Omwa Biblia simuli ekihano ekihambire okw’ihamu obukule. Aliwe, emilhondo mingyi ye Biblia yikaha amalengekania agho Nyamuhanga awithe oko ngebe y’omundu, imwamune n’ey’omwana oyuthe wabuthwa.

 Engebe ni kihembo erilhua oku Nyamuhanga. (Enzuko 9:6; Esyonyimbo 36:9) Akalhangira engebe yosi mwa y’obughuli, imwamune n’engebe y’omwana oyuli omo nda. Neryo omundu amakighenderera eritha omwana oyuthe wabuthwa, obo ini bwithi.

 Emighambo ya Nyamuhanga oko Baisraeli iyikabugha yithi: “Abandu bamalhwa haghuma, bakahuthalya omukule, obukule bukalhuako, nikwa sihali kindi kikamuhikako; kwenene asyaliha endihi ngoku iba w’omukali asyamutswera, kandi asyaliha ngoku abatsweri basyabugha. Nikwa amaswahulhuka kw’obubi, neryo engebe busana n’engebe.”—Eriluayo 21:22, 23. a

• Engebe y’omundu yikatsuka mughulhu wahi?

• Mbwino Nyamuhanga anemwendi syaghanyira omundu oyuwabirihamo obukule?

• Mbwino nina kibi erihamo obukule engebe ya mama kutse ey’omwana yamabya iyiri omo kabi?

 Nyamuhanga akalhangira engebe y’omundu ng’eyikatsuka omundu akaheka obukule, (obuhalya n’eriya bikasangangana). Omo Kinywe kiwe, e Biblia, mighulhu mingyi Nyamuhanga akakanaya oko mwana oyuthe wabuthwa ng’omundu ahabwiwe. Thalhangira eby’erileberyako birebe ebikakanganaya ngoku Nyamuhanga akabugha athi sihali embaghane ahakathi-kathi k’engebe y’omwana oyuthe wabuthwa n’oyuwabiributhwa.

•   Omw’isondolibwa na Nyamuhanga, Omwami Dawudi mwabwira Nyamuhanga athi: “Muwanyilholhako isindi nabuthwa.” (Esyonyimbo 139:16) Nyamuhanga mwalhangira Dawudi ini mundu ahabwiwe nibya isyali abuthwa.

•   Eryongera okw’ekyo, Nyamuhanga abya inianasi ngoku anawithire omuminyereri Yeremia y’ekighendererwa eky’embaghane nibya Yeremia isyali abuthwa. Nyamuhanga mwamubwira athi: “Embere ndenakuhangika omo nda monakuminya, n’embere wuthe walhua omo nda monakuhighulha. Nabirikuyiramo muminyereri oko bihanda.”—Yeremia 1:5.

•   Omuhandiki we Biblia ya Luka, omudokita, mwakolesya ekinywe ikyan’ekyo eky’Ekigiriki akakania oko mwana oyuthe wabuthwa n’oyuwabiributhwa.—Luka 1:41; 2:12, 16 .

 Ababirihamo obukule bangana bana erighanyira lya Nyamuhanga. Lino bamaligha amalengekania agho Nyamuhanga awithe oko ngebe, sibatholere bakayowa nabi busana n’eriyowa ng’abali kw’olhubanza. “Omwami Mukulhu ni w’erighanyira n’ow’olhwanzo . . . Ngoku endatha yiri haali okw’eyikwa, abirilhusya ebibi byethu byo haali okw’ithwe athya.” b (Esyonyimbo 103:8-12) Yehova akendi syaghanyira abakayisubamo omo kwenene busana n’ebibi ebyo bakolha kera, imwamune n’erihamo obukule.—Esyonyimbo 86:5.

 Mbwino nina kibi erihamo obukule engebe ya mama kutse ey’omwana yamabya iyiri omo kabi?

 Erikwamana n’ebya Biblia yikabugha ebihambire oko ngebe y’omwana oyuthe wabuthwa, omundu syanga yihambulya athi akendi lhusyamo obukule kundi engebe yiwe kutse ey’omwana yiri omo kabi.