Eyihi. Yikabya yikalinganisibwa n’amasako wa kera kikalhangirika ngoku e Biblia siyiriyathahinduka nomwakine indi yabirikopwa mirundi mingyi n’erihandikwa okwa bindu ebikatsanda lhuba.

 Esyongumi sy’ebisakango bye Biblia ebya kera byabiribanwa. Ebindi musyo mune esyombaghane nga sy’esyo, erikangania ngoku ibakanasobaya bakakopa amasako. Esyonene sy’okwa syombaghane esi ni sike-sike kandi sisyanga hindulha ekya amasako akamanyisaya. Aliwe, esyombaghane ndebe esilhangirikire syabiribanika, esindi sy’okw’isyo sikabya nga syahiriribawamo bakanza erihengemya omwatsi we Biblia. Thalengekania okwa by’erileberyako bibiri:

1.   Omu 1 Yoane 5:7, esindi mbindulha sye Biblia esya kera siri mw’ebinywe bino: “elhubulha, Thatha, Kinywe, n’Omulimu Abuyirire: abasathu aba ni mughuma.” Aliwe, amasako awakayiketherawa akakakasaya ngoku ebinywe ebi sibyabya omwa masako w’erimbere. Byongerawamo enyuma waho. a Busana n’ekyo, esyombindulha sye Biblia esyamunabwire esikayiketherawa syabiribilhusyamo.

2.   Erina lya Nyamuhanga likabanika omwa masako wa kera awe Biblia esyongumi n’esyongumi. Nomwabine, esyombindulha sy’esyo Biblia nyingyi syabirisubya omwa mwanya walyo mw’ebitsumbi nga “Mukama” kutse “Nyamuhanga.”

 Okwa buthuku buno, amasako mangyi abiribanika, ekindu ekyabirileka ikyolhoba eribana ebisobyo kwilhaba kera. b Erilebya ndeke ebisakango ebi kyabirikanganiaki munabwire okwa ky’eribya e Biblia eyihikire?

•   Akakania okwa Masako w’Ekihebrania, (awasibya mwa “Endaghano ya Kera”), omusomi we Biblia ya William H. Green mwabugha athi: “Kihikire eribugha thuthi sihali wundi mwatsi owa kera ow’abirighenda akakopwa ndeke ng’Amasako.”

•   Bikahika okwa Masako w’Ekigiriki, kutse “Endaghano Mbyaka,” omusomi we Biblia ya F. F. Bruce mwahandika athi: “Obwema obuhambire okwa Ndaghano Mbyaka eribya iyihikire bukayongera kutsibu kwilhaba obwema obuhambire okwa bindi bingyi ebihandikire eby’abahandiki bangyi abakera, kandi sihali n’omughuma oyuwanga hakanisya okwenene kwa masako.”

•   Sir Frederic Kenyon, omughuma w’okwa bawithe ehamuli okwa masako we Biblia, mwabugha athi omundu “anganimya e Biblia yosi omwa byalha n’eribugha butsir’iubaha kutse erithika-thika athi ngana hambire okwa Kinywe kya Nyamuhanga eky’ekwenene, ekyabiribya ikineho ahabw’emyaka mingyi kandi isimuli kindu kinene ekyabirihinduka.”

•   Abayuda n’Abakristayo ababya bakakopayo abosi mubalekamo emyatsi eyikakanganaya ebisobyo ebikalire ebya bandu ba Nyamuhanga bakolha. c (Emiganzo 20:12; 2 Samweli 11:2-4; Abanya Galatia 2:11-14) Kuthya, mubalekamu n’emyatsi eyikakanaya okwa buthowa bw’ekihanda ky’Abayuda n’eribisulha esyongangirirya esya bandu bayihiriraho. (Hosea 4:2; Malaki 2:8, 9; Matayo 23:8, 9; 1 Yoane 5:21) Omw’ikopa emyatsi eyi ya ndeke, abaghenda bakakopayo mubakangania obuyisiwa kandi ku basikirye kutsibu Ekinywe kya Nyamuhanga ekibuyirire.

•   Mbwino isikyendibya ini ky’amenge eribugha thuthi Nyamuhanga oyuwalhangira athi e Biblia yikahandikawa omw’isondolibwa n’omulimu wiwe yikatheghibawa? d (Isaya 40:8; 1 Petero 1:24, 25) Kundi nibya aby’anzire iyaghasira abandu abakera n’abamunabwire. (1 Abanya Korinto 10:11) Erithwalira haghuma, “ebyosi ebyasakawa erimbere omo Masako byasakawa busana n’erithukangirirya. Neryo Amasako akathuha eriyitsingirira n’erihanda omuthima, ithwathoka eribya n’amaha.”​—Abanya Roma 15:4.

•   Yesu n’abigha biwe mubabugha ebinywe ebiri omwa syokopi sy’Ekihebrania ahathe erisagha bathi amasako wa kera ayo syahikire.​—Luka 4:16-21; Emibiri 17:1-3.