Mbwino Nyamuhanga Ali Ehosi-hosi Omwa Buli Kindu?
Ekya Biblia yikasubiraya
Nyamuhanga awithe amaaka aw’erilhangira obuli kindu n’erikolha eky’anzire ahosi-hosi aho anzire. (Emisyo 15:3; Abaebrania 4:13) Nomwabine, e Biblia siyirikangiriraya yithi Nyamuhanga ali ehosi-hosi omwa buli kindu. Aliwe, yikakangiriraya yithi aneho kandi ngoku anawithe aho ikere.
Ngoku Nyamuhanga ali: Nyamuhanga ni mulimu. (Yoane 4:24) Syangalhangirwa n’abandu. (Yoane 1:18) Ebyo Nyamuhanga abisulira abandu omo nzoli ebiri omwa Biblia bikakanganaya ngoku anawithe aho ikere. Syali athakanibwako ng’oyuwikere ehosi-hosi.—Isaya 6:1, 2; Eribisulirwa 4:2, 3, 8.
Aho Nyamuhanga ikere: E Biblia yikabugha yithi Nyamuhanga anawithe ‘eyo ikere,’ elhubulha. (1 Abami 8:30) Eki kikamanyisaya kithi Nyamuhanga syikere okwa kihugho aliwe ikere elhubulha. E Biblia yikanakanaya okwa kiro ebihangikwa by’ekirimu ‘byahika eriyikangania embere sya Yehova,’ a erikangania ngoku Nyamuhanga anawithe aho ikere.—Yobu 1:6.
Nyamuhanga amabya isyali ehosi-hosi, obo iniananyitsomana ingye ng’ingye?
Ee. Nyamuhanga atsomene kutsibu obuli mundu ahabwiwe. Nomwan’ikere elhubulha, akalhangira abikere okwa kihugho abanzire erimutsemesya omo kwenene, kandi akabawathikaya. (1 Abami 8:39; 2 Emyatsi y’Emigulu 16:9) Thalebya ngoku Nyamuhanga akakanganaya kw’atsomene abakamuramaya omo kwenene:
Omughulhu wukasaba: Yehova angan’owa erisaba lyawu wukanatsuka erimusaba.—2 Emyatsi y’Emigulu 18:31.
Omughulhu wuwithe ebikakulyambaya: “Omwami Mukulhu [Yehova] ali hakuhi n’ab’emithima ibbunangikire, akalhamaya abathawithe amaha.”—Esyonyimbo 34:18.
Omughulhu wukayithagha obusondoli: Yehova ‘asyakukangirirya’ erilhabira omwa Kinywe kiwe, e Biblia.—Esyonyimbo 32:8.
Ebithahikire ebihambire okw’ibya ehosi-hosi
Ekithahikire: Nyamuhanga ali ehosi-hosi omo bihangikwa.
Ekihikire: Nyamuhanga syikere okwa kihugho kutse ahandi hosi-hosi omo buhangwa obukalhangirawa. (1 Abami 8:27) Ni kwenene esyongununu n’eyindi mibiiri y’obuhangiki ‘bikakanaya olhukengerwa lhwa Nyamuhanga.’ (Esyonyimbo 19:1) Aliwe, Nyamuhanga syal’ikalha omo by’ahangika ngoku oyukakolha ebisasani athe ang’ikalha omo bisasani ebyo. Nomwabine, ekisasani kyanganathulha mwatsi munene oko yuwakolhakyo. Kuthya, ekihugho n’ebiri omo kyanya bikathubwira okwa mibere y’omuhangiki “eyithelholhawako,” ng’obuthoki bwiwe, amenge, n’olhwanzo.—Abanya Roma 1:20.
Ekithahikire: Nyamuhanga atholere iniabya ehosi-hosi nuku athoke eriminya ebyosi n’eribya w’obuthoki bwosi.
Ekihikire: Omulimu abuyirire wa Nyamuhanga, kutse akaghalha akakakolha, w’amaaka wa Nyamuhanga agho akakolesaya erikolha ebindu muthina-muthina. Erilhabira omwa mulimu wiwe abuyirire, Nyamuhanga anganalhangira n’erikolha ekyosi-kyosi akyo anzire, ahosi-hosi, okwa ndambi yosi-yosi, isyathalhua aho ali.—Esyonyimbo 139:7.
Ekithahikire: Esyonyimbo 139:8 hakathukangiriraya hathi Nyamuhanga ali ehosi-hosi omw’ibugha hathi: “Namahethukira elhubulha, iwuneyo; kandi namaghotsera ekulimu, iwuneyo.”
Ekihikire: Erisako eri siriri kanaya oko aho Nyamuhanga ali. Likathukangiriraya ngoku sihali omwanya owathwangabya ithulimu owangalemesya Nyamuhanga erithuwathikya.
a Yehova ni rina lya Nyamuhanga ngoku kikanganibwe omwa Biblia.
You May Also Like
ESYONGANGIRIRYA NGULHU-NGULHU ESYE BIBLIA
Mbwino Nyamuhanga Aneho?
Thulebaye ebikakanganaya ngoku ni ky’amenge erikirirya omu Nyamuhanga.
E BIBLIA ERISUBIRYA OKWA BIBULYO
Omulimu Abuyirire Niki?
Busana n’enzumwa mbuya, e Biblia yikahulha omulimu abuyirire mwa “ebyalha” bya Nyamuhanga.
EBITHUHAMBIREKO
Saba Eribungirwa
Kanaya okwa kibulyo ekiseghemere okwa Biblia, kutse minya bingyi ebihambire okwa Bema ba Yehova.