Ekinyurughunzu kithe kyaghulhuka, kikayithagha ekihuhania erilhua okwa lyuba erihuhya ehisisa ehikaleka ikyathoka erighulhuka. Aliwe, omwa buthuku bw’ekihihi ekinyurughunzu ekikahulhawamo Cabbage White ky’ekikatsuka erighulhuka okwa bindi binyurughunzu. Ni kyahi ekikakithokesaya erikolha ekyo?

 Thakilengekaniako: Bikabya bithe byaghulhuka, emiringo mingyi y’ebinyurughunzu yikatsuka eryotha okwa lyuba ebipupa byabyo ibinakumbire kutse ibinasanzire buthambi-thambi. Aliwe, ekinyurughunzu ekikahulhawamo Cabbage White kikasingika ebipupa byakyo eribya ng’enyughuta V. Erisekulya lyabirikangania ngoku ekinyurughunzu erithoka eribana ekihuhania ekikaghunza, ekinyurughunzu kitholere ikyakumba hake ebipupa byakyo. Emisingikire eyi yikaleka akaghalha akakalhua okwa lyuba ik’ingira omwa hisisa ehiri omwa kikuba neryo ihyahuha, ekindu ekikaleka ikyathoka erighulhuka.

 Abakasekulhaya okwa Yunivasite eya Exeter, e England, mubanza eriminya ng’abangana kolha esyosola esyanga kolha ndeke imw’ikolhasyo omwa misingikire ey’ebipupa by’ekinyurughunzu eyiri nge V. Omw’ikolha eki, mubaminya ngoku omuliro owa syanga hulhukya akongera mirundi hakuhi 50 okwa 100.

 Kandi abakasekulhaya mubaminya ngoku ebipupa by’ekinyurughunzu bikalhahukako ekyakakalha. Omw’ikopa emisingikire y’ebipupa eyiri nge V n’amaaka wabyo aw’erilhahukako ekyakakalha, abakasekulhaya babirihulhukya esyosola esyanguhirire kandi esikakolha ndeke. Neryo eki mukyaleka Profesa Richard ffrench-Constant, omughuma w’okwa basekulhaya, iniahulha ekinyurughunzu ekikahulhawamo cabbage white “ng’ekyasi ndeke erikura ekihuhania erilhua okwa lyuba.”

 Wukalengekanaya wuthiki? Mbwino emikolere ey’ekinyurughunzu ekikahulhawamo Cabbage White erisingika ebipupa byakyo eribya ng’enyughuta V yayibuthukira? Kutse mbwino yakolerererawa?