Mikaeli, oyo awandi madini akahulhamo “Omubuyirire Mikaeli,” kilhangirikire ni rina eryo Yesu ahebawa athali asa okwa kihugho n’enyuma w’erilhua okwa kihugho. a Mikaeli mwakuba obuhaka na Sitani enyuma w’olhuholho lhwa Musa kandi mwawathikya omumalaika erihikya oko muminyereri Danieli omwatsi wa Nyamuhanga. (Danieli 10:13, 21; Yuda 9) Mikaeli akaghenda-ghendania n’ekya erina liwe likamanyisaya​—“Nindi Oyuli Nga Nyamuhanga?”​—omw’ilhwira okwa buthabali bwa Nyamuhanga n’erilhwa n’esyonzighu sya Nyamuhanga.​—Danieli 12:1; Eribisulirwa 12:7.

 Thulebaye ekikaleka ikyabya ikitholere erighunzerera thuthi Yesu ni Mikaeli omumalaika mukulhu.

•   Mikaeli ni ‘mumalaika mukulhu.’ (Yuda 9) Ekitsumbi “omumalaika mukulhu,” ekikamanyisaya ‘omukulhu w’abamalaika,’ kikabanika omwa milhondo ibiri misa omwa Biblia. Omwa milhondo yosi ibiri, ekinywe eki kikakolesibawa oku mundu mughuma butsira oko bangyi, erikangania ngoku omumalaika mughuma musa yuwithe ekitsumbi eki. Omughuma w’okwa milhondo eyi akabugha athi Omukama Yesu Kristo oyuwalhubukibawa ‘asyandaghalha akalhua elhubulha n’omulenge munene w’eribirikira, n’omulenge w’omumalaika mukulhu.’ (1 Abanya Tesalonika 4:16) Yesu awithe “omulenge w’omumalaika mukulhu” kundi n’iyo mumalaika mukulhu, Mikaeli.

•   Mikaeli akasondolha amahe w’abamalaika. ‘Mikaeli n’abamalaika biwe mubalhwa n’ekiyoka ekyo,’ Sitani. (Eribisulirwa 12:7) Mikaeli awithe obuthoki bunene omwa bw’ikalho bw’emirimu, kundi akahulhawamo “omughuma w’oko banya-mwami bakulhu” kandi “omunya-mwami mukulhu.” (Danieli 10:13, 21; 12:1) Ebitsumbi ebi bikakanaya oku Mikaeli “ng’omusondoli mukulhu w’amahe w’abamalaika,” ngoku omusomi w’Endaghano Nyihya-nyihya, David E. Aune abugha.

   E Biblia yikahulha erindi lina lighuma lisa ery’omundu mulebe oyuwithe obuthoki okwa mahe w’abamalaika. Yikabugha yithi ‘omughulhu Omukama Yesu asyabuthuka omwa muliro owakaka erilhua elhubulha haghuma n’abamalaika biwe b’amaaka. Kandi asyasuyira.’ (2 Abanya Tesalonika 1:7, 8; Matayo 16:27) Yesu ‘mwaya elhubulha, n’erithabalha okwa bamalaika, n’ab’ehamuli b’elhubulha n’ab’amaaka.’ (1 Petero 3:21, 22) Isikyendibya ky’amenge Nyamuhanga erihiraho Yesu na Mikaeli ng’abakamanda b’abamalaika ababuyirire abatsimbeneko. Aliwe, ni ky’amenge erighunzerera thuthi amena awosi, Yesu na Mikaeli, ni w’omundu mughumerere.

•   Mikaeli ‘asyahangana’ omwa ‘ndambi y’obulighe’ bunene. (Danieli 12:1) Omwa kitabu kya Danieli, ekinywe “asyahangana” mughulhu mungyi kikakolesibawa erikania oko mwami oyukasa erikolha ekindu ky’embaghane. (Danieli 11:2-4, 21) Yesu Kristo, oyukaminyikalibawa nga “Kinywe kya Nyamuhanga,” akendiyira eky’akakolha eky’embaghane ‘ng’Omwami w’abami’ erithoghothya esyonzighu sya Nyamuhanga esyosi n’eritheya abandu ba Nyamuhanga. (Eribisulirwa 19:11-16) Akendi syakolha eki omwa buthuku “bw’obulighe bunene isibwebwathabya okw’itsuka ly’ekihugho.”​—Matayo 24:21, 42.