Omwa Biblia, ekinywe ekikahindulhawamo “erilhubuka” kikalhua omwa kinywe ky’Ekigiriki a·naʹsta·sis, ekikamanyisaya “erithasyahangana.” Oyukalhubukibawa akahangana erilhua omwa lhuholho n’erithasyahebwa engebe ngoku anabya athali aholha.​—1 Abanya Korinto 15:12, 13.

 Engangirirya y’erilhubuka yine omwa Masako w’Ekihebrania, mughulhu mungyi awakahulhawa mwa Endaghano ya Kera. Ng’eky’erileberyako, erilhabira omwa muminyereri Hosea, Nyamuhanga mwalhaghanisya athi: “Nasyalhamyabo oko maaka w’ekulimu. Nasyathongolyabo oko lhuholho.”​—Hosea 13:14; Yobu 14:13-15; Isaya 26:19; Danieli 12:2, 13.

 Abandu bakendi syalhubukira hayi? Abandi bakalhubukibawa okwa ngebe omwa lhubulha eriyathabalha ng’abami haghuma na Kristo. (2 Abanya Korinto 5:1) E Biblia yikahulha erilhubuka eri ‘mw’ilhubuka ly’erimbere’ ebinywe ebikakanganaya ngoku hane erindi lhubuka erikendi syakwamako. (Eribisulirwa 20:6) Erilhubuka erikendi syakwamako eri ly’ery’eribana engebe okwa kihugho, eryo abangyi abakendi syalhubukibwa bakendi syabana.​—Esyonyimbo 37:29.

 Abandu bakalhubukibawa bathi? Nyamuhanga akaha Yesu y’obuthoki obw’erilhubukya abaholi. (Yoane 11:25) Yesu akendi syasubya “abosi abali omo masinda” n’eribaha engebe, obuli mughuma ngoku anabya asosire, emibere yiwe, n’eby’anabya akalengekania. (Yoane 5:28, 29) Abakalhubuka erighenda elhubulha bakahebawa omubiri w’ekirimu, n’abakalhubuka eribya okwa kihugho bakahebawa omubiri w’omunyoku owahikene.​—Isaya 33:24; 35:5, 6; 1 Abanya Korinto 15:42-44, 50.

 Ni bahi abakendi syalhubukibwa? E Biblia yikabugha yithi “hasyabya erilhubuka ly’abathunganene n’ababi [“abathathunganene” NWT].” (Emibiri 24:15) Abathunganene mwamuli abandu abatheleghulha, nga Noa, Sara, na Abrahamu. (Enzuko 6:9; Abaebrania 11:11; Yakobo 2:21) Ababi kutse abathathunganene mwamuli abathaghendera okwa bihano bya Nyamuhanga kundi mubathabana akaghisa ak’eriminyabyo n’erighendera kubyo.

 Aliwe, ababi kutsibu abakitheko amalenguliro sibendi syalhubukibwa. Abandu ng’aba bamaholha, bakabya ibamathoghothibirwa ighuma isihakiri maha okw’ibo.​—Matayo 23:33, NWT; Abaebrania 10:26, 27.

 Erilhubuka likendi syabya mughulhu wahi? E Biblia muyalhaghulha yithi erilhubuka ery’abakaghenda elhubulha lyangabere omwa buthuku bw’erihika lya Kristo, eryatsuka omwa 1914. (1 Abanya Korinto 15:21-23) Erilhubuka ery’abakendi syabya okwa kihugho likendi syabya omwa Buthabali bwa Yesu Kristo obw’Emyaka Rukumi, omughulhu ekihugho kikendi syahindulhwa mwa paradiso.​—Luka 23:43; Eribisulirwa 20:6, 12, 13.

 Busana naki kitholere erikirirya omw’ilhubuka? Omwa Biblia mune emyatsi eyihambire okwa bandu mwenda abalhubukibawa, okwa buli lhubuka habya ihane abalhangira likabya. (1 Abami 17:17-24; 2 Abami 4:32-37; 13:20, 21; Luka 7:11-17; 8:40-56; Yoane 11:38-44; Emibiri 9:36-42; Emibiri 20:7-12; 1 Abanya Korinto 15:3-6) Yesu erilhubukya Lazaro ni ky’embaghane kutsibu, kundi Lazaro abya iniamabirighunza ebiro bbini inianaholire kandi Yesu mwakolha ekithiko-thiko eki embere sy’abandu bangyi. (Yoane 11:39, 42) Nibya n’ababya bakahakanisya Yesu mubathaghania ekyabya, neryo mubaya embiitha ey’eritha Yesu na Lazaro.​—Yoane 11:47, 53; 12:9-11.

 E Biblia yikakanganaya ngoku Nyamuhanga awithe amaaka kandi akayisunza erilhubukya ababiriholha. Akabya inian’ibukire ebyosi ebihambire okwa buli mundu oyo akendi syalhubukya omw’ikolesya obuthoki bwiwe bunene. (Yobu 37:23; Matayo 10:30; Luka 20:37, 38) Nyamuhanga angana thoka erisubya ababiriholha n’erithasyabaha engebe, kandi anzire erikikolha! E Biblia yikabya yikakania okw’ilhubuka erikasa, yikabugha oku Nyamuhanga yithi: “Wanganzire omubiiri w’ebyalha byawu.”​—Yobu 14:15.

Ebithahikire ebihambire okw’ilhubuka

 Ebinyambwirwa: Erilhubuka w’omughulhu akalimu kakathasyasanga-sangana n’omubiri.

 Okwenene: E Biblia yikakangiriraya yithi omundu akabya akaholha, akabya isyakiriho, sihali akalimu akatheholha. (Omugambuli 9:5, 10) Busana n’ekyo, omundu oyukalhubukibawa syali sanga-sangana n’akalimu kiwe; akathasyahangikawa eribya omundu oyuliho.

 Ebinyambwirwa: Abandi bakalhubukibawa neryo aho n’aho ibathoghothibwa.

 FOkwenene: E Biblia yikabugha yithi “n’abakolha ebibi” basyalhubuka “oko lhubanza lhw’eritswerwa.” (Yoane 5:29) Aliwe, eritswerwa eri liseghemere okwa bya bakendi syakolha babirilhubukibwa, butsira ebya bakolha kera. Yesu mwabugha athi: “Abaholi basyowa omulenge wa Mughalha wa Nyamuhanga, n’abo abakowa basyabyaho.” (Yoane 5:25) “Abakowa” kutse erighendera okwa bya bak’igha babirilhubukibwa, amena wabu akendi syahandikwa omwa “kitabu ky’engebe.”​—Eribisulirwa 20:12, 13.

 Ebinyambwirwa: Oyukalhubuka akahebawa omubiri wiwe owonyine-nyine ow’abya nawu athali aholha.

 Okwenene: Omundu akabya abiriholha, omubiri wiwe akabbolha n’erisuba muthaka.​—Omugambuli 3:19, 20.