Olhubatizo Niki?
Ekya Biblia yikasubiraya
Olhubatizo ly’erilubba omundu y’omwa maghetse n’erimwihamo. * Kwesi eki ky’ekyaleka Yesu iniabatizibwa omwa lhusi lhunene. (Matayo 3:13, 16) Kuthya, n’omulhume owe Etiopia mwasaba eribatizibwa, neryo iyo na Filipo “mubandaghalira omwa maghetse.”—Emibiri 8:36-40.
Ekya olhubatizo lhukamanyisaya
E Biblia yikalinganisaya olhubatizo n’erithabwa. (Abanya Roma 6:4; Abanya Kolosai 2:12) Eribatizibwa omwa maghetse likakanganaya ngoku omundu amaholha okwa mighendere yiwe y’engebe eyakera n’eritsuka engebe nyihya-nyihya ng’Omukristayo oyuyihereyo oku Nyamuhanga. Olhubatizo n’ebiika ebikakolhaya kulho ni ndegheka ya Nyamuhanga busana n’omundu erithoka eribya n’obunyamuthima-thima obuhenirye busana n’erikirirya liwe omwa kihongo kya Yesu Kristo. (1 Petero 3:21) Busana n’ekyo, Yesu mwakangirirya athi abigha biwe batholere ibabatizibwa.—Matayo 28:19, 20.
Mbwino eribatizibwa omwa maghetse likathweraya kw’ekibi?
Eyihi. E Biblia yikakangiriraya yithi omusasi wa Yesu owuthika musa wakathweraya kw’ebibi. (Abanya Roma 5:8, 9; 1 Yoane 1:7) Aliwe, erithoka erighasirwa omwa kihongo kya Yesu, omundu atholere in’ikirirya Yesu, iniahindulha emibere yiwe y’engebe nuku aghendere okwa syongangirirya sya Yesu, n’eribatizibwa.—Emibiri 2:38; 3:19.
Mbwino e Biblia yikana kangiriraya yithi esyomekeke isyabatizibwa?
Eyihi, siyiri kangiriraya ekyo. Eky’eribatizya esyomekeke sikiri omwa Biblia. Esindi kanisa sikakolha omukonga omwana “akabatizibwa” (omw’imutsa-tsanga kw’amaghetse kutse eryuthagho okwa muthwe wiwe) n’erimulhuka erina. Olhubatizo lhw’Ekikrisitayo ni lhw’abo abakulire abanga yitheghererya n’erikirirya “engulhu yuwene ey’Obwami bwa Nyamuhanga.” (Emibiri 8:12) Kihambangene n’eriowa Ekinywe kya Nyamuhanga, erilighakyo, n’eriyisubamo—ebindu ebyo olhumekeke lhuthe lhwanga kolha.—Emibiri 2:22, 38, 41.
Eryongera okw’ekyo, e Biblia yikakanganaya ngoku Nyamuhanga akalhangira abaana b’Abakrisitayo ng’ababuyirire, kutse abahenirye embere siwe, busana n’obuthaleghulha bw’ababuthi babu. (1 Abanya Korinto 7:14) Olhubatizo lhw’esyomekeke ku lhwabya ilhukalighawa, ambi abaana abo isikyanga thasyabayithaghisya eriliwa na Nyamuhanga busana n’owundi mundu. *
Ebithahikire ebihambire okwa lhubatizo lhw’Ekikristayo
Ekithahikire: Eritsatsanga kutse eryutha okwa mundu kw’amaghetse ni kindu ekyabiriliwa erisuba omo mwanya w’omundu erilubbwa iyo wosi.
Okwenene: Eribatizya eryosi erikanibweko omwa Biblia lyabya likakolhwa omw’ilubbwa. Ng’eky’erileberyako, omughulhu omwigha Filipo abatizaya omulhume owe Etiopia, “mubandaghalira omwa maghetse” akayamubatizya. Enyuma waho, ‘mubalhua omwa maghetse.’—Emibiri 8:36-39. *
Ekithahikire: E Biblia yikakanganaya yithi n’esyomekeke syanabya omwa babatizibawa ab’omwa maka wabu abosi bakabatizibwa. Ng’eky’erileberyako, yikakanaya okwa mutheya w’omuliki owe Filipi yithi: “Mwabatizibwa, iyo n’ekithunga [eka] kiwe kyosi.”—Emibiri 16:31-34.
Okwenene: Omwatsi owahambire okw’ihinduka ly’omutheya w’omuliki akakanganaya ngoku ababatizibawa mubayitheghererya “ekinywe ky’Omukama [Yehova]” kandi ngoku “mubatsema kutsibu.” (Emibiri 16:32, 34) Ebi bikaleka ithwaminya ngoku esyomekeke esyabya omwa nyumba y’omutheya w’omuliki musithabya omwa babatizibawa, kundi isisyanga thokire eriyitheghererya ekinywe kya Yehova.
Ekithahikire: Yesu mwakangirirya okw’ibatizya ly’esyomekeke akabugha athi Obwami bwa Nyamuhanga ni bw’abaana balere kandi mwahambabo omwa byalha biwe n’erihira kubo kw’ebyalha.—Matayo 19:13-15; Mariko 10:13-16.
Okwenene: Yesu syabya akakania okwa lhubatizo omughulhu abugha ebinywe ebyo kutse akahira okwa baana kw’ebyalha biwe. Aliwe, abya iniakakanganaya ngoku abanga tholera eribya omwa Bwami bwa Nyamuhanga batholere ibabya n’emibere ng’eya baana, ni bugha ambu, abolho n’abakaligha erikangiriribwa.—Matayo 18:4; Luka 18:16, 17.
^ Ekinywe ky’Ekigiriki ekyahindulhawamo “olhubatizo” kilhuire omwa kinywe ekikamanyisaya “eridikirya.” Lebaya ekitabu Theological Dictionary of the New Testament, Volyumu I, olhupapura 529.
^ Erikwamana n’ekitabu The International Standard Bible Encyclopedia, “sihali aho eribatizya ly’esyomekeke likanibweko omwa Ndaghano Nyihya-nyihya.” Kandi kikathasyabugha kithi omutse oyu atsuka busana “n’amalengekania awathahikire n’awalhabirirenie agho bandu bawithe okwa kighendererwa ky’olhubatizo,” ni bugha ambu, aw’eribugha indi olhubatizo lhukathweraya kw’ebibi.—Volyumu 1, olhupapura 416-417.
^ Ahisi sy’omuthwe “Baptism (Olhubatizo) (omwa Biblia),” ekitabu New Catholic Encyclopedia kikabugha kithi: “Kilhangirikire ngoku omwa kighana ky’erimbere Abakristayo ibakabatizaya omw’ilubba.”—Volyumu 2, olhupapura 59.
You May Also Like
E BIBLIA ERISUBIRYA OKWA BIBULYO
Amadini Wosi Anasosene? Awosi Akanakolhaya oku Nyamuhanga?
Ni bindu bibiri ebikanganibwe omwa Biblia ebikaha eky’erisubirya.