Omulimu abuyirire wa Nyamuhanga ni kaghalha kiwe akakakolha. (Mika 3:8; Luka 1:35) Nyamuhanga akathuma omulimu wiwe omw’ilholerya akaghalha kiwe ehosi-hosi eyo anzire nuku aberereraye erisonda liwe.​—Esyonyimbo 104:30; 139:7.

 Omwa Biblia, ekinywe “omulimu” kilhuire omwa kinywe ky’Ekihebrania ruʹach n’Ekigiriki pneuʹma. Mughulhu mungyi ebinywe ebi bikakanaya okwa kaghalha ka Nyamuhanga akakakolha, kutse omulimu abuyirire. (Enzuko 1:2) Aliwe, e Biblia kandi yikanakolesaya ebinywe ebyo omwa yindi nzira:

•   Omuka.​—Habakuki 2:19; Eribisulirwa 13:15.

•   Erihunga.​—Enzuko 8:1; Yoane 3:8.

•   Akaghalha akakaleka ebitsuku eby’ebihangikwa ebikahumulha ibyakolha.​—Yobu 34:14, 15.

•   Ebilhubirirwa kutse emibere y’omundu.​—Emiganzo 14:24.

•   Ebihangikwa by’ekirimu, imwamuli Nyamuhanga n’abamalaika.​—1 Abami 22:21; Yoane 4:24.

 Ebyosi ebi bikamanyisaya ekindu ekithe lhangirawa n’ameso w’abandu ekikakolha ebindu ebikalhangirika. Kuthya, omulimu wa Nyamuhanga, “ng’omuyagha, syalilhangirawa, si kindu ekya wangana thulhako, kandi awithe amaaka.”​—An Expository Dictionary of New Testament Words, eya W. E. Vines.

 Kandi e Biblia yikakanaya okwa mulimu abuyirire wa Nyamuhanga ‘ng’ebyalha’ kutse “eminwe.” (Esyonyimbo 8:3; Luka 11:20; thasyalebaya na Matayo 12:28.) Ngoku omubumbi akana kolesaya ebyalha n’eminwe yiwe erikolha omubiiri wiwe, Nyamuhanga mwakolesya omulimu wiwe erikolha ebindu ng’ebiri ahikwa hano:

•   Ekyanya n’ebyosi ebirimo.​—Esyonyimbo 33:6; Isaya 66:1, 2.

•   E Biblia.​—2 Petero 1:20, 21.

•   Ebithiko-thiko ebya baghombe biwe abakera bakolha n’omuhwa wabu omwa mubiiri w’erithulira.​—Luka 4:18; Emibiri 1:8; 1 Abanya Korinto 12:4-11.

•   Emibere mibuya eyo abandu abakamw’owa bakakanganaya.​—Abanya Galatia 5:22, 23.

Omulimu abuyirire si mundu

 E Biblia erikania okwa mulimu wa Nyamuhanga ‘ng’ebyalha,’ “eminwe,” kutse “omuka,” yikabya iyamakangania ngoku omulimu abuyirire si mundu. (Eriluayo 15:8, 10) Ebyalha by’omubumbi sibyanga kolha ahathe obulengekania n’omubiri wiwe; kuthya, omulimu abuyirire wa Nyamuhanga akakolha ngoku amasondolhagho. (Luka 11:13) Kandi e Biblia yikalinganisaya omulimu wa Nyamuhanga n’amaghetse n’erisosekaniagho n’ebindu ng’erikirirya n’eriminya. Erilinganisya lyosi eri likakanganaya ngoku omulimu abuyirire si mundu.​—Isaya 44:3; Emibiri 6:5; 2 Abanya Korinto 6:6.

 E Biblia yikathubwira erina lya Yehova Nyamuhanga n’erya Mughalha wiwe, Yesu Kristo; aliwe, sihali aho yikakanaya okwa lina ly’omulimu abuyirire. (Isaya 42:8, NWT; Luka 1:31) Omwa nzira y’ekithiko-thiko, Omukristayo ya Setefano abere akalhangira omwa syonzoli ebiri elhubulha, mwalhangira abandu babiri basa, butsira basathu. E Biblia yithi: “Setefano inioswire n’omulimu abuyirire mwasamalira elhubulha mwalhangira olhukengerwa lhwa Nyamuhanga, na Yesu inian’imene oko byalha by’amali bya Nyamuhanga.” (Emibiri 7:55) Omulimu abuyirire k’akaghalha ka Nyamuhanga akakakolha akathokesaya Setefano erilhangira ebyabya omwa syonzoli.

 Ekithahikire: Omulimu abuyirire ni mundu kandi ni kitsweka ky’okwa busathu bubuyirire, ngoku kiro omu 1 Yoane 5:7, 8 omwa mbindulha ye Biblia eye King James.

 Okwenene: Embindulha ye King James yik’ongera omu 1 Yoane 5:7, 8 mw’ebinywe “omwa lhubulha, Thatha, Ekinywe, n’Omulimu Abuyirire: n’abasathu aba ni mughuma. Kandi n’okwa kihugho kuli balhangiri basathu.” Aliwe, abakasekulhaya babiribumbura ngoku omukwenda Yoane mwathahandika ebinywe ebyo kandi sibiwithe omwanya omwa Biblia. Profesa Bruce M. Metzger mwahandika athi: “Ebinywe ebi biwire kandi sibitholere bikabya omwa Ndaghano Mbyaka.”​—A Textual Commentary on the Greek New Testament.

 Ekithahikire: E Biblia yikakanaya okwa mulimu abuyirire ng’omundu, neryo eki kikakanganaya ngoku ni mundu.

 Okwenene: Ni kwenene hakanayira e Biblia iyakania okwa mulimu abuyirire nga ni mundu. Ng’eky’erileberyako, Yesu, mwakania okwa mulimu abuyirire ng’omundu akamukaniako ‘ng’omuwathikya’ (paraclete) oyukaha obwema, obusondoli, erikania, eriowa, erithulhagho, eriha olhukengerwa, n’erithunga. (Yoane 16:7-15) Aliwe eki sikirikanganaya kithi omulimu abuyirire ni mundu. E Biblia kandi yikanakanaya okwa menge, olhuholho, n’ekibi nga ni mundu. (Emisyo 1:20; Abanya Roma 5:17, 21) Ng’eky’erileberyako, yikabugha yithi amenge awithe ‘emibiiri,’ n’ekibi kikakanibawako ng’ekikatheba, eritha, n’ekikaletha esyongumbu.​—Matayo 11:19; Abanya Roma 7:8, 11.

 Ekithahikire: Eribatizya omwa lina ly’omulimu abuyirire kikakanganaya kithi omulimu abuyirire ni mundu.

 Okwenene: Okwa bundi buthuku e Biblia yikakolesaya “erina” erimanyisya obuthoki kutse ehamuli. (Eryibuka Ebihano 18:5, 19-22; Esiteri 8:10) Omundu oyubatizibirwe “omwa lina” ly’omulimu abuyirire akaminya obuthoki n’olhukwamirwa lhw’omulimu abuyirire omw’iberererya erisonda lya Nyamuhanga.​—Matayo 28:19.

 Ekithahikire: Abakwenda ba Yesu n’abandi bigha b’erimbere mubikirirya ngoku omulimu abuyirire ni mundu.

 Okwenene: E Biblia siyiribugha ekyo nibya n’ebya kera. E Encyclopædia Britannica yikabugha yithi: “Amalengekania w’eribugha indi Omulimu Abuyirire ni Nyamuhanga . . . alhuire omwa ndeko y’ababbishopu eyabya omwa Constantinople omwa 381 ad.” Eki kyabya enyuma w’emyaka eyilhabire omu 250 omukwenda w’erighunzerera aliholire.