E Biblia yikahira omuwatho w’okw’ihithya erikakolhawa ahathe erikakwa kandi busana n’ekighendererwa ekihikire. Yikakanganaya ngoku erihithya ng’eryo likaghasira oyukahebawa n’oyulyaha. (Emisyo 11:25; Luka 6:38) Yesu mwabugha athi: “Erihithya likaletha obutseme kwilhaba erihabwa.”—Emibiri 20:35.

• Erihithya likatsemesaya Nyamuhanga mughulhu wahi?

• Erihithya siriritsemesaya Nyamuhanga mughulhu wahi?

• Emilhondo ye Biblia eyihambire okw’ihithya

 Erihithya likatsemesaya Nyamuhanga lyamakolhwa ahathe erikakwa. E Biblia yikabugha yithi, “Obuli mundu ahire omo kibo ngoku abiriyisogha omo muthima wiwe; syahe n’obuhemu, kutse erikunwa; kusangwa Nyamuhanga anzire omundu oyukaha n’eriyisyandira.”—2 Abanya Korinto 9:7.

 Erihithya erikalhua oko muthima ni kitsweka ky’okwa mulingo ‘w’ekisomo’ kutse edini eyo Nyamuhanga akaligha. (Yakobo 1:27) Oyukahithaya nuku awathikaye abali omo buyithawa akakolha haghuma na Nyamuhanga, oyukalhangira erihithya ng’eryo nga ni mubweka. (Emisyo 19:17) E Biblia yikakangiriraya yithi Nyamuhanga iyuwene-wene akendi syahemba oyukahithaya.—Luka 14:12-14.

 Lyamakolhwa busana n’ebighendererwa ebithatholere. Eby’erileberyako bya bino:

•   Eriyikangania.—Matayo 6:2.

•   Nuku nawu wuhebawe.—Luka 14:12-14.

•   Erianza eribana omulhamu.​—Esyonyimbo 49:6, 7.

 Lyamabya irikasighika emibiiri kutse ebindu ebyo Nyamuhanga akaghana. Ng’eky’erileberyako, ikikendibya ikiwire eriha omundu y’esyosente esy’erikolesya omwa misathu y’erisathira esyosente kutse esy’erikolesya okw’ikolesya nabi ebibatsi ebikathamiraya kutse obwabu. (1 Abanya Korinto 6:9, 10; 2 Abanya Korinto 7:1) Kuthya, si kitholere eriha omundu y’esyosente oyuwangana thoka eriyisighika ambu kundi syanzire erikolha.—2 Abanya Tesalonika 3:10.

 Lyamabya irikendyingirira esyongwamirwa esyo Nyamuhanga abirithuha. E Biblia yikakangiriraya yithi emithwe y’eka batholere ibatsomana ebiyithawa by’eka yabu. (1 Timoteo 5:8) Ikikendibya isikihikire omuthwe w’eka eriha abandi bo bingyi aliwe iniagheghena ab’omw’eka yiwe. Kuthya, Yesu mwatsweba abaghana eriha ababuthi babu abakulire b’ebiyithawa omw’ibugha bathi ebyo bawitheko ebyosi “byabirihabwa oku Nyamuhanga.”—Mariko 7:9-13.