Yesu mwalhamya abandu abathaleghulha omughulhu ahayo engebe yiwe ng’endongolya. (Matayo 20:28) Busana n’ekyo, e Biblia yikahulha Yesu mwa “Mulhamya w’ekihugho.” (1 Yoane 4:14) Kandi yikabugha yithi: “Neryo erilhama siriri omo wundi mundu, kusangwa Nyamuhanga sialithahulha erindi rina omwa kihugho kyosi omwa kathi-kathi k’abandu, eryanga thulhamya.”​—Emibiri 4:12.

 Yesu ‘mwaholha busana n’abandu bosi’ abakamwikiriraya. (Abaebrania 2:9; Yoane 3:16) N’enyuma waho, ‘Nyamuhanga mwamulhubukya okwa baholi,’ kandi Yesu mwasuba elhubulha ng’ekihangikwa ky’ekirimu. (Emibiri 3:15) Iniane eyo, Yesu “akathoka erilhamya lino n’ebiro byosi abakahika oku Nyamuhanga busana nayu. Kandi akakotha busana n’erisabirabo.”​—Abaebrania 7:25.

Busana naki thukayithagha Yesu erithusabira?

 Ithwe bosi thuli bakolha-nabi. (Abanya Roma 3:23) Ekibi kikathughabulha oku Nyamuhanga, kandi kikakolhaya oko lhuholho. (Abanya Roma 6:23) Aliwe Yesu akakolha ‘ng’embuyi’ busana n’abakikiriraya omo kihongo ky’endongolya yiwe. (1 Yoane 2:1) Akabalemba-lembera Nyamuhanga, erimusaba athi owe emisabe yabu n’eribaghanyira ebibi byabu busana n’olhuholho lhwa Yesu olhw’ekihongo. (Matayo 1:21; Abanya Roma 8:34) Nyamuhanga akowa erilemba-lemba lya Yesu ng’eryo kundi lihambangene n’erisonda Liwe. Nyamuhanga mwathuma Yesu okwa kihugho nuku “abye mulhamya wakyo.”​—Yoane 3:17.

Mbwino erikirirya buyira omu Yesu lisa likaghunza erithoka erilhamibwa?

 Eyihi. Nomwakine indi thutholere ithwikirirya omu Yesu erithoka erilhamibwa, ni bingyi ebikayithaghisibawa. (Emibiri 16:30, 31) E Biblia yikabugha yithi: “Kusangwa ngoku omubiri owathe mwa kirimu aholire, kwa liri lithya erikirirya butsira mibiiri liholire.” (Yakobo 2:26) Erithoka erilhamibwa, thutholere:

•   Ithw’igha oku Yesu na Thatha wiwe, Yehova.​—Yoane 17:3.

•   Ithwabya n’erikirirya erighumire omw’ibo.​—Yoane 12:44; 14:1.

•   Ithwakangania erikirirya lyethu omw’ighendera okwa bihano byabu. (Luka 6:46; 1 Yoane 2:17) Yesu mwakangirirya athi si b’abosi abakabugha bathi “Mukama” babasyalhamibwa aliwe ‘abakakolha erisonda lya Thatha [wiwe] oyuli elhubulha.’​—Matayo 7:21.

•   Ithwalholha embere erikangania erikirirya lyethu nomuthwangabana ebitsibu. Yesu mwakikangania ndeke-ndeke akabugha athi: “Omundu oyo wasyayiyinia erihika okwa nduli yo wasyalhamibwa.”​—Matayo 24:13.