Owosi-wosi oyuwabirilengesya eritha akahuka akakaghulhuka anasi ku kithe kyolho. Omwa sipidi ng’ey’akarabyo, ehihuka ehi hikakyanga kutsibu oyukanza erihihamba.

 Abanya sayansi babiribumbura ngoku omulingo mughuma w’okwa hihuka ehikaghulhuka, akalhumba, kawithe amaaka w’eriyibindulha ng’esyondegge sy’amalhwa aliwe omw’ikohya ly’eriso. Profesa Michael Dickinson akabugha athi, hikabya hikabuthwa, “hyangana ghulhuka ng’ehyasi erighulhuka ndeke. Kiri ngoku wangana hira olhumekeke omwa ndegge y’amalhwa neryo ilhwatsuka erighendyayo.”

 Abakasekulhaya mubahamba evidiyo y’emighulhukire y’ehilhumba neryo bamakilhangira ngoku ebipupa byahyo bikapipira emirundi 200 omwa sekendi nguma. Kandi nibya, eripipirya ebipupa murundi mughuma musa likaghunza erithokesya emibiri yahyo erithoka eriyibalya okwa kabi.

 Neryo ibbwa hamabya ekikayithaghisibawa erikolhwa hakabya ekitsibu? Abakasekulhaya bakabugha bathi hamabya ekitsibu, ehilhumba ehi hikabana eky’erikolha omwa byalhuba mirundi 50 kwilhaba eripalya ly’eriso ly’omundu. Dickinson akasoborera athi: “Akalhumba kakakolha ekibaro ekikalire kutsibu, omwa ndambi nyike kutsibu, eriminya aho akabi kamasira kandi nga ni hayi ahakatholere eribalira.”

 Erihika na munabwire abakasekulhaya bakinalholha embere eriyitheghererya obwongo buke bwa kalhumba nga bukathoka buthi erikolha ebyosi ebi omwa nzira eyikaswekaya.

 Wukalengekanaya wuthiki? Mbwino amaaka w’akalhumba aw’erighulhuka ayibuthukira? Kutse mbwino kyakolerererawa?