Olhuhi lhwe Harmagedoni lhw’olhuhi lhw’erighunzerera olhukendi syabya ahakathi-kathi k’esyogavumente sy’abandu na Nyamuhanga. Esyogavumente esi n’abakasighikasyo bakahakanisaya Nyamuhanga nibya na lino omw’ighana erighondera obuthabali bwiwe. (Esyonyimbo 2:2) Olhuhi lhwe Harmagedoni lhukendi syaghunzaho amathabali w’abandu.—Danieli 2:44.

 Ekinywe “Harmagedoni” kikabanika murundi mughuma omwa Biblia, omwa Eribisulirwa 16:16. Omwa nzira y’omusya, Eribisulirwa hakabugha hathi “ahakahulhawa omo Kiebrania mo Harmagedoni,” aho ‘h’abami b’ekihugho kyosi’ basyahindana haghuma “omo malhwa w’ekiro kinene kya Nyamuhanga Omuthoki w’Ebyosi.”—Eribisulirwa 16:14.

 Ni bahi abakendi syalhwa okwa Harmagedoni? Yesu Kristo akendi syasondolha amahe w’elhubulha erikinda esyonzighu sya Nyamuhanga. (Eribisulirwa 19:11-16, 19-21) Esyonzighu esi mwamuli abakahakanisaya ehamuli ya Nyamuhanga n’abakaghaya Nyamuhanga.—Ezekieli 39:7.

 Mbwino e Harmagedoni yonyine-nyine yikendi syabanika omwa bitsweka by’Obuharabbu? Eyihi. Omwakanya k’eribya omwa mwanya mughuma, olhuhi lhwe Harmagedoni lhukendi syabya omwa kihugho kyosi.—Yeremia 25:32-34; Ezekieli 39:17-20.

 Ekinywe Harmagedoni (Kiebrania Har Meghiddohnʹ), kikamanyisaya “Ekithwe kye Megido.” Megido yabya tawuni omwa bulhambu bwe Israeli. Ebya kera bikathubwira bithi eyo ya babya bakalhwira esyonyuhi nyingyi esy’erighunzaho obuhaka, imwamuli n’esindi esiri omwa Biblia. (Abatsweri 5:19, 20; 2 Abami 9:27; 23:29) Aliwe, Harmagedoni syangabya ini mwanya hene-hene ow’ali hakuhi ne Megido. Eyo siyiri ekithwe kinene, nibya n’obwerere obwosi obwe Yezreeli sibwanga hika mw’abosi abakendi syalhwa na Nyamuhanga. Omwakanya k’ekyo, e Harmagedoni ni mibere y’ekihugho kyosi eyo ebihanda bikendi syahindaniramo haghuma omurundi w’erighunzerera erilhwa n’obuthabali bwa Nyamuhanga.

 Emibere yikendi syabya yithi okwa buthuku bw’olhuhi lhwe Harmagedoni? Nomwakine indi sithwasi Nyamuhanga ng’akendi syakolesya athi obuthoki bwiwe, akendi syabya inianawithe ebindu by’amalhwa ebiri ng’eby’anakolesaya kera—amathwa, emisiki, eribowa ly’amaghetse, omuliro n’obuseku, ehirabyo, n’amalhwere. (Yobu 38:22, 23; Ezekieli 38:19, 22; Habakuki 3:10, 11; Zekaria 14:12) Omw’ibulha ekiriho, esindi nzighu sya Nyamuhanga sikend’isy’ithana, aliwe erighunzerera sikendi syaminya ngoku ni Nyamuhanga oyukalhwa nabo.—Ezekieli 38:21, 23; Zekaria 14:13.

 Mbwino e Harmagedoni yikendi syabya iy’enduli y’ekihugho? Siyendisyabya iyikathoghothaya ekithaka ekya thwikereko kino, kundi ekihugho ni bwikalho bwa kera na kera obw’abandu. (Esyonyimbo 37:29; 96:10; Omugambuli 1:4) Omwakanya k’erithoghothya abandu, e Harmagedoni yikalhamayabo, kundi “endeko nene” y’abaghombe ba Nyamuhanga yikendi syasabuka.—Eribisulirwa 7:9, 14; Esyonyimbo 37:34.

 Ekinywe “ekihugho” okwa bundi buthuku omwa Biblia kikanamanyisaya abandu babi abakahakanisaya Nyamuhanga. (1 Yoane 2:15-17) Omwa nzira eyi, e Harmagedoni yikendisyabya “nduli y’ekihugho.”—Matayo 24:3, King James Version.

 E Harmagedoni yikendi syabya mughulhu wahi? Abere akakania okwa “bulighe bunene” obukendi syahika okwa nduli yabu omwa lhuhi lhwe Harmagedoni, Yesu mwabugha athi: “Sihali mundu oyo wasi erihika ly’ekiro, kutse esaha eyo, nomubangabya bamalaika b’elhubulha, kutse Omughalha, nikwa Thatha yunasi, iyuwene.” (Matayo 24:21, 36) Nomwabine, e Biblia yikakanganaya ngoku e Harmagedoni yikendibya omwa buthuku bw’eribyaho lya Yesu ng’Omwami, eryatsuka 1914.​—Matayo 24:37-39.