Eyihi. E Biblia siyiribugha yithi esyosente ni kibi, kandi siyiribugha yithi esyosente sy’esikaleka ihabya ebindu bibi byosi. Ebinywe ebyasibwe ebya ‘ebindu [esyosente] bikaletha emisindo yosi y’ebibi’ ni binywe eby’abandu bak’iha omwa Biblia mwa mbindi-mbindi kandi byangana herya abandu. Okwenene kuli kuthi e Biblia yikabugha yithi ‘erianza ebindu [esyosente] likaletha emisindo yosi y’ebibi.’ a—1 Timoteo 6:10.

• E Biblia yikabugha yithiki oko syosente?

• Busana naki e Biblia yikathukunga okwa ky’erianza esyosente?

• Erihabulha lye Biblia erihambire oko syosente lyanga thughasira lithi?

• Emilhondo ye Biblia eyihambire oko syosente

 E Biblia yikakanganaya ngoku esyosente syamakolesibwa ndeke, syanganabya sy’omughaso, nibya isyakolha ‘ng’obutheya.’ (Omugambuli 7:12) Eryongera okw’ekyo, e Biblia yikasima abakahithaya, imwamuli n’erihithya esyosente.—Emisyo 11:25.

 Kandi, e Biblia yikathukunga okwa ky’erihira esyosente sy’embere omo ngebe. Yikabugha yithi: “Simukwamirire erianza esyofranka, nikwa mutsemere ebyo muwithe.” (Abaebrania 13:5) Erisomo lya lino, thutholere ithwahira esyosente omo mwanya wasyo n’erithendi kwamirira eby’obugaga. Omwakanya k’ekyo, thutholere ithwalengaho eritsemera ebyonyine-nyine ebya thukayithagha, ng’ebyalya, eby’eriambalha, n’ah’erikalha.—1 Timoteo 6:8.

 Ab’omururu sibendi syabana engebe y’erikotha. (Abanya Efeso 5:5) Enzumwa y’erimbere yiri yithi, omururu ni mulingo w’eriramya esyosanamu, kutse eriramya ly’amabehi. (Abanya Kolosai 3:5) N’eyindi, ab’omururu bakabya bakanza eribana ebyo banzire, mughulhu mungyi bakasighanaya emisingyi eyuwene. Emisyo 28:20 hathi, “Oyukanguha eribya mutheke syendi syabulha erisuyirwa.” Nibya kyanganaleka ibakolha ebithatholere, ng’er’iba abandu omw’ibubahisya, eribanyegha, eribatheba, eriheka abandu babu, kutse eritha.

 Erianza esyosente nomulyangaghana erikolya okwa mitse mibi, lyanganalhwiririra mw’ebindu bibi. E Biblia yikabugha yithi “abakayitsutsa eribya batheke bakawa omw’irengwako, n’erihambwa omo kithegho ky’esyongumbu nyingyi nyikiru, esikaghalhaya.”—1 Timoteo 6:9.

 Thwamathendi sighania eby’esyongeso n’eby’obunyakirimu busana n’erisondekania esyosente, ithukendi sikibwa kandi Nyamuhanga iniathusima n’erithuwathikya. Okwa bakalengaho erimutsemesya erilhua oko muthima, Nyamuhanga akalhaghanisaya athi: “Sinendi syakuleka na kera, kandi, sinendisya kusighania n’ahake.” (Abaebrania 13:5, 6) Kandi akathukakasaya athi “omundu oyutheleghulha asyabya n’omughisa mungyi.”—Emisyo 28:20.