu 33:25.

 Minya kino: Nomwakine indi Abema ba Yehova bakaligha obuwathikya obwa Nyamuhanga akaha, bakaghenda n’okwa sipatara omughulhu balhwere obulhwere obuthelhama. (Mariko 2:17) Aliwe, sithuli hamaya okwa mithambirire mirebe thuthi y’eyitholere; thunasi ngoku obuli mundu atholere iniayithwiramu bikahika okwa by’emithambirire.