Ebinyonyi ebikahulhawamo mallee ebikabanika omwa bitsweka by’eyikwa bye Australia bikalhangira bithi ekihuhania ky’omwa kyaali kyabyo kikabya ikine hakuhi-kuhi n’ekihuhania ky’ediguri 34 (93°F). Ekinyonyi eki kyangathoka kithi erilhangira kithi hakabya ihane ekihuhania eki omw’ithungyi n’omwa kiro omo mwaka wosi?

 Omwa buli buthuku bw’embulha esyonyonyi esi sikathakulha ekyuna eky’obuuli obw’emita nguma n’obughali bw’esyomita isathu, omo ekinyonyi ky’obulhume kikusulhaya mw’ebithi. Embulha yikabya yabirisokere ebithi byo haghuma, ekinyonyi ky’obulhume kikakolhaho ekyaali n’eriswika ekyuna ekyo omwa museghe. Buthuku buke-buke ebithi bikatsuka eribbolha n’erihuha neryo ibyahulhukya ekihuhania eky’obuhangiranwa ekyanga leka amaya iniathwibwa.

 Eky’obukali kikabya kikanza erilekera, eky’obulhume kik’ihamo omuseghe nuku eky’obukali kilekere okwa kyaali. Neryo aho n’aho ikyaswikakyo omwa museghe. Eky’obukali kyangana lekera amaya awahikire 35 ahakathi-kathi k’Okwomwenda n’Okwakabiri. a

 Ebinyonyi ebi bikabya ibinemw’ingirya eminywe yabyo omwa museghe erilebya ekihuhania nga ni kingahi. Neryo bikabya ibinemuhindungulha ekirundu ky’omuseghe ogho byabirihira haghuma erikwamana n’ekirimo. Ng’eky’erileberyako:

•   Obuthuku bw’ekihuhiriro bukayahwayo, omughulhu ebithi ibinemubbolha bikatsuka eryongera ekihuhania ekiri omwa kyaali, ekinyonyi ky’obulhume kikakehaya ekihuhania ekyo omw’ikehya okwa museghe owali okwa kyaali. Enyuma waho, ikyasubya okwa kyaali kw’omuseghe owaholhokire.

•   Omwa buthuku bw’ekihuhania, eky’obulhume kik’ongerako owundi museghe eritheya amaya okwa ryuba. Aliwe obuli ngyakya-ngyakya, eky’obulhume kik’ihako omuseghe, ikyasubya kw’owundi museghe ekyaali n’omuseghe byabiholhoka.

•   Obuthuku bw’ekihuhania bukayahwayo, ebithi ibyamabiribbolha, eky’obulhume kik’ihako hakuhi omuseghe wosi, erileka eryuba ly’omw’ithungyi rihuhaye amaya n’omuseghe ogho kiryalhusayako. Enyuma waho, kikasubayako omuseghe ow’anemo akahuhirya nuku ekyaali kibye ikinahuhire omwa kiro.

 Obuli kiro, omw’ithabaririra, ekinyonyi ky’obulhume kikakolesaya esyosaha esilhabire okw’ithano eribya ikinemuhumya-humya omuseghe w’esyokilo anga 850. Eribera erihumya-humya omuseghe eryo liwithe n’owundi mughaso: Likaleka omuseghe inianguhirira, ekindu ekikaleka ebyana ibyathoka eriyilhusaya omwa museghe owali okwa kyaali amaya akathwibwa.

 Wukalengekanaya wuthiki? Mbwino amaaka w’ekinyonyi ekikahulhawamo mallee aw’erilhangira kithi ekihuhania ky’ekyaali sikiriyongera kutse erikeha ayibuthukira? Kutse mbwino kyakolerererawa?