Eyihi. E Biblia yikabugha ndeke-ndeke yithi Nyamuhanga mwahangika abandu haghuma ‘n’emisindo’ muthina-muthina y’engebe y’ebisoro n’ebikalhasa. a (Enzuko 1:12, 21, 25, 27; Eribisulirwa 4:11) Yikabugha yithi abandu bosi balhua omu Adamu na Eva, ababuthi bethu b’erimbere. (Enzuko 3:20; 4:1) E Biblia siyiri sighika engangirirya eyikabugha yithi Nyamuhanga mwakolesya eriyibuthukira ly’ebindu erileka eyindi misindo y’embaghane ey’engebe eribyaho. Aliwe okwenene kuli kuthi, e Biblia siyiri ghanaya ebyo abanya sayansi bakabugha okw’ibya ihane emisindo mingyi muthina-muthina okwa buli musindo mughuma w’engebe ndebe.

•  Mbwino Nyamuhanga mwanakolesya eriyibuthukira ly’ebindu?

•  Mbwino eriyibuthukira ly’ebindu likanahambana n’ebya Biblia yikabugha?

•  Mbwino ebikalhasa n’ebisoro eribya ibiwithe amaaka w’eribeghera emibere eyibithimbireko, kikakanganaya kithi ebindu bya yibuthukira?

 Abandu abakalengekanaya bathi Nyamuhanga mwakolesya eriyibuthukira ly’ebindu erihangika, bawithe amalengekania awathasosene okwa mibere akoleramo eki. Ekitabu Encyclopædia Britannica kikabugha kithi, “abandi bikirirye bathi ekindu eribya ikikaghenda-ghendanaya ndeke n’emibere y’aho kiri ni nzira nguma eya Nyamuhanga akakolesaya erisondolha ebihangikwa.”

 Abandu erilengekania bathi Nyamuhanga mwakolesya eriyibuthukira ly’ebindu akahangika ebindi bindu kyanganabya ikiseghemere okwa malengekania ano:

•   Ebindu ebyosi ebiwithe engebe byalhua omwa kindu kighuma ekya kera-kera.

•   Omusindo mughuma w’engebe angana hindukira ighuma mw’ekindi kindu eky’owundi musindo w’engebe.

•   Omwa nzira ndebe, Nyamuhanga yukaleka ebyosi ebi ibyabya bithya.

 Engangirirya ey’eribugha indi ebindu byaghenda bikahinduka-hinduka yikakanganaya ngoku emyatsi ye Biblia eyihambire okw’ihangika eyiri omwa kitabu ky’Enzuko siyihikire. Aliwe, Yesu mwakania oko mwatsi owali omwa Nzuko erikangania ngoku emyatsi eya kera eyi yihikire. (Enzuko 1:26, 27; 2:18-24; Matayo 19:4-6) E Biblia yikabugha yithi athalyasa okwa kihugho, Yesu abya elhubulha na Nyamuhanga kandi mwawathikya Nyamuhanga erikolha “emyatsi yosi.” (Yoane 1:3) Busana n’ekyo, eky’eribugha indi Nyamuhanga mwakolesya eriyibuthukira ly’ebindu erihangika emisindo-misindo y’engebe sikihambene n’ebya Biblia yikakangiriraya.

 E Biblia siyiri soborera nga hangabya misindo mingahi muthina-muthina omwa musindo mughuma. Kandi siyirighanaya eky’eribya indi emisindo muthina-muthina y’ebisoro n’ebikalhasa ebya Nyamuhanga ahangika mwanganabya emisindo-misindo bikabutha-buthania kutse bikaghenda-ghendania n’emibere mihya-mihya eyabirimo. Nomwakine indi abandi bakalhangira eki ng’omulingo w’eriyibuthukira ly’ebindu, sihali owundi musindo w’engebe muhyaka owakabyaho.