Abakasekulhaya bakabugha bathi esyombwa syangana kolesya amaaka wasyo w’eribehererya eriminya emyaka ey’esindi mbwa, olhubutho lhwasyo, n’eriminya eriyowa eryo sirimo. Kandi nibya esyombwa syangana thendekwa eriminyerera esyobbomu n’ebibatsi ebikathamiraya. Abandu kutsibu-tsibu bakakolesaya amaaka wabu w’erilhangira eriminya ebibathimbireko, aliwe esyombwa isyo sikakolesaya amaaka wasyo w’eribehererya. Esyombwa sikaminya ebiri aho omw’ikolesya esyonyindo syasyo.

 Thakilengekaniako: Amaaka w’embwa aw’eribehererya alengire awethu emirundi minene kutsibu eyitheghanzika. Erikwamana n’esukuru nguma omwa Amerika (U.S. National Institute of Standards and Technology), embwa “yangana behererya n’ehitotorerya hy’ekindu kirebe ehiri omwa buthabarika n’obuthabarika bw’ebindi bindu. Eki kiringene n’erisihirwa ekotha y’akajiko k’esukali eyiddungire omwa kiddiba ky’amaghetse manene kutsibu.”

 Ni kyahi ekikaleka amaaka w’embwa aw’eribehererya iniabya inialengire kutsibu awethu?

•   Enyindo y’embwa yitsapa-tsapire, neryo ekyo kikathokesayayo erithoka eribeherwa ndeke.

•   Enyindo y’embwa yiwithe esyonzira ibiri esikalhabaya omuka​—ey’erihumuliramo n’ey’eribehereryamo. Embwa yamabeha-beha okwa kindu, omuka ogho yikingiraya akalhabira omwa nzira eyiri mw’ehindu ehikawathikayayo eribeherwa.

•   Ekitsweka ky’enyindo y’embwa ekikawathikayayo eribehererya kyanganabya ky’esyosentimita 130 kutse nyingyi kw’aho, aliwe eky’abandu ikyo ni ky’esyosentimita 5 nyisa.

•   Embwa yangana thunga esyoselu nyingyi esikawathikayayo eribeherwa mirundi 50 kwilhaba abandu.

 Ebyosi ebi bikaleka embwa iyaminyerera n’ehindu hike-hike ehiri omwa buthabarika bw’ebindi bindu. Ng’eky’erileberyako, abasi bingyi bakabugha bathi, ithwanganowa akahoho k’omukubi, aliwe embwa iyangana minya obuli kandu akali omwa mukubi oyo.

 Abakasekulhaya abali okwa Pine Street Foundation, esukuru eyikasekulhaya okwa kansa, bakabugha bathi obwongo bw’embwa n’enyindo yayo bikakolongana haghuma eribya “bighuma by’okwa bindu ebikalha-kalire kutsibu okwa kihugho ebikakolesibawa omw’ibehererya.” Abanya sayansi banemukolha “esyonyindo” sy’ekielekitroniki eriminyerera esyobbomu, ekindu kyosi-kyosi ekithalighirwe omwa bilhaghiro, n’amalhwere, imwamuli n’ekansa.

 Wukalengekanaya wuthiki? Mbwino amaaka w’embwa aw’eribehererya ayibuthukira? Kutse mbwino kyakolerererawa?