MBWINO KYAKOLERERERAWA?
Olhulimi lhw’Epusu
Esyopusu syasibwe busana n’omubere wasyo w’eriyiyonza. Okwa syosaha esyasikaghunza isinalholire, isyangana kolesyako pasente 24 sikayiyonza. Omubere w’eriyiyonza ndeke oyu akathokekana busana n’emibere eyikaswekaya eyo olhulimi lhw’epusu lhukolirwemo.
Thakilengekaniako: Olhulimi lhw’epusu kuli ehindu 290 ehikahulhawamo papillae. Ehindu hike-hike ehisongolhomire ehisamalire bunyuma-nyuma ehi hikalha-kalire ng’ekinyalha kyawu. Obuli kasongolhomerya [papilla] kayikumbire omwa mibere ey’eribya ikangana heka amathandi epusu yikasubya olhulimi lhw’omwa bunu. Epusu yikabya yikalyatsira obweya, ehisongolhomerya ehyo hikingira omwa bweya neryo ihyahira amathandi w’okwa ngobi.
Ehindu hike-hike ehisongolhomire [papillae] ihyabirinenehibwa
Olhulimi lhw’epusu lhwangana hekera okwa ngobi n’okwa bweya bwayo hakuhi kw’ebijiko bisathu eby’amathande obuli kiro. Omwa mathande aya muli esyo enzyme esikitha obuhuka bwosi-bwosi. Eryongera okw’ekyo, amathande akabya akahindukamo ekyuka, eki kikaleka kimu kyakani eky’ebitsweka by’omubiri w’epusu ibyaholhoka, ekindu ky’omughaso munene kundi esyopusu isyo siwithe emyanya mike ey’erihulhukiryamo olhunza.
Akaghuma k’okwa ehindu hike-hike ehisongolhomire ehyo kameya obweya obuyiringire, kak’ingira eyikwa omwa bweya, ekikaleka ik’ongera omutsundo n’erikura obweya obuyiringire neryo ibwalingokalha. Kandi ehithwe-hithwe ehy’ehindu hike-hike ehisongolhomire ehyo hyangana sisimulha engobi epusu yikayiyonza. Abakasekulhaya mubakopa emibere eya olhulimi lhw’epusu lhukakoleramu bakakolha akaggandula k’erilengesiryako. Akaggandula aka kakazanula esyonzwiri isiwuthakolesya kaghalha kanene kwilhaba ehindi higgandula kandi kyanganolhoba erikayonza kandi kakalingolha esyonzwiri esiyilinga-lingire. Abakasekulhaya bikirirye ngoku olhulimi lhw’epusu lhwangana bawathikya eriminya ngoku banga kolha ebyanga wathikya eriyonza ndeke ebindu ebiriko obuli nga bweya-bweya. Kandi eki kyangana wathikya eryuwania emibere ey’erihaka amaghutha kutse omubatsi okwa ngobi eyiriko obweya.
Wukalengekanaya wuthiki? Mbwino olhulimi lhw’epusu lhwa yibuthukira? Kutse mbwino kyakolerererawa?