Ekinywe ky’Ekihebrania ru’ach n’eky’Ekigiriki pneuʹma, mughulhu mungyi ebikahindulhawa mwa “ekirimu,” bikamanyisaya bindu bingyi. Ebyosi bikamanyisaya ekindu ekithe lhangirawa, aliwe ikyabya ikinemukolha ebindu ebikalhangirawa. Ekinywe ky’Ekihebrania n’eky’Ekigiriki bikakolesibawa bakakania okwa (1) omuyagha, (2) amaaka w’engebe eyiri omwa bihangikwa ebiri okwa kihugho, (3) amaaka awali omwa muthima w’omundu awakaleka iniabugha kutse erikolha ebindu omwa mibere mirebe, (4) ebinywe ebya sondolibawa ebikalhua ahathe lhangirawa, (5) ebihangikwa by’ekirimu, na (6) akaghalha ka Nyamuhanga akakakolha, kutse omulimu abuyirire.​—Eri 35:21; Esy 104:29; Mt 12:43; Lk 11:13.

 Yehova Nyamuhanga abere akahangika omulhume w’erimbere ya Adamu, e Biblia yikabugha yithi Nyamuhanga ‘mwabuhira omwa nyindo yiwe mw’omuka w’engebe. Omundu oyo mwabya omundu oyuliho.’ (Enzuko 2:7) Ngoku kiri omwa mulhondo oyu, ekinywe omuka [ekirimu] kikamanyisaya amaaka w’engebe y’omundu, ni bugha ambu, akaghalha akakaleka omundu iniabya inianeho.

Mbwino akalimu [ekirimu] kakalholha embere eribya ikaneho omundu abiriholha?

 Abasakangyi be Biblia mubakolesya ekinywe ky’Ekihebrania ruʹach kutse ekinywe ky’Ekigiriki pneuʹma bakahandika ebihambire okwa “kirimu.” Amasako iwuwene-wene akakanganaya ebinywe ebyo nga bikamanyisaya ki. Ng’eky’erileberyako, Yakobo 2:26 hakakanganaya hathi ‘omubiri owathe mw’ekirimu [pneuʹma] aholire.’ Kwesi, omw’isako eri, “ekirimu” ky’ekyo ekikaleka omubiri iniabya inianemukolha. Hathe ekirimu, omubiri iniaholire. Neryo, omwa Biblia ekinywe ruʹach sikiri hindulhawa mwa “ekirimu” lisa, aliwe kandi kikathasya hindulha mwa “omuka w’engebe,” kutse akaghalha k’engebe. Ng’eky’erileberyako, erisighikira n’Eribogha ly’amaghetse ery’obuthuku bwa Noa, Nyamuhanga mwabugha athi: “Ngaletha erighunga ly’amaghetse okwa kihugho, eriherya, ebyosi ebikahumulha ebiri n’engebe [ruʹach] omwisi wabyo eyikwa okwa buthuku.” (Enzuko 6:17; 7:15, 22) Kwesi, “ekirimu” kikamanyisaya akaghalha akathelhangirawa akakaleka ebihangikwa ebyosi ibyabyaho.

Eky’erileberyako ekyanga thuwathikya

 Omubiri akayithagha ekirimu ng’eradio kwa yikayithagha amanda awali mw’omuliro​—nuku yanga bugha. Erisoborera eki kya ndeke, thalengekania okwa radio. Wukabya wamahira amanda w’omwa radio neryo wukabuyayo, omuliro owali omwa manda akaleka eradio eyabugha. Aliwe, eradio yithemu amanda siyanga bugha, yikabya ng’eyikwire. Kwabine bithya okwa yindi radio yamalhusibwa mw’amanda. Kuthya, ekirimu ni kaghalha akakaleka emibiri yethu iyabya iyinemukolha. Kandi, ng’omuliro owali omwa manda, ekirimu sikiwithe eriyowa kandi sikyanga thoka erilengekania. Ni kaghalha akathawithe emibere ng’ey’omundu. Aliriryo thuthe mw’ekirimu ekyo, kutse akaghalha ak’engebe, emibiri yethu ‘yikaholha, iyasuba okwa lhuthuthu olhwa yalhuamu’ ng’omusakangyi w’Esyonyimbo kw’abugha.​—Esyonyimbo 104:29

 Hakakania okwa lhuholho lhw’omundu, Omugambuli 12:7 hakabugha hathi: “Olhuthuthu [omubiri wiwe] lhukasuba okwa kithaka ngoku lhwabya, n’ekirimu kikasuba oku Nyamuhanga oyuwahakyo.” Omughulhu ekirimu, kutse akaghalha k’engebe kakalhua omwa mubiri, omubiri akaholha n’erisuba ah’alhua​—okwa kithaka. Kuthya, akaghalha k’engebe kakasuba ah’akalhua​—eyiri Nyamuhanga. (Yobu 34:14, 15; Esyonyimbo 36:9) Eki sikiri manyisaya kithi akaghalha k’engebe kakaghenda elhubulha. Aliwe, kikamanyisaya kithi omundu oyukaholha, amaha wiwe aw’erithasyabana engebe omwa mughulhu owakayasa amasighirwa Yehova Nyamuhanga. Ni bugha ambu, engebe yiwe yiri omwa byalha bya Nyamuhanga. Erilhabira omw’akaghalha ka Nyamuhanga kasa, ekirimu kutse akaghalha k’engebe kangana thasya hebwa omundu nuku anga thasyabyaho.

Engangirirya ey’eribugha indi akalimu sikaliholha yalhua hayi?

 Engangirirya ey’eribugha indi omw’ithwe muli akalimu akakalholha embere ikaneho thwabiriholha siyilhuire omwa Biblia, aliwe yilhuire omwa sindi ngangirirya ng’engangirirya ey’Abagiriki abakera. Nyamuhanga syali ligha eritswangania esyongangirirya siwe n’amalengekania w’abandu. Omwakanya k’ekyo, e Biblia yikakunga yithi: “Mutheghaye, sihabye mundu oyukabanyegha omo menge w’abandu n’eritheba buyira erikalhua oko mitse y’abandu.”​—Abanya Kolosai 2:8.